POLITICS VANGA MIPUI TAWRHNA?

Mahmuaka Chhakchhuak

 April 26, 2021 

 Kristian Ramah hian thil mak tak tak a thleng fo a, thil thleng tawh thenkhatte phei chu vawiin thlenga bang chhak lam melha, thlang lam melh leh hnu pawha mak tih tur hi a awm bawk hial a. Thenkhatte pawh a hunlaia an sawifiah viau tawh emaw tih hnua vawiin thlenga la sawifiah ngai fo mai te a awm bawk te hi thil mak tak a ni thei bawk awm e. Heng zawng zawng hi rilru buai leh ruih buai vanga thleng a ni loin rilru fim tak hmang chunga duh thu reng vanga thlen tir a ni hi a makna tak pawh a ni a, anmahni lah chu nupui fanaute innghahna ber – chhungkaw pa an la ni cheu-in, an inchhung bang kil khawi maw laiah te chuan ‘Pathian chu kan innghahna lungphum leh mangan laia tanpui vartu hnai reng a ni’ tih thu te pawh tar lang vah tur khawpa mawiin Coat suit nalh tak leh Nectie nena inthuam fo an nih hmel bawk a. Pawi ta ber thin zawk tak chu anni chunga mi pahnih khat lekin an kuta rul kua zen an tum a, hmanrua atan an hmang thin hi a ni thei ang. 

 Kum 2020 March thla atangin kan ramin CoviD hripui kan buaipui tan a, rambuai laia Curfew ang maiin lockdown te hial kan ngai a nih kha. Inah kan tawm thap a, hlauthawng takin social media-ah chanchinthar kan ngaihven awl lo a. Chutianga mipui kan buai ang bawk chuan ram hruaitute ngei pawh buaiin kan sorkar ngat phei chuan sum indaih lohna avangin hnathawktute hlawh a puk hial a nih kha. CoviD hrik hmuh theihna khawl tha bera ngaih (Rt-PCR) lah chu kan la neih loh avangin MZU leh PUC leh Vety College te hmanraw hawh khawmin CoviD laboratory chu April 2, 2020 (Thursday) ni chuan hmanhmawh taka hawn a lo ni tain April 7, 2020 ah chuan hman tan theih alo ni ta a. He CoviD laboratory dinna hian, Dr. Hlenmawia RIPANS, Dr. Vanramliana HOD, Bio Tech, PUC, Prof. Senthil Kumar, HOD, Bio Tech, MZU, Prof. Tapan Kumar Dutta, Vetty College, Dr. Gracy, ZMC te, Dr. Hmangaihi te, Pu H. Lalengmawia IAS, Health Secretary leh Dr. Christy, Microbiologist, Presbyterian Hospital, Durtlang te an thawh hlawk hle a. Dr. Christy phei chuan Prof. Senthil Kumar, MZU hnuaia a Ph. D research tihna tur (khawl leh hmanraw pawimawh tak tak) a rawn thawh tawp mai a ni a, a fakawm takzet a ni. Hetih lai hian Pu Lalduhoma, MLA chuan Rt-PCR khawl pakhat chauh, hawh chawp lehnghal rings state sorkar awm chu fel loa a hriat avangin June 1, 2020 ah chuan a leina tur pek a duh thu a sawi a, nimahsela ngai an lo ti ta hauh lo mai a, ngai an tih loh vang hian vawiin thleng hian a pek loh phah ta a ni. 

Amaherawhchu IBSD, Imphal atangin khawl pakhat min rawn hman tir hlauh mai a, Hauva & Sons te chuan khawl pakhat leina tur sum fai an pe bawk a. Zodintluanga, CLP Leader ngei pawhin June 26, 2020 niah Lunglei Civil Hospital hman turin Rt-PCR khawl hi a lo hlan bawk a, nimahsela kan hriat theuh angin a hlan ni la la hian DC Office lamah lak phei a niin July 2, 2020 ah Civil Hospitalah bawk dah let leh a ni a, vawiin thleng hian tha taka dahthat ala ni awm e. Hetih mek lai hian June 15, 2020 niah chuan Aizawl atangin Expert team te chuan Lunglei kalin Civil Hospital-a Rt-PCR Diagnostic Laboratory bun tur sorkarin a ruahman mek chu inspection neiin hmalak tulte an enfiah a. Expert team hi Dr. H. Lalhlenmawia, HoD, Department of Pharmacy RIPAN, Prof. John Zothanzauva, MZU leh Dr. Vanramliana Asst. Professor Zoology, PUC te an ni a, anni hian Lunglei Civil Hospital-a room pathum ruakte chu a that tawk thu an sawi nghe nghe a ni. Nimahsela a nih dan tur ang taka buatsaih dawn chuan sum leh pai pawh Nuaih 100 chu a lo berah a tul dawn thu an sawiin hun pawh a duh deuh hlek dawn thu an sawi a. Expert team hian Rt-PCR Laboratory puitling set-up tur hian sorkarah recommendation an thehluh tur thu an sawiin Lunglei Civil Hospital-a he khawl bun tur chungchang hi Health Minister phei chuan Indian Council of Medical Research (ICMR) hotute hnenah vawi engemawzat a thlen tawh tiin Expert team hian an sawi bawk a. 

 Nimahsela hei kum khat a tling tep tawh tihah pawh Lunglei Civil Hospital-a Rt-PCR Laboratory dinna tur hian kutthlakna hnuhma engmah ala awm si lo a nih hi. Tuna second Wave rawn thleng leh ngeiah pawh Chhim bial lam chuan Truenat khawl chauh hmanrua a kawl si a, Lunglei khawpui mai baka khawper tam takte tana hmanraw tangkai tak tur hi kan sorkar hian a theihnghilh palh zawk em ni le. Congress MLA Zodintluanga ngei pawh hian a khawl pek hi hman theih turin a dahna tur siam a buaithlak a nih pawhin keima’n ka siam ang a tih pawh chu thuneitute lamin an lo remti lo lehzel bawk si hi thil buaithlak tak a ni. Tunah tak phei chuan a khawl pek hi hman tlak a ni tawh lo hial zawk maithei lehnghal a! Hetianga Opposition MLA a nih vanga a thilpek dawng duh lo ang zia zanga thuneitute lam atang zawka thil awm hi thil pawi tak niin a hriat a, Party Politics hri chhia anga sawi theih tur chi hi bansan theih ni tawh sela a duhawm ngawt mai. Hriselna lam ngat phei chu thil dang zawng aia ngaih pawimawh tur a niin tunah phei chuan CoviD hripui thawh hnihnain min nuai mek a ni a, hetih laia Chhim lam tana a hmanraw pawimawh ber awm reng tawh hman loha la awm si hi a chhan tak hriat a chakawm viau mai a, Politics boruak chhe tak a nih loh vek chuan Chhim bial ngaihsak lohna hrim hrim a ni ngeiin a rin theih ang. A eng pawh chu lo nisela, hetianga khawl a awm tawh a, a bunna hmun tur enfel vek a ni tawh bawk laia mipui mamawh ngawih ngawih tihsak loha awm reng hi sawi mawi eng ang thin mahsela thil tha hi kei ni theiin ka hre mawlh lo a ni.