ZAN KHAT RIAKIN SERCHHIPAH

Mahmuaka Chhakchhuak April 3, 2021 Ka ṭhianpa nen thil pawimawh ti turin Lunglei atangin Aizawlah kan phei a, Aizawl aṭang chuan Serchhip By Election boruak thlir turin zankhat han riak hawng ila tiin lungrual takin Serchhip kan pan leh a. Serchhipah pawh chuan ṭhiante leh chhungte In lama innghat loin zalen taka hun kan hman theih zawk nan tiin Hotel-ah kan innghat zawk turin April 1, 2021 khan Serchhip kan thleng a, a tukah chuan muangchangin Lunglei lamah kan hawng phei leh a. Serchhip kan thlen tlaiah hian fai sersawrin ka inbual a, ka lengchhuak nghal a. Mi hrang hrang ka kawmin kum upa zawk deuhte leh bazaar chawhmeh zuarte, Party worker-te thlengin ka kawm hlawm a. Chung ka mi kawmte atang chuan hetiang hian ngaihdan han sawi ve teh ang. Candidate hi March 31, 2021 thleng khan nomination thehluh hun a nih avangin Election Observer chuan nomination thehluhte chu a pawm vekin mi 6 in Serchhip bial By Electionah MLA nih tumin an inchuh dawn a ni. Chung te chu: Lalhriatrenga Chhangte (BJP), PC. Laltlansanga (INC), Vanlalzawma (MNF), Lalduhoma (ZPM), Vanlalruata (PC) leh Ramhlun Edena (Ind) te an ni a, a hmun aṭanga an thawm ngaihthlak chuan mi namai an lo ni lo hlawm tih a hriat a, an fakawm hlawm ṭheuh mai. Inthlan hun hi April 17, 2021 tih kha sawn tura ngenna thehluh a ni nain sawn a nih dawn leh dawn loh la hriat chiah loh mahsela hei a hnai ta riau mai a, Candidate-te ngei pawhin Serchhip bialah hian awmchilhin an theih tawp an chhuah hlawm a, tlin ngei tumin hma an la hlawm a. Tu kan tha ber maw? Tiin chhun leh zan pawh sawi loin hun an hmang char char hlawm a, result chhuah hun a nghahhlelhawm ta viau mai. A hmun aṭanga mi hrang hrang hnen aṭanga ngaihdan lak atang chuan kan Candidat-te campaign dan hi a in ang lo hlawm viau mai a, Party lian te chuan Campaign Kickoff an neih vek tawh hlawmin a ṭhente hi chuan neih kher ngai an ti lo pawh a ni maithei zawk a. An Campaign Kickoff neihte chuan sawizui a hlawh hlawmin a chhe lam hawia sawizui an hlawh tlangpui nghe nghe a. A bik takin ZPM in Campaign Kickoff an neihnaa Rev. Dr. K. Thanzauva thusawi ‘Pathian ringtute leh Setana pawlte inbeihna turah ka ngai a’ a tih chu social media lama sawi tam ber a ni ngei ang. Congress Party lam pawh thusawitu pakhat thusawi chuan sawizui a hlawh hle mai bawk a, duh aiin ZPM lam a rawn kheng na mah mah an tiin MPF lamin an khak hial ni tein an sawi bawk a. Kan sawizui dan atang hi chuan tupawh mai hian a tha lam aiin a chhe lam hi sawi nuam kan lo ti zawk a ni tih a chiang reng mai a, Lal Isua meuh pawh khan kan hnenah hian thusawina rawn nei pawh nisela hetianga sawizui thinte hi chuan a chhe lam bawkin an sawizui duh tho te a rinawm hial bawk awm e. An Campaign dan hrang hrang min hrilh bawkin a Candidate pakhat chuan kum upa zawkte a ngaihsak viau a ni awm a, an hnenah Vitamin B Complex scrip hnih theuhin a sem chhuak hial ang an ti a, tun hma lama MUP memberte hnena Blanket semte leh lukhum semte pawh kha alo tha vek mai a, an tling emaw tling lo pawh nisela hetiang hian kum upa zawkte hi ngaihsak chhunzawm zel sela a tha viau maithei e. Candidate pakhat leh thung chuan thalai lamah boruak siam tumin programme eng eng emaw a buatsaih thin ni awm tak a ni a, thalaite kutkeah hman a tum viau a ni awm e. Chutiang zelin Candidate pakhat leh pawh chuan taihma takin chhun leh zan pawh sawi loin In tin luh chhuah tumin zing hmaiphih zawh hlim atangin a leng kual char char thin niin an sawi a, an fak viau bawk mai. A bikin PC leh Independent-a ding turte thawm hi hriat tur a awm meuh lo a, bial chhung mipui lam pawhin an thawm hi an hre meuh lo a ni ber e. Pu Hriata Chhangte hi Serchhipa vote la nei ngat a nih mai bakah bial chhung mipuite ngei pawhin Serchhip khaw mi ngeia an la ngaih a ni a, mimal ang zawng phei chuan hmelhriat pawh la nei ngah ber tura ngaih a ni hial ang. Amah ang bawk hian PC. Laltlansanga pawh Serchhip khaw mi leh sa tho a ni bawk a, a ni erawh Party lian leh nghelnghet tak atana ding a ni bawk a, Pu Hriata ai chuan a thawm a ring zawk em ni aw tih theih a ni. Congress Party hi Pu Tlansanga hian a vawrh kang hle mai a, amah a taihmain a mawng zang an ti riau a, tun tumah a tling lo palh a nih pawhin next election-ah chuan hetiang reng a nih chuan a tlin ngei an ring hlawm. Pu Zawma pawh In luah meuhin a awm bawk a, a campaign ngawrh viau bawk a, sorkar tha chakna hmang thei an niin Minister leh MLA te hmel hmuh tur a awm zauh zauh bawk. Pu Lalduhoma ngei pawh hun awl nei loin a campaign char char a, a tan ngat hi chuan campaign au-hla hran ngai vak lo tein an sawi a. MLA 12 laiin Assembly Speaker hnena an hekna chhan leh MLA atanga ban a nih chhan hi mipui lamin an khawngaih phah viau niin a hriat a. A bantu Speaker berin dan ang thlapa ban a ni ti mahsela a bial hlui Serchhip bial mipuite hian thinlung takin an pawm meuh lo ni tein a hriat. Heng mai bakah hian Pu Duha telna leh tel lohna Assembly Session danglam zia hretu an tam avangin Session lehah chuan tel ngei sela tih duhtu hi an kat nuk bawk a, party sawi loa vote ngei tum an awm thluah bawk. Chawhmeh zuar nute ngei pawhin Pu Duha tel lohna session chu a hmuhnawm loh te an tiin khawngaihtu a nei nual dawn niin a hriat a. Hetiang hian zankhat riakin Serchhipah hun kan hmannaa mi hrang hrang kan kawmna atanga ka hmuh dan chu a ni. Heng bakah hian thil dang tam tak a awm bawk ngei ang a, tum tum zet chu a tlingte tan hian By Election dang zawnga tlin aiin a lawmawm ngei ang a, mipui lam pawhin kan lawmpui ngei zawkin a rinawm a, a tling lo te pawh an tla na viau te in a rin theih bawk. A chhan chu By Election hi sorkar-lai Party chanpual bik a nihna leh nih kher lohna hriatna tur a ni dawn tlats.