COVID 2nd WAVE CHUNGCHANGA CM THUCHAH THLIRLETNA

Mahmuaka Chhakchhuak May 30, 2021 A hmasaberin Zoram mipuite chibai bukna neiin CoviD thawh khatna leh thawh hnihnain min tihbuai dante leh a hnuhnung zawk phei chu nikhata a za tel tea kai thar kan awm thin thute sawiin CoviD vanga kan buai dan a sawi hmasa a ni. Heng bakah hian a thawh thumna pawh alo thleng leh a nih chuan kan inbuatsaih tawh ang a, kan tawn hriat aṭangin thil tih dan tur kan hre tawh turah ngai ila a ti a. Nimahsela hei hi Critical taka ngaihtuahna neih chuan kan Chief Minister zahawm tak sawi danah hian 2nd Wave lo thleng turah khan inbuatsaihna kan nei lo angin a ngaih theih a, 3rd Wave lo thleng leh tur (tase) atana sorkar inbuatsaihna engmah sawi a nei lo a, thawh khatna aia thawh hnihna a na zawk leh kan tuar zawk anga sawi si a thawh thumna atana Sorkar inbuatsaihna a sawi lang lo hi mipui tan thlamuanna tur a awm lo em? Heng bakah hian lawmthu sawina neiin a point te tein a rawn thliar a: 1) A hmasa berah chuan kan Doctor, Nurse leh Health Department a thawktu dang te, anmahni pui tura in volunteer-a kal zawng zawng te leh a dang, frontline a awm zawng zawngte hi in thil tih ropui tak avang hian lawmthu a sawi a. A then chu damloh phah, covid hri kai phah te pawh in awm tih ka hria. In inpekna hi ropui kan ti a ni tiin lawmthu sawina a rawn nei a. Frontline Worker te hnena lawmthu sawina neih hmasak ber hi thil tih-awm tak a ni. Nimahsela duhkhawp lohna ka lo neih chu Frontline worker-te tana sorkarin Security a siam te han sawi lang se famkim deuh turah ka lo ngai a, thil pawi tak phei chu a ni lo e. 2) A pahnihnaah chuan kan Village leh Local Task Force-te chungah lawmthu a sawi a. Tunah chuan a hma kuma ramri a fur chhe kara duty te a ngai ta lo deuh hlek a. Amaherawhchu mahni vengah leh mahni khuaah a tulna apiangah kan task force te hi kan innghahna ber - ei leh bar thu a ni emaw, discipline kalpui thu ah a ni emaw, kawng inkawhhmuh thu a ni emaw, damlo harsate sawngbawl dan leh kalpui dan zawng zawngah te kan innghat a. In hah zia kan hria a, chuvang chuan mipuite aiawhin in chungah lawmthu a sawi tak meuh a ni. Hei hi chu a tha viau e. 3) Sorkar hnathawkte hi office a kal lo theilo te an awm in, khuahkhirhna avanga office theilo an awm bawk a. A tulna apiangah CoviD dona kawngah kan in detail nawk nawk hlawm a ni a. In hna pangngai in thawh bakah tih tak zeta CoviD dona a in thawhnaah lawmthu a sawi bawk a. Hei pawh hi duhkhawp lohna awm thei chu kum hmasa lama sorkar hnathawkte thla thum lai an hlawh puk sak an nih te, tuna an nikhat hlawh CoviD beihletna atana an thawhah te khan lawmthu sawina han nei nghal sela remchang viauin a hriat. 4) Mahni in volunteer, Nurse an ni emaw, Doctor an ni emaw, zirna thiam bik te nei leh mi dang dang, damlo enkawl tura inpe te, mahni chhungte leh mahni chhung nilo pawh enkawl tura inpe te nen, a ropui a ti hle a. In pawimawh in, in entawn tlakin, hnam dang lakah pawh in chhuanawm tak zet a ni tiin lawmthu sawina a nei leh bawk a. Hetah pawh hian mahni inpekna vanga CoviD vanga damlote enkawl sawi tur hi chhiar tham lek kan la nei a, an hming hmerha sawi lan nisela lawmthu sawina hi famkim deuh turah a ngaih theih a. Sorkar atangin lawmman emaw lawmthu sawina thilpek inpe thei chiah lo mah ila tawngkam tal chuan lawmthu sawi hi thil tih awm tak niin alang. 5) A dawt leh ah chuan mipui hnenah lawmthu a sawi leh a. Mahni thenawmte ngaihtuahin, a thenin mahni thlai tharte inpe in, a veng veng in, a khua khua ten kan inpe in kan in supply hlawm a. Hnam dang te’n min hmu se mak leh mawi an tih tur kan hmu tam em em. Lawmthu a sawi a ni. Kan CCCC leh CoviD enkawlna hmun hrang hranga enkawl dan chungchangah fak tur a tam hle a. 'Kan kohhran in kan tum ang, kan vengin kan tum ang, kan chhungin kan tum ang', kan ti ngat ngat te hi a ropui ka ti hle a, theihtawpin chhunzawm zel thei ila a duhawm hle a ni. Hei erawh a lawmawm viau, chip zui lo mai ila. 6) COVID Fund atana CM Relief Fund ah kohhran, pawl hrang hrang, mimal, sorkar hnathawk leh MLA te'n thahnemngai takin an rawn thawh hi a ropui a tiin. Rin aia tam an thawh hlawm a; Zoram pawn atang thlenga thawhtute an awm hian kan tanrualna a tilang a. Pawisa thawhtute zawng zawng chungah lawmthu a sawi takzet a. Hetah pawh hian duhkhawp lohna awm leh chu CMRF a sum lutte hi Opposition lamte beihna ang deuha sorkar bungraw pawimawh leina atana hman a lo nih pawhin kan CM zahawm tak hian a chhan han sawi sela kan dam tlang deuh ngeiin a rinawm. CMRF enkawltute (a hman dan tur rel tute) pawh min hrilh law law bawk ta sela, langtlang taka enkawl a nih dante leh mipui tana thawh chakawm thei tur zawnga tawngkam nei bawk sela kim viau zawk turah a ngaih theih ang. A dang, point 7 na atanga hnung lam hi chu sum leh paia kan harsatna tawh leh hmalak chak theih lohna lam sawiin mipuite hrethiam tura ngenna lam hawi a ni a, hei hi chu sawi tawh rih lo mai ila, a hran la sawi atan khek zawk ila a tha awm e. Tuna kan han tarlan chinah ringawt pawh hian sawi tur tam tak a awm a, CoviD 2nd Wave ah hian kan Chief Minister zahawm tak hian thu leh hla ala nei tlem hle mai a, hei hi a vawi khatna a ni mai awm e. Nimahsela hetah ngei pawh hian mipui tana thlamuanna tur leh lawmna tur a sawi tam lo viau mai a, chu mai bakah chuan CoviD hripui leng vanga Nunna hlu tak chan mi 30 chuang an awm tawhin mi pawimawh tak tak leh Ram hruaitu hial lo ni tawhte an tel lehnghal a, chuti chunga kan ram hruaitu berin anmahni uina thu emaw pawi tihna thu emaw tawngkam khat mah a sawi lo hi thilmak tak a ni. A bik takin MLA mai nilo a Minister hial lo ni tawh Pu Zoram Sangliana phei chu a hming han lam ri sela, sorkar lam atanga a ralna pek dan tur te pawh sawi lang mahsela thil pawi lo tak tur a nih laiin a sawi lang miah lo hi thuchah ziaktu hian a ziak kim lo palh nge hmaih luih ni zawk ang tih chu ngaihtuah ngai tak a ni awm e. CoviD vanga Nunna chante tana sorkarin sum leh pai ruahmanna hi a nei lo nge sawi lan a ni miah lo pawh hi thil pawi tak a ni thei bawk ang. A ram pum huapa hripuiin min chim buai mek lai leh ni 40 chuang lai Lockdown kan neih laia ram hruaitu berin mipui hriattura thuchah a sawiah hian mipui tan lawmna tur leh thlamuanna tur a awm lo hle mai a, insawifiahna leh mipuite hriatthiam dilna lam hawi deuh vek a ni awm e. CoviD vang hian keini, frontline-a awm ve lote tan phei chuan vanduaithlak takin lo thi palh pawh ni ila kan Civil thih ve tawp mai dawn a nih hmel a, India khua leh tui dik tak kan nihna leh Addhar Card kan neihte Voter ID kan neih te pawh hian awmzia a nei dawn ta si loh mai bakah chhungkhat laina hnai deuh leh ṭhenawm hnai deuhte chauhin emaw min sun dawn a nih hmel si a, CoviD hripui vanga thih loh kan tum hle a ngai a nih dawn hi.