COVID HIAN MIMAL LEH CHHUNGKUAAH RAH ṬHA CHHUAH SE

Mahmuaka Chhakchhuak May 12, 2021 Kum khat aia tam chu hei CoviD hripuiin min luhchilh ta reng mai a, nunna chan pawh vawiin thlengin 24 kan lo awm ta hial a. Damdawiinah dam lo chhiar tham fe kan awm reng bawk a, dama chhuak pawh nitin kan awm zel nachungin nitina hri kai thar hi kan la tam zawk miau rih si a, kan hmalam hun hi a thim zawngin a kal dawn nge pawh sawithiam a har viau a nih hi. Chumai bakah kan nitin hnathawhna lam leh zirna lamah pangngai takin alo kal theih bawk si loh a, lockdown alo ngai ṭhin bawk nen mitin nunphung a buai zo vek a ni ber mai. Hetiang boruak rit tak hian engtia rei nge min chenchilh dawn tih lah chu khawvel mithiamte tan pawh sawi thiam har tak tur a ni lehnghal a, kan awm zel dan tur hi hriatthiam har tak a ni thei. Chutiang boruak rit takin min chenchilh reng lai chuan Pathian zarah nang leh kei chuan hriselna ṭha kan la neih thung avang hian lawm ila, kan nitin khawsak phung pangngaiin khawsa thei chiah lo pawh ni ila, kan nakin hun atan hian nikhat pawh hi alo thlawnin i hmang liam mai mai loin ṭangkai taka hman i tum zawk ang hmiang. Lockdown vangin pawnah a chhuah theih loh a, mahni Inah tawm ṭhap a ngai bawk si a, mut mai mai nan ringawtin emaw game khelh nan ringawta hun kan hman mai mai chuan hun ṭha khawhral satliah kan ni zawk dawn a, chuvangin hetiang hian hun hman ṭangkai i han tum teh ang aw: TAKSA SAWIZAWI: Zingah dar engzatah nge i thawh ṭhin le, dar 5 velah tal thawh tum la, taksa sawizawiin in kawtkai velah khan emaw In chung zawlah emawte kalin i thlantui chhuak ngei turin ti ṭhin rawh. Boruak thianghlim tak hipin i taksa hriselna turin rilru hahdam takin awm la, ngaihtuahna fim tak nen hun hmang ṭhin ang che. Chumi hnuah chuan fai takin inbual la, eirawngbawltu i nih chiah loh pawhin tui te lo lum la, chumi hnuah chuan i duh leh midang chim buai loh turin room ah lehkhabu chhiarin awm daih tawh mai rawh. A nih loh pawhin eirawngbawlte han pui bawk la, mipa nih vanga eirawngbawl lo tura indah ngawt loh tur a ni a, chhungkaw boruak nawm zawk nana a khat tawka eirawngbawl ve ṭhin hi zawngchhang chi tak a ni. LEHKHABU CHHIAR: Lehkhabu tih hian a huam zau viau thei a, Pathian lehkhabu thianghlim, Bible kan tih ngei pawh hi huam tir ila. Lehkhabu chhiar hi mizo zingah hian taima tak tak an lo tam mai a, chung mite chu an thilsawi leh ziah ṭhinte hi belhchian a dawl bik tlat ṭhin. Bible chhiar ngei pawh hi thlarau nun a chawm mai bakah hriatna a tizauin a bengvarthlak em em bawk a, thawnthu ngaihnawm tak a ni. Nitin chhiar tur a darkarin emaw a bung zawngin emaw bituk insiam la, bahlah loin chhiar ngei ngei tum bawk ang che. Thil chhui bingna lam, research lam ti mi tan phei chuan lockdown hi hun tha tak a ni thei ang a, chu lam ti mi ni kher lo tan pawh lehkhabu chhiarna hun remchang tak a ni hrim hrim tho. Chhiar la, chhiar zel la i inchhir lo telh telh mai ang. CHHUNGKAW TAN THIL ṬHA PAKHAT TAL: Taksa sawizawi leh lehkhabu chhiar lam bakah chuan nikhat atan hian chhungkaw tana thil pakhat tal thil ṭha tih tum ṭhin ang che. Pa ber nih vanga inchhunga lal anga i awm ngawt khan i nupui leh fanaute tan i hriat loh laiin ilo hnawk hle reng mai thei. Inchhungkhura thu ber kan tihte hi chu a che peih hi an lo nih zawk zel ṭhin avangin nang ngei pawh chuan thil pakhat tal tih tum ṭhin ang che. Dam lo leh bawrhsawmna nei i nih ngawt loh chuan hmun phiah emaw, tui khai a ngaih chuan tui han khai zawk emaw tal ti ṭhin ang che. Sum thawk chhuaktu ber emaw hotu ber emaw i nih avang khan i chenpuite khan an zah chein i thu an awih a ni mai thei a, chu ai chuan a thawk chhuaktu ber pawh ni la han che ve sawk sawk la an ngaina lehzual ngawt ang che. Nula leh tlangval tan pawh nilenga muchunga games khelh ngawt ai chuan tirh ngai miah loin tual te va phiat fai ngawt mai la nuam i ti ngawt ang. I chenpuite ngei pawhin an ngaina sawt ang che ang a, inchhung boruak alo nawm phah ngei bawk ang. Ni leng lenga games khela computer hmaa thu ringawtte hi chu ngaih khatah kan ngai tlangpui a nih vek hi. THIL PAKHAT TAL ZIR ZIAH RAWH: Lehkha i zir sang loin sap tawng pawh thiam lo mi tak pawh ilo ni mai thei e, nimahsela i pianpui tawng, mizo tawng erawh chu i thiam ngeiin a rinawm. Computer thiam kher pawh a ngai loa pen i neih a, a ziahna tur lehkhapuan i neih bawk chuan Article ziah emaw thawnthu ziah emaw te hi zir tawp rawh. Computer khawvelah kan cheng tawh nameuh mai nain Computer khawih thiam lo leh a ngaihna reng reng hre lo Officer hi sawi tur an awm nual. I thiam loh avang khan in kiltawih phahna atan hmang hauh lo la, kut i neih a, pen i neih bawk chuan ziak phawt mai rawh. A tirah chuan i ziak chu chhiar tlak a ni kher lo thei a, ziak zel la, ziak zel la i thiam telh telh ang a, nangmah ngei pawh chuan nuam i ti telh telh ngei ang. Tunlai hun thlenga ziaktu lar kan neih zingah hian Pu Pl. Liandinga hi kan hre theuh ngei ang a, thusawi thiam tak a ni bawk tak nain mi tam berin kan hriatna chhan hi chu a thuziak vang a nih ngei a rinawm. Hetiang dinhmun thleng tur hi vawi za tam a ziak tawh a, kum tam tak alo ziah tawhna avanga tun hun thleng hi a ni. Mi dangte pawh an ni tho, vawi hnih khat an ziah vanga mi hriat hlawh an awm lo reng reng a, chawl loa an ziah reng vanga mi hriat hlawh an ni vek. Nang ngei pawh chuan chutiang dinhmun chu i thleng thei a, i hmaah hian a awm tih hre reng ang che. Thuziak lam chauh pawh niloin nikhata sap tawng word khat lek i thiam a, nitin word khata i thiam zel chuan thil tha tak bawk a ni a, chutiang zel chuan thil dang dangah pawh zira thiam theih loh engmah a awm lo tih hi vawng tlat ang che. Tumna a awm a, taimaknain a chhunzawm bawk chuan hlawhtlinna chu hnai teah a awm thin. Chuvang chuan lockdown hi a ṭangkai zawngin hmang ngei la, lockdown loh hunah pawh chawl chuang ngai suh ang che.