KA VEI ZAWNG – III

Mahmuaka Chhakchhuak March 26, 2021 THIL ṬHA HLIR CHAUH HI KAN MAMAWH LO Vawikhat chu India Sipai ṭha chung chuang, Commando an tih zinga mi pakhat nen hian kan inkawm a, thil dang dang kan sawi karah chuan ‘a nih leh sipai ṭha chungchuang inni bawk si a, in ei leh in lam pawh a ṭha hlawm bawk ang maw’ ka tih chuan a ni chuan alo nih reng bik loh dan min hrilhin, ei leh in tha tak takte chu an ei bawk tak nain, zawi zawiin an lo ei chhe leh telh telh hi alo ni a. A chang phei chuan buhfai tlemte nen chauha ram hnuaia an pilril ṭhin thute min hrilh a, mak ka ti hle mai. Nimahsela chutiang chu an taksa mai bakah an rilru leh thinlung lam ngei pawhin an lo ṭhatpui zawk dante min hrilh chuan ka hrethiam ta chauh a. Hetiang hian keini ngei pawh hian taihma takin ti thei ta ila, thau lutuk kan tihte leh zunthlum leh eng ilo natnate hi mi tam tak chuan kan neih loh phah mai awm mange te a tih theih awm e. Keimah ngei pawh hian taksa sawizawi ka thatchhia zia te, ei leh in lama insum har ka tih ziate ka ngaihtuah hian mamawh ka inti hle a. Chutiang zel chuan taksa hriselna lam thuah chauh pawh nilo thil dang dangahte ngei pawh hian thil tha chauh hi kan lo mamawh ber loin thil ṭha lote ngei pawh hi kan lo ṭhatpui thei zawk dawn a ni tih alang reng mai. Kum tam tak lian tawhah khan Israel hnam 12-te chuan Roreltu 14 an neih hnuah khan Lal 3, Saula, Davida leh Solomonate an nei lehin chumi hnuah chuan hnam 12te chu inṭhenin hnam 10-te chu Hmar lam Lalramah awmin Chhim lamah hnam 2-te an awm bawk a. Hmar lam Lalramah chuan Lal 19 an nei hman a, chutiang bawkin Chhim lam Lalramah pawh chuan Lal 20 an nei hman bawk a. Chung an Lal zawng zawngte chu mi tha tak tak vek an ni hauh lo a, Pathian hnam thlan chunga roreltu ni awm rengte an awm laiin a ṭhente chu sual tak an niin ramhuai rilru pu tih khawpa sualte pawh an awm bawk a nih kha. Chu chu an mipui, Israel fate chuan a hunlai chuan tuar hle thin mahsela, hun alo rei chuan an thatpui zia kan hriain, vawiin niah chuan hnam ropui tak an lo ni ta zawk a ni. Keini ramah ngei pawh ram hruaitu nih tumte chuan au-hla tha tak tak hmangin leh ṭawngkam thiam tak tak hmangin vote an rawn zawng a, chumi hnuah keini mipui lam chuan kan duh berah vote thlakin kan lo thlang tling a, sorkarna an siamin an rorel danah kan lung a awih leh lo a, kan phun a, an lakah lungawih lohna kan lantir thul! An felin an ṭha chungchuang bik e ka ti hauh lo nain mipui lam pawh hian kan zir lohna hi a awm ve bawk tih hriat hi a ṭha mai thei a ni. Sawi sawi lo hian Pathianin kan phu tawk hruaitu leh roreltu min pe a ni tih hi pawm ngam mai zawk ila a hahdamthlak viau awm e. AIA UPA ZAH Keini rualina kan hriat chian leh a taka kan tawn ve phak rual loh – Zawlbuk rorelna kha a ṭha ngawt mai. Val upa in tlangval kokhawmin Zawlbukah rorelna an neiin tlangval zinga awmdan mawi tlachham deuhte chu an zilh thin a, chutianga an zilh tawhte chuan an thatpui ngei ngei thin bawk a ni awm e. Chutiang bawkin val upate’n tlangval rual zing atanga NO PUI dawm tura an kohchhuah ngatte kha chu chhuanawm tak an ni. Khatiang taka val upain khawtlanga rorelna an neih ang khan tunlai hunah ngei pawh hian nula leh tlangvalte chunga rorelna nei turin val upate hian thuneihna nei ta sela kan khawtlang nun theuhah hian kan thatpui ngei a rinawm. Tunah chuan upa zahna tlachham tak tak kan tamin mizo nun ti mawitu leh ti zahawmtu ber Tlawmngaihna nei hlawl lo thangthar kan tam ta hi a pawi ngawt mai. Inchhung khurah ngei pawh aia upa zawkte zahna lam thu sawi ngai lo chhungkua pawh kan lo tam ta hle mai bawk a, kan kristianna atanga thlira zahthlak khawpin mi hausa zawk leh rethei zawkte inkar alo zau ta tial tial bawk nen hian kan khawtlang nunah hian insiamthatna tur a tam ta hle mai. Motor chuan nikhuate, puipunna hmunahte ngei pawh hian kum naupang tak takte hian a lailum tha tha hi kan han chuh ta chat chat mai a, kea kalna hmunah te ngei pawh hian kum upa zawkte kawng ken nachang pawh hre lo thangthar kan tam ta bawk te hi a hnam ang zawnga kan thilvei tur pawimawh tak a ni thei awm e. Chutih laiin chhungkaw inenkawlna tha tak vawng nung reng erawh an awm nameuh mai a, kum tam tak liam tawh atanga vawiin thlenga nungchang mawi tak la chhawm nung reng mi an la awm erawh hi chu chhuanawm tak an ni. Chung zinga hming hmerh meuha sawilan duh ka neih chu tuna kan Chief Secretary, Pu Lalnunmawia Chuaungote chhungkua hi a ni a. Kohhran ngheng tlat chhungkua an ni bawkin vawiin thleng hian an fate ngei pawhin kohhran an hlat ngai lo a, an nu leh pate atanga an chhawm nun reng tawh – Aia upa zahna hi an vawng nung tha em em reng a. Pu Nunmawia ngei pawh hi a hnathawhna lamah chuan mi chhuanawm tak leh zahawm tak a ni chungin a unaute mai bakah midang bul ah reng reng hian upa zawkte zahna nei lian tak mi a ni. Kristian chhungkaw tha tak an ni bawk a, Shillong khawpuiah an awm lai khan keimah ngei pawhin an inchhung khur hi ka lo dai lut ve fo tawh thin a, an chhungkaw boruak hahdamthlak zia te leh an kianga awm a nawm zia hi ka lo hre tawh a. Chapona leh midang lakah induhna an nei ngai reng reng lo a, thenawm khawvengte tan ngei pawha ngaimawh tur hian an awm ngai hek lo. Huan ilo ramri chungchangah ngat phei hi chuan vawitekhat mah hi an la buai ka ring hek lo. Anni chhungkua ang hi khaw tin hian kutchang thleh tham lek pawh chhungkua nei theuh ila kan hnam hmel ti mawi tu a ni thei ngei ang le.