KAN MAMAWH THIL PAHNIH

Mahmuaka Chhakchhuak May 22, 2021 RAM HRUAITU PATHIAN ṬIHMI Bible ram aṭang tawhin Pathian ṭihmi ram hruaitute ram hruaina hnuaiah mipui an thla a muang fo tawh tih kan hria a, Pathian ṭih lo mi ram hruaitu an neihin mipui an ralṭi fo a, an thla a ngam ngai lo a ni. Israel fate khan Lal pathum an neiin chung lalte chuan kum 120 chhung rorelna an nei hman a. An lal neih hmasak ber Saul-a chuan kum 40 chhung rorelna a nei hmanin a hun tawp lam phei chu rilru buaiin hun a hmang a nih kha. Davida a rawn lal veleh a, kum 40 bawk rorelna a neiin a hunlaiin mipuiin thil danglam tak tak an tawn phah a. Mi nupui duhlai a uire avangin Pathianin a hrem a, nimahsela Pathian hnenah a tlulut lehin hremna chi hrang hrang an tawng a nih kha. Solomon-a a rawn lal veleh phei chuan a khawnbawl upate thu la duh loin a ṭhalaipuite thu chauh hmangin rorelna a nei a, kum 40 zet lalna chang mahsela, a hun tawp lamah a lalram chu ṭhenin alo awm ta hial a ni. An pathum zingah hian Davida hi kan fak berin a rinawm a, an lal hunchhung in ang vekah pawh a chanchin hi kan sawi tam ber a ni ngei ang. A chhan chu Pathian a tih tlat vang a ni a, Pathian mithmuha a famkim loh a, a bawhchhiat pawhin Pathian kutah a tlulutin a inphahhniam mai thin. A lo chapo a, sipai ralthuam kengmi ngah alo intih deuhah pawh khan Pathianin a hremna turin duhthlan tur pathum a pe a, khawngaihna ala lantir hram hram a ni. Kan ram hruaitute zingah ngei pawh hian Ṭawngṭaina pindan neite pawh kan lo awm tawh thin nain kan hnathawh leh thuneihna kan hmanin chunglam malsawm loh zawng takin kan lo hmang thin zawk ngein khawizu leh hnutetui luanna ram – Kanaan hi kan la thleng hleithei tlat lo mai. ‘Pathian leh kan ram tan’ tih thupuia neih meuhte pawh chuan rorelna fawng an chelhin mipui an phun mur mur tho a, ‘Rorelna dik chu lui ang luang rawh se’ tih thupuia hmangte ngei pawh chuan a hnua mipuia ngaihdam dil leh ngai khawpin rorelna an lo nei tawh tho a nih hi. Pathian ṭihna tak tak nen lo chuan ram hruaina hi tih mai mai chi a ni lo a, US President hmasa ber George Washington khan ‘Bible tel loin engtin nge ram a kal theih ang ni?’ alo tih angin anni chuan a takin Bible thu an kalpui a, tawngkam mai leh hmuhtheih maiin Pathianthu an tarlang ngai lo. An pawisa note zawng zawngah pawh ‘In God We Trust’ tih ziak vek khawpin Pathian an rinna an ti lang bawk a, vawiin thlengin hnam dang zawng zawngin kan chung en an ni. Chutiang karah chuan an dan siamte chu an zah a, dan bawhchhiate lah hrem lohin an chhuah hek lo. An President meuh te pawh an sualna thupsak tum loin rorelna hmuna ngaihtuah ngai khawpin thubuai an awrh tir mai a. Kum 1974 daih tawhah khan an President Richard Nixon chu Watergate scandal avangin impeachment alo tawk tawhin Aug. 8, 1974 chuan US President atangin phur lo zetin banna thu a lo sawi phah tawh a nih kha. Kum 1998 a Clinton leh Monica Lewinsky te Affair ngei pawh kha kan ram hruaitute thiltih chu nisela chuan an thup bo ngeiin a rinawm. 1;45 gossip leh Phaizau Sangha bomb te ngat phei hi chu Dan ngai pawimawh intite tan ngat phei chuan mipui lungawihna tura hmalakna chi hliah hliah a ni. Kan mizo danah ngei pawh a thangtlawm thlak a, kan kristianna atang ngat phei chuan sawi nuam lo tak a ni bawk ang. Nimahsela kan lo heti leh ta tho a nih hi. Bang rawh se tia kawngzawh tute ngei pawh chuan an kawng zawh khuma ber chu pangparthi an lo awrhtir leh ṭhin tho bawk si a, kan ram politics-ah hi chuan ringlotute tih awm tak tak thil a thleng fo mai a, heti hrim hrim kan nih hi chuan kristianna rawn luh puitute bawk khan harh thar dik kan chan lehzual theihna atan min rawn luhchilh leh a ngai hial lawng maw? KAN TIH TUR ṬHEUH TIH Mipui pawhin sorkar thuchhuak kan zawm a, tun CoviD hripui lengah ngei pawh dan leh dunte zawm that chu kan tih tur pawimawh tak a ni. Chutiang bawkin ram hruaitute ngei pawhin an tih tur tak an tih kha a ṭha a. Dan siamtu an ni emaw mipui chunga roreltu an ni emaw eng pawh lo nisela an tih tur tak an tih chu an zahawmna leh mipui lam pawhin kan chawimawina tur chhan ber pawh a ni. In ang khat vekin kum khat atan Fund Nuai 100 an neiin tha an tihna atan an hmang thei a. Danin a phal chin anga an hman tura an kuta awm a ni a, an mimal sum hmang ang maia fak leh chawimawi chiam kha a ṭul kher lo mai thei. Chhungkaw pa berin a nupui fanaute tana thil a tih apianga a nupui leh fate’n a thiltih ṭhat an lo sawi zel kha thil mawi a nih loh mai bakah a zahthlak thei bawk. Kan MLA 40-te ngei pawhin anmahni mimal sum leh pai pawh nilo mipui rawngbawlna atana an kuta sorkarin a dah (MLA Fund) an hmannate chu mipuiin kan lo hriatpui a ngai a, lo fak chiam kher erawh hi chu kan bat a ni lo. Mipui rawngbawl tura kan thlante an ni a, mipui rawngbawltu an nih anga hna an thawh chu an tih tur a ni zawk. An thawk ṭha lo a nih erawh chuan kan liak er thei a, bang hial tur pawhin kan nawr thiang. State changkang zawkah chuan politician te hian ram inrelbawlna thil tur an ngaihtuah a, ram tan ṭha tur leh hnathawh tur chi hrang hrang an ngaihtuahte chu sorkar hnathawkin an bawhzuiin an thawk thin zawk a nih laiin kan ramah chuan politician in hnathawh kan tum tlat a, a thenin officer liante kan tlawnin a ṭhente chuan kan lo thurualpui bawk a ni lawm ni. Ram hmangaih vanga politics ngaihvena luhchilh kan intih ṭheuh lai hian mi tam takte hi chuan ram hmangaihna avanga hloh leh chan aiin ram hmangaihna kawr kan hak avanga hlawk ta zawk hi kan tam tawh hial awm e, ram hmangaihtu ṭhenkhatte chu In ropui tak tak an neih phah a, ṭhenkhatte thlam phei chu mi tam tak neih phah loh tur kumkhua te pawh a ni hial ang a. Kan tih tur theuh ti ila a ṭha a ni mai tur hi a nih laiin politics hi sum hnar tha tak emaw kan ti ta tlatte hi engtikah tak bansan thei ang i maw le?