LUNGSEN VAWK THIHNA MAWLH HI!

Mahmuaka Chhakchhuak April 18, 2021 Inrinni kal liam ta mai, April 17, 2021 chawhnu dar 1 thleng khan Lungsenah vawk 538 a thi tawh a, pakla hisapa han hisap mai chuan tunah hian vawk 387 chiah dam an la nei ni awm tak a ni. Nikhata thi hi a thathnem thin em avangin heng ala dam te ngei pawh hi hetiang zela an thi a nih reng chuan reiloteah chuan an la thi vek ngeiin a rinawm. Sorkar lam aṭang ngei pawhin a ngaihsakin Lungsen khuaah hian kal chilhin an enfiah tawh a, tunah phei chuan mithiamin an chamchilh mek bawk a ni. Nimahsela vawk thihna chuan rem lam a pan thei meuh chuang lo a, nitina thi zat ala tam riau bawkin a damdawi tak hi pek an la ni lo ni awm tak a ni a, hripui leng lai hi ala chawl lo riau a, an tawrhna hi an la tawrh belh zel dawn ni te pawhin a hriat. February thla tawp lam aṭanga hetianga Lungsen khuaa vawk thihna chhan hripui leng hi kan hriat ṭheuh angin April 15 niah khan African Swine Fever (ASF) a ni tih finfiah a ni tawh a, he hri leng vang hian Lungsen chauh ni lo, ram chhung hmundangte nen chuan vawk thi hi 770 a chuang tawh hial a ni. Aizawl khawpui chhungah ngei pawh tunhnai maiah khan Armed Veng leh Edenthar vengah te ngei pawh he hri vang hian chhungkaw tam tak vawk vulh lai chu an lo thih phah tawh bawk a. Hmun danga vawk thihna hi chu sawi rih loin Lungsen khaw bik hi han thlurbing ta zel ila, chhungkaw tam takte hi chuan Loan an lak hmang tea vulh an ni a, chhungkaw khatin vawk 15 te an han chan ngawt te hi chu a pawi tak zet a ni. Khaw dang zawng aiin vawk vulh hi an uar ti ila kan sawi sual kher awm lo e, CoviD hripui len hnu phei hi chuan an uar lehzualin chhungkaw tam takte hian thlawhhma lo neih aiin vawk vulh hi nitin hnaah an nei a, Farm anga buarsaihte pawh engemawzat an awm bawk a ni. A tam zawkte chuan anmahni huanah vulhin vawk In zau tak takin an nei hlawm a, In leh lo dinna atan te leh chhungkaw mamawh hrang hrang leina atan tia vulh an ni hlawm. Nimahsela chung an beiseina zawng zawng chu hetia hri lengin a man tak siah chuan a thlawn lo thei lo a, beidawng takin an awm phah ta hlawm si a! Lunglei District huamchhunga Sa rate hi July 22, 2020 khan Lunglei District Consumer’s Association aiawhte, Sa zuar Association hrang hrang hruaitute, YMA, MHIP, MUP leh MJA aiawh hruaitute nen meeting neiin Vawksa bik hi Rs. 400/- per Kg anga hralh turin ruahmanna an lo siam tawh a, hetiang hian vawiin thlengin la hralh zel a ni bawk a. Lungsen khua ngei pawh hian Lunglei lama an hralh ber ṭhin avangin a pumin vawk hi an phur chho reng ṭhin a, hetianga hri leng vanga vawk thihna lo thleng ta hi a thinrimthlak viau a ni. Hralh theih maitheih tawh tur vawk lian tha tak takte chu ui tak chunga phum alo ngai ta zawk mai thin si a, a lungchhiatthlak takzet a, an tawrhna hi a namai lo viau a ni. Sorkar lama claim dawn pawhin dan leh dun lamah chuan Kg khat hi Rs. 23/- emaw chauh a lo ni awm a, an tan chuan eng tham mah a ni bawk si loin Rs. 30000/- man vel vawk nei tan pawh Rs. 2500/- vel emaw chauh a ni si a, buaipui hahman a awm si lo. Hmangaihtu mai niloa khawngaihtu an mamawh hle mai. Lungsen khawtlang hruaitute hian a tir aṭang khan mumal takin vawk thite hi an chhinchhiah thlap thlap zel a, vawk len zawng pawh Inches angin an chhinchhiah vek zel a ni. Hetianga mumal taka an chhinchhiahna an neih vang hian kan sorkar lam pawhin tanpuina pe dawn pawh nisela harsatna a awm ka ring lem lo a, a dawngtu tan ngei pawh sawi sual a harin ka ring. Amaherawhchu tuna dan leh dun kan neihsa anga Kg. khata Rs. 23/- emaw chauha claim-na hi chu a beihtham em vangin Lunglei DC hoa an thuchhuak ang emaw tal hian ruahmanna awm thei sela a duhawm viau a ni. Hetiang a nih loh pawhin kawng dang tala chhawmdawlna hi pek ni hlawm sela, a nih loh chuan Lungsen khaw tan hian rahbi rem rah lehna turin hun a duh rei lutuk palh theiin nu leh pa tam tak tan beidawnna nasa zawk a thlen palh ang tih pawh hlauhawm tak a ni. Ṭhenkhatte tan phei chuan zan mut a har phah hlein a rinawm a, thenkhatte tan chuan a nghawng tur hi ana viau thei bawk ang. Lungsen khua hi khaw taima tak an niin khawlai pawh an enkawl thain a fai em em reng a, khawlaiah tlangval leng mai mai hmuh tur an awm loin hnathawkin an liam vek zel a, an nulate ngei pawh inti nalha leng mai mai an awm ngai lo. Tun hma atang daih tawha inzirtirna tha tak an neih vang a nih ngei a rinawm a, khaw chhuanawm tak an ni. Tuna ASF hripui lengin an ran vulh ber Vawk a suat vak mai ang hi ṭum dangah an la tawng ngai loh avangin an khawngaihthlakawm takzet a, kan sorkar lam aṭang pawh hian chhawmdawlna pek ngei theih nise. Khawtlang hruaitute nen ruahmanna siamin chhungkaw tinin an tawrhna phuhru turin chhawmdawlna siam nisela, eizawnna tur kawng siamsakin bul tan sak thei sela duhawm hle. Chhungkua, naupangte nen nakin lawka hlim taka an awmna tur atana an lo beisei rauh rauh hetia hri leng vanga an han chan ta mai hi a nat tur zia hi ngaihtuah thiam theih pawh a ni kher lo ang. Nu leh pa chan chang taka sorkarin hma a lakpui hi thil tih tur tak pawh a ni awm e.