PU DUHA BAWK

Mahmuaka Chhakchhuak May 2, 2021 Sept. 22, 2020 (Thawhlehni)-a Rulling MLA 12 laiin Pu Lalduhoma chu Assembly House chhunga awm ve tlak a ni lo tia dan an ngaih pawimawh avangin hekna an thehluh chu ni 66 liam hnuah, Nov. 27, 2020 chuan Assembly Speaker-in thuthlukna siam fel tain Pu Lalduhoma chu MLA atangin chawlhtir alo ni ta a ni. Chutia Serchhip bial chu bialtu MLA nei lo a lo nih avangin April 17, 2021niah chuan By Election neih leh alo ni ta a. Dan ngaih pawimawh vanga ban tak Pu Lalduhoma ngei pawh chuan MLA nih leh tumin a chuh leh a, amah nen mi 6 te chuan Serchhip bial MLA nih tumin inthlanna neih a ni. May 2, 2021 (Pathianni) ah result puan a niin mitinin result hi kan hre chak hlawm viau pawhin a hriat a, TV lamah Live-a pek a nih bakah YouTube lamah a thlir theih bawk avangin mahni awmhmun atanga thlir kan tam hlein a rinawm a. Tichuan, Round khatna an han chhiar zawhah chuan Pu Lalduhoma chuan vote 2030 hmuin hma a hruai a, Round hnihnaah pawh chuan vote 2045 hmu lehin hma a hruai leh bawk a. Round khatna leh round hnihnaah hian amah hnaih bertu MNF Official Candidate Pu Vanlalzawma chu vote 1,378 laiin a hneh a ni. Chutiang zel chuan Round thumnaah pawh chuan Pu Lalduhoma hian amah hnaih bertu Pu Vanlalzawma hi vote 719 (2094 – 1375) in a hneh leh a, Round 1-3 ah hian Pu Duha hian vote 2113 in hma a hruai a ni. Postal Bollotah pawh ZPM Candidate hian vote 74 hmuin MNF Candidate hian vote 58 a hmu bawk a. Round 4 ah pawh Pu Duha hian vote 1942 hmuin Pu Zawma’n 1103 a hmu bawk a, vote 839 in an inthlau leh a. Round 1 – 4 thleng hian Pu Duha’n vote 2952 in chiang takin hnehna a chang a, Round 5 ah erawh Pu Zawma’n hma a hruai thungin vote hnih in chakna a chang thung a. A pumpuiah Pu Lalduhoma hian vote 2950 laia hma hruaiin hneh takin chakna a chang ta a ni. Hetianga Pu Lalduhoma’n hnehna a chang ta hi a chhan tam tak sawi tur a awm thei tho nain Serchhip bial mipuite bum theih mai mai an ni loa an puitling vang a ni. Politics hri chhia kan tih thinte ngei pawh kha tun By Electionah hian a leng nasa an ti a, sorkar hna pek tura intiamte, contract hna pekte leh sum faia inpekte ngei pawh hriat tur a awm nual a ni awm e. Nimahsela Serchhip bial chhung mipuite chuan an bial enkawltu tur atan chutianga politics hri chhia leng karah chuan rilru fim tak neiin Pu Lalduhoma chu tha berin an hria a, hneh takin an vote tling ta a ni. Hei hian Mizoram Political history ah thil danglam tak a thlen phah kan ti lo thei lo ang a, sorkarna fawng vuantu MNF tan ngei pawh thinrim hleihtheih a ni bikin a rinawm loh. Pu Lalduhoma ai hi chuan Pu Vanlazawma vote tling ta zawk sela thil pangngai tak a tih theih ngei ang a, ZPM leh Party dangte tan ngei pawh a tha nat thlak vak loh maithei. Nimahsela sawi fo angin tun By Election lo awm chhan hi mi zawng zawngin kan hai lo ang a, Sorkarna fawng vuantu lam MLA 12 te’n dan ngai pawimawh an intih vanga Assembly Speaker hnena an hek vanga Pu Lalduhoma ban a nih tak vanga lo awm a ni a. Amaherawhchu hei hi a bik takin Pu Duha lo thlang tlingtu Serchhip bial mipuite hian an pawm leh pawm loh chu tun By Election-ah hian chiang taka a hriat theih dawn avangin a result hi thil hriat chakawm tak a ni a. Heti taka hneha changa Pu Duha an han thlang tling leh hi thil ropui tak a tih theih ngei ang a, Assembly House chhunga Session lo awm leh tur pawh thil nghahhlelhawm tak bawk a ni. Chutiang bawkin MLA 12 laiin an hek avanga ban tak Pu Duha ngei pawh chu amah bantu Assembly Speaker bawkin dan ang thlapin a han la lut leh tur hi thil ropui tak a tih loh theih loh bawk ang a, Pu Duha tan phei chuan thil chakawm tak tur a niin a rinawm. A chhan chu Dan ngai pawimawh an intih vanga ban a nih hnua dan ang thlapa lakluh a han ni leh tur hi thil thlakhlelhawm tak a niin dinglam hawia han nuih ve hrim hrim pawh a chak viau maithei a. Chutiang zelin Session neih leh hunah ngei pawh Pu Duha tan phei chuan a nuam lehzual maithei. Eng topic ah pawh a tawngkam ngaihthlak a nih zawk phah lehzual thei a, Treasury bench lam tan pawh a hnawksak lehzual maithei a ni. Serchhip By Election hi zoram pum leh ram pawn lam atang pawha ngaihven hlawh tak a niin, a result a zir hian politics lama kan sukthlek zel dan tur te pawh a ngaihruat theih deuh bawk ang. Tuna Pu Duha’n hnehna a han chan tak phei hi chuan zoram politics kal zel dan tur hi thil nghahhlelhawm tak a ni thei bawk ang a. Assembly House chhunga kan Chief Minister ber pawhin kan la hriat ngai reng reng loh ‘Peace Bonus’ chungchang min han hrilhfiah chiang ta te kha Pu Duha vang a tih loh theih loh a. Topic dang dangah ngei pawh Pu Duha vanga ngaihven tak hi a awm nual bawk a, hengte avang hian sorkarna fawng chelhtu MNF Party tan ngei pawh hian fimkhur taka ram rorelna kalpui phah ngeina tur chhan pakhat a ni thei bawk ang. ZPM tan lah Pu Duha tling hi sang taka boruak invawrh theih phahna tur a ni bawk ang a, a bik takin ZPM MLA dang 6 te tan tan phei chuan ual-au takin leh inthlahrung hauh loin an ZPM colour dik tak nen an awm thei tawh ngei ang a, dan ngai pawimawhtu MLA 12 te tan pawh Speaker hnena hek leh chu awmzia a awm tawh lo maithei a ni. ZPM MLA 7 zinga a hruaitu ber Pu Lalduhoma an hek thlak hnu chu mipui lamin heti hian an lo thlang tling leh bawk si avangin dan ngaih pawimawh intih vanga hek leh ngawt chuan awmzia a awm tam lo maithei a ni. Zoram mipui tam takin Congress leh MNF duh lohna an lo lantir mek bawk avang hian ZPM tan chuan tun By Election result chhuah atang phei hi chuan campaign pawh a nuam sawt maithei a, sorkar thar pian tir duhna thawm hi tun ai hian a ring viau maithei a ni. Heng bakah hian General Election 2023 lo awm tur pawh a hril chhoin a rinawm bawk a, ZPM tan hian kawl a eng chho viau maithei e.