REV. LALHMINGCHHUANGA NGHILHLOHNAN

Mahmuaka Chhakchhuak May 29, 2021 Nizan ka menrei deuh avangin tukin chu ka thawh hun pangngaiah tho loin dar 7;00 dawnah ka tho a, thingpui in pahin ka Cell Phone hmang chuan news chi hrang hrang ka han bih kual nghal zung zung a, tukin dar 4;00 vela Rev. Lalhmingchhuanga Zawngte boral thu ka han hre thut chu min thawng hle mai. CoviD vanga natna tuarin hun rei tawh tak damlohna khumah a mu tawh a, zofate hian a tan van Pathian ngei pawh vawi tam tak kan auh phah tawh bawkin dam takin damdawiin chhuahsan leh thei se tiin tidamtu Pathian hnenah kan thlen mawlh mawlh hlawm a. Nimahsela, kan beisei leh duh anga rorel loin chunglama mite chuan an chairman Lalber hoa rorelna neiin an kianga cheng tawh zawk turin an lo duh nge ni, a nupui leh fanaute mai bakah a rawngbawlpui leh amah ngaina tu zawng zawngte remtihna tel miah loin an lo hruai ta zawk a. Rev. Lalhmingchhuanga Zawngte hi hmaihmaah kan la inhmu hauh lo a, phone hmang pawhin kan la inbe hek lo. Delhi lamah rawngbawlin a awm tih ka hria a, a awmna kohhran ber pawh nimin lawkah a ni ka hriat chauh ni. A mimal nun lam hriatpui ka nei vak lo a, hriatloh lamah In ropui tak a lo neih pawh ka ring lem lo a, Thlam ropui tak phei chu a neih ka ring lo lehzual. Chutiang taka hre chiang lo ka ni chung chuan hmuh theih loh lama a thinlung put hmang erawh zuk hre ve ruak ruak dawnin ka inhria a. Mi piangthar tha tak a ni tih ka hria a, Sakhaw rawngbawltu zingah chuan piangthar tha ber pawh a ni hial mai thei e. Thusawi thiam tak ni bawkin ka hria a, a video clip tawite – Kohhran hi pawl nge mihring? Tih thu a sawifiahna ka ngaihthlak atangin mi ril tak niin ka hre bawk. Tukin thingpui in zawhah kan In lamah hawng turin lirthei chungah kan nupain kan chuang a, kan nu hnenah chuan nizanah khan, tukin lam zawk a ni tawh hial zawk a, mumang mak danglam tak hi ka nei a, Thlawhnaa thlawh tum hian ka lo inbuatsaihin Airport chu hnai te a ni nain a hla thei ang ber hian kan lo kual kan lo kual a, a tawpah chuan kan kiang hnai lawk chu a lo niin chuta kal kan tum leh chuan Mitthi kuang hian min lo dal tlat mai a, kan hel lawk thei lo a, rei tak min lo dan buai avang chuan thlawhna tum hmun pawh thleng hman lo chuan ka lo harh hlawl mai a tiin ka sawi a. A ni chuan Rev. Lalhmingchhuanga hi ilo hmulawk a ni lawng maw le a ti mai a, kei pawh chuan mak ka ti hle a ni. In kan thlen hnu chuan engmah dang ti thei loin inchhungah ka vei ka vei a, ka chhungkhat laina hnai tak sun ang mai hian sun tak tein ka sun a, ka inrin loh lai hian ka mittui chu alo far leh zauh thin a, heti taka ka hmelhriat pawh nilo, a thuziak ka chhiar vanga ka hriat ve mai mai ka han sun ta mai chu ka inthiam lo dawn dawn a. Nimahsela ka inthiam lo hran lem lo, nangni ngei pawhin mittui luang zawih zawihin lo sun ve pawh ni ula, thenkhatte phei chuan a pualin hunserh lo hmang pawh nisela a phu ngawih ngawih hi ka ti a, Pathianin mizo hmeichhe chhul hmanga ‘mizo naupang’ ni ve tura a lo pianchhuah tir leh kum 55 lai kan hnena a cheng hi thil thlawnpek kan dawn zinga ropui ber pakhat a tling hial awm e. Zofate zingah hian amah ang hi awm tak ang maw tia ka rilruin a dap kual ruai ruai nghal a, ka hriat mai lohna chuan ka mittui tla chu a rawn belhchhah tir phah a. Awmngaihna ka hre mai lo a, ka lehkhabu remna atangin SAVUN KAWRFUAL bu chu ka han phawrh a, ka chul ka chul ta ringawt mai a, a chhungthu lam erawh chhiar tumin ka keu azeng pawh ni chuanglo chuan ka hum reng ringawt a. Heti taka ka sun (sun bik min lo ti lo ula) hi mak ka inti a, zahthlak dawn dawn tein ka hre bawk a, a chanchin sawi tur lah chu ka hre lo nasa mai bawk si a, tukin inchhunga ka leng lo, tuala ka vei kual chuan kan thenawm nu, kum upa tawh lam tak hnenah hian ‘Rev. Lalhmingchhuanga Zawngte kan han chan ta ngawt mai chu ka va ui tak em aw!’ ka ti a, a ni chuan ‘kan pastorte thi hi chu a uihawm ngawt mai’ alo ti tawngkam tha mai a. A tawngkam lochhuahna thinlung put hmang chu ka hriatthiam em em rualin pastor thi zawng zawngte hi chu an lo uihawm vek kher hian ka ring lem loin keimah ngei pawh hian kutchang thleh ngauh ngauh tham hi an rawngbawl lai ngeia an awmna kohhran tana hnawksak lek lek zawk hi sawi tur ka lo hre ve a. Pastor an nih hnu pawha pianthar mamawh tak tak te hi ka thinlungah langsar takin an hming a rawn lang nghal zut zut bawk a. Rev. Lalhmingchhuanga Zawngte erawh hi chu sakhaw rawngbawltu zingah ngei pawh ram leh hnam tana auchhuak tam a nih avang hian zofate hian chan nasa ka inti lo thei lo a ni. Harhna ropui takte leh Camping leh Crusade nasa taka pian tharnate pawhin kan ram a siam tha thei meuh lo tih a hmuh avanga thil dik lo lian tak a awm thu a hria a. A chhan zawnchhuah a, a siam thatna kawng dap chu tih makmawh niin a hria a ni. Hetianga a veina avang hian zan tam tak a mut theih loh phah ngeiin a rinawm a, zoram dung leh vang thlir chungin kan zavai atan SAVUN KAWRFUAL chu sin theih turin a rawn puah tan tain kum 2016 chuan a bu pumin a rawn puah zo thei ta a. Thenkhatte chuan a pastor tawngkam lo an ti a, thenkhatte thung chuan pastor sawi tur dik tak a ni an ti bawk a, amaherawhchu kan ngainatna mai ni loin leh kan duhna satliah mai chu duhtawk loin Mizoram Academy of Letters chuan Book of the Year 2017 ah hial an lo thlang ta a. He Lehkhabu chhunga thu awmte hi sawi chakawm tak tak a awm, bung khat atanga bung tawp ber thleng hian ‘helai chu a tha hle mai’ tih tur hi phek tinah underline ka nei a, hetia mahni awmhmuna a thuziak kan lo duh em em hi duhkhawp loa amah ngei hian zoram chhim leh hmarah hian nasa zawkin han tlangau zel se tia duhthu ka lo sam mek laia a dam lo tih thu kan han hria a, tukina a boral thu kan han hre leh zel chu insum a har takzet a ni.