TAWNGTAINA – 2

Mahmuaka Chhakchhuak May 5, 2021 Bible chang thlan: Sam 46;1 Pathian chu kan inhumhimna leh kan chakna, mangan laia tanpui vartu hnai reng a ni. Sam 91;3 Ani chuan thang kamtu thang lakah leh Hri tha lo lakah chuan a chhanhim dawn che a ni. Aw ka Pathian, i hnena ka ṭawngṭaina hi khawngaih takin min lo ngaihthlaksak la, ka lamah hian i beng lo chhi ang che. I hnen ata khawngaihna leh zahngaihna ka rawn dilna hian i thinlungah hmun chang sela i humhimna mamawhtu i mite authawm hi min lo ngaihthlaksak hram ang che. Kan ramah kum 2020 March thla aṭangin CoviD hripuiin min nuai ṭan a, nunphung pangngai pawha nun hmang thei loin mitin kan buai a. Kan nitin eizawnna kawng pawh zawh hleithei loin hun kan hmangin hlau leh khurin hun kan lo hmang zo ta a. Tun hma lama mahni buai buaia kan buai ṭhinna zawng zawngte kha tunah chuan Hripui lengin a chhilh bo ta vekin engkim maiah hripui leng vangin kan buai phah ta vek mai. Huaisen leh luhlul chhuahin awmzia a awm lo a, ban tha chakna hmanga hneh theih ngawt lah a ni bawk si lo. Tunah ngat phei chuan kan ram chhungah ngei pawh kan hmangaih tak tak mi 17 laite chuan an nunna an lo chan phah ta hial hi rapthlak kan tiin pawi kan ti a, hrehawm kan ti ngawih ngawih a ni. Natna dang vang nunna chan hi chu kan hrethiam viau laiin he hripui vanga nunna hloh erawh dan pangngai anga invui a theih bawk si loh avangin leh hmel pawh hmuh theih loh tura tuam phui tlak a ngai tak bawk si avangin thin hi a rim bik tlat a ni. Hmanah Israel fate Aigupta ram aṭanga Kanaan pana i hruaina kawngah khan hremna chi hrang hrang hmangin i hrem thu kan hria a, anni ngei pawh khan phunnawina tur an zawng reng bawk a, nimahsela Kanaan ram nuam tak chu i hruai thleng tho ang khan vawiin hunah ngei pawh hian he hripui vanga kan buaina leh harsatna zawng zawng hi min hremna a nih phei chu kan ring hauh lo nain alo nih mial pawhin khawngaih takin duhtawk tawhin kan fellohna zawng zawngah min ngaidam ang che. Keini chuan i hremna dawng zo turin anni angin kan chhel zo ve si lo a, i thununna a nih pawhin hei aia nasa hi chuan kan chungah hian thlen tir tawh lo hram turin kan ngen a che. Rinna kawngah ngei pawh mi chaklo kan ni a, tluk leh din fawm takmeuh meuha kal kan niin mahni leh mahni pawh inringhlel chunga rawngbawlna hna thawk tawk tawk kan niin sakhuana kawngah ngei pawh belhchian leh fiah ngam loh khawpa mi derdep kan ni si a. Kan ram hruaitute ngei pawh hi rinna kawngah mi chhuanawm tak an ni bik hauh lo a, Pathiannia inkhawm ve mai mai leh a hming maia Nunna bu (Bible) zakzeh ve chauh an ni. Thah thiang lo ang hial tura zahawmin inchei thin mahsela an chhungril nun erawh thlarau lama tuihalna nasa tak nei leh tuihalna tih pawh la inhre lote an ni thung a, an tawngtaina ngei pawh ring zo lo te an ni hlawm si. Mahni thusawi ngei ngei pawh umphak lo mite an ni a, rinna kawnga midang hruai tur phei chuan rei tak zirtir hmasak phawt ngai te an ni ngei ang. Hengte vang hian nangin khawngaih takin kan awmdan tur engkim min relfel sakna hi hre vek lo mah ila kan tana tha tur nia ruahmanna i siam hi kan hriat phak tawk turin min hrilhfiah sak thin ang che. Chuti lo chu mi chak lo leh ṭawmkai lo mai kan ni si a, nang ring zo lo hian kan lo tlu leh mai palh ang e. Lal Davida ngeiin ‘Pathian chu kan inhumhimna leh kan chakna, mangan laia tanpui vartu hnai reng a ni’ a tih che avang hian beidawng tak leh tlangnel tak bawk siin i hnenah kan rawn tlulut ve tawp mai a ni. I humhimna kan mamawh takzet a, kan ram hruaitute ngei ngei pawhin hre hripui laka mipui kan him tawh loh dante min hrilh mawlh mawlh a, sorkar hruaitu ber atanga mi te ber thlengin kan buai zo ta a nih hi. Aw Lalpa, khawngaih takin kan authawm hi min lo ngaihthlaksak la, kan lamah i beng lo dawh leh ang che. Damna kan zawng a, mihring mihrinna hmanga damdawi an siamte lah chuan kan thlaphanna min hnem zo chuang si loin tunah phei chuan a damdawi ngei pawh ban mai tur a vang tawh lehnghal a, he hripui lak atanga dam khawchhuak zo tur hian nangmah chauh a ni innghahna kan neih a, nangmah chauh a ni kan damna chu. I mite hi min han thlir la, rinna kawngah ngei pawh tluk leh din fawm chunga kal ve tawk tawk chauh kan ni a, chhuan tur engmah reng kan nei lo. I lakah ngat phei chuan saruak leh inhawng sa mai kan ni a, nang, engkim hmu tlang vektu ngei phei chuan hmuh loh engmah i nei lo ang. Kan saruak zia chauh niloin kan derdep ziate leh mahni hlawhfate hnena sum leh pai dil ngai khawpa kan pachhiat ziate hi i lakah chuan zep rual a awm si lo. Aw Khawngaihtu Pathian, kan sual ang angin min thungrul suh la, i mite chunga khawngaihna chunga khawngaih lehchhawng i lantir leh thin ang khan kan chungah hian i khawngaihna ropui tak chu lantir leh hram ang che. Kan thlarau nun chhandamna mai bakah kan tisa ngei pawh hi he hripui leng lakah hian min chhanhim kan duhin kan ngen takmeuh che a ni. Nang chuan engkim i ti thei a, keimahni ngei pawh awm lo atan min din a ni a, khawvel leh a chhunga awm zawng zawngte siamtu i nih avangin he hripui ngei pawh hi i duh chuan min lakkian sak thei tih kan hria a, nunna chan kan awm belh tawh lohna tur chauh ni loin tuna ICU hmuna enkawl zawng zawng leh Ventilator hman tir hial ngaia awmte, damdawi lam thiamte enkawlna hnuai awm zawng zawngte damna atan leh nun pangngaia kan nun leh theihna turin i hmaa bawkkhup chungin kan han ngen a che.