THIS IS MIZORAM – XXI

Mahmuaka Chhakchhuak May 17, 2021 Kan ramin CoviD hripui a hmelhriat aṭangin a kum khatna chu kan lo thleng leh ta reng mai. Engtia rei nge he hripui hian min la chenchilh dawn a, engtia rei nge kan la buai phah dawnin nunna chan hi kan la awm dawn tih lah chu mihring hriatna hmanga hriat theih a ni si lo. Duhthusamah chuan kiang tawh sela, nunphung pangngai takin awm tawh ila, mitinin zalen takin hun hmang tawh ila tih chu a ni nain chunglam rorel danah duh dan lo thlen ve ngawt khan awmzia a awm tampui lo mai thei bawk a. CoviD hripuiin min nuai tirh lamah kha chuan kan boruak tawn ngai loh tawng kan ni bawk a, kan dawng sawng thiam lo hlawm viau mai nain tlem tlemin kan thiam chho ta zel a, tunah phei chuan mipui thuawi lo chu tlemte an ni tawhin a rinawm. Amaherawhchu kaihhruaina fel tak a awm erawh a ngai reng tho a, sorkar lam leh mipui lamte pawh tanrualna tha tak nena kan thawhho a ngai zel a ni. Chutih lai chuan nikum lama mipui min thlamuan a, min venghimtu tur zawk Police te hnen ngei ngei atanga ruihhlo han man tlat mai te kha chu zia lo tak a ni a, Task Force duty Badge hmanga zu lo la te pawh an awm bawk a. March 3-a Vegetable Supply Chain hnuaiah Sorkar in Serchhip atangin Rs. 58, 935/- in Thlaithar a lak pawh chu Local Level Task Force te hnenah Rs. 79, 535/- a pek chhuah leh a ni a. Hetianga an lakna aia to a Aizawl LTF a an hralhchhuah chhan hi an chhuanlam ber chu Khawlum vangin thlai a chhe nasa tih a ni (DIPR No. 107 of 2020 – 2021). Nimahsela, Serchhip atanga thlai thar lak luh te hi a chhia paih emaw hralh theih loh emaw a awm hriat zui a ni chuang lo a, Serchhip atanga rawn phurtu Driver-te hnenah a phurh man hi Serchhip lam tum ni awm tak bawk a ni. Hetih lai hian MIZOFED chuan Cheng Nuaih 3 vel a hloh mek an ti zawk a. Keini Ak zahnih hnuailam tan chuan hriatthiam a har ta riau mai. Serchhip thlaithar zuartute hian Aizawl khawpuia chengte tan man tlawm takin an rawn thawn thla a, chu chu engvanga Sorkar zawkin Rs. 20, 600/- hlep neia alo pekchhuah leh kher na chhan ni ang? In luahtu tam takte pawh chu an In luahna te chuan thla khatte thla hnihte In luahman an laksak lo a, dawr tamtakte ngei pawh luah man dawng duh lo sawi tur an awm nual bawk a nih kha. Khang mite kha kan fak a, entawntlak kan tiin kan chhuang em em hlawm a, kristian rawngbawltu tih tur tak a ni ti tein kan sawi a ni. Chutih lai erawh chuan lehlamah harsatna tawk an lo awm ve tho bawk a, kan ṭhianpa pakhat pawh thla hnih lai In luahna man a pe thei tawh lo a, a hnathawhna lamah thla thum lai a hlawh ala bawk si lo a, a buai hle a ni awm a, a mangang chuan a hnathawhna chu a bansanin hmun dangah nitin inhlawhin a kal ta ngawt mai a ni awm e. A hnathawhnate lah chuan sum an harsat thu lam an sawi lo mai pawh ni loin a pung awmin sum an puk tir thei reng bawk si a, hriatthiam a har ngawt mai. Heta an hotupa ber lah chu an kohhranah Puitling Sunday School Zirtirtu a ni bawk ni awm tak a ni a, a nunah entawn tur a tam vak lo mai thei a, Vanram kai tum theuh theuhte thiltih dan hi alo in ang lo hlawm thin ngei mai! Chutianga boruak hrang hrangin CoviD hripui len tantirh lamah chuan min chim buai a, kan sorkar ngei pawhin inring mumal hman loin a tlachawpin ruahmanna a siam mai thin a ni ber a, Lockdown ngei pawh inrinlawkna awm hman loin kan puang thut thut a nih kha. CoviD beihletna atan chuan kan sorkarin sum bawm lian tak a hung bawk a, chu chu a hmingah Chief Minister Relief Fund (CMRF) tih a ni. Chutah chuan pawl leh mi chi hrang hrangin an remchan ang tawk sum an thawhkhawm a, kan ram hruaitu thlante ngei pawhin bituk awmtein an chhung lut bawk a. A tir lama Health Minister hnena reilote kan chhunglut kha ti tawpa CMRF ah kan inburbun ta kha thil tha tak niin a hriat a. Sorkai laipui atanga sum rawn kal a awm bawkin NEC lam atanga rawn kal a awm bawk a, amaherawhchu kan sum bawma tlingkhawm chu alo tam ta deuh nge ni a hman chhuah lehna lam pawh sawi sep a lo kai ta hial a, a pawi ngawt mai. Chung vangte pawh chu a ni nge ni vawiin lamah chuan CMRF a chhunglut tawh loin LLTF hnena sum thahnemtham tak pe sawi tur an lo awm ta zauh zauh a. Chutih mek laiin PAHOSS sum leh pai dawngtu tur mi 21 lai te han inhnukdawk leh ta pawh hi thil lawmawm tak a ni awm e. Sawi tur tam tak a awm ang a, he CoviD hripui hi mimal do hneh chi a ni lo a, sorkar tan ngei pawh mipui thlawpna tel lo chu do hneh chi a ni hek lo. Kan zavai tanrualna tha tak hmanga do hneh chi a ni a, tuna mipuia lo taihdarh kan tih ngei pawh hi kan tanrual that loh vang ni ngeiin a hriat a. Kan sorkar lam ngei pawh hian mipui tana tha tur leh mipui tana phurrit lo zawnga ruahmanna a siam fo a pawimawh a, chutih laiin Opposition lam te pawhin sorkar khalh ngil zawk tura thu a neih fo a pawimawh ang. An tlakhawlhna lam leh fellohna lam ringawt a sawi reng chuan a intih chawlawl ve theih bawk avangin mipuite tana tha tur ang bera thu leh hla an neih tawn a pawimawh a ni. An zarzo ber leh a tuartu ber mipuite hian an thlazar hnuai him leh lawm thlamuang taka awm hi an duh vek avangin thu lawilo mai mai sawi fo lo turin in veng tawn bawkin a fawng vuantu lam ngei pawhin mipui huap zo ber tur angin ruahmanna siamin ke pen zel sela he CoviD hripui leng hian hun rei tak chhung min la chimbuai reng mahsela phunnawi lo leh ngaihtha taka kan awm mai bakah thlamuang takin kan awm vek thei ngei ang.