CHHIM BIAL MLA LO NI TA ILA

Mahmuaka Chhakchhuak

June 23, 2021

Chhim bial huamchhung, a bik takin Lunglei khawpui chhunga MLA, MLA-ah pawh Sorkarna fawng chelhtu MNF Party Official Candidate ni thei ngat ni ila chuan hripui len tantirh, 2020 March thla atang khan Lunglei District Hospital-a Rt-PCR khawl dah tur hian nasa takin ka nawr daih tawh a, ka sum neiin a tlin lo a nih pawhin MLA Fund hmanga neih dan ka ngaihtuah ang a, chu pawh rem lohna alo la awm zel a nih chuan Chhimbial mipuite hnenah phur takin sum khawn dan tur ka ngaituah ngei ang. Chutianga theihtawpa ngaihtuahna kan hman chuan First Wave ah khan nei hman lo pawh ni ila Second Wave ah chuan kan nei hman tawh ngei ang a, vawiin angah hi chuan Tlabung atangte, Chawngte leh Muallianpui khua atangtein CoviD positive leh ‘tive loh an rawn in entir tawh ang a, Lunglei khawpui ngei pawhin nasa takin kan buai loh phah bawk ngei ang. 

Pu Zodintluanga khan khawl hi min lo pek khalh pawh nisela mipui mamawhna a san tawh bawk si avangin ka buaipui chhunzawm ngei ngei ang a, mutmawh hnarmawhah neiin hna dang chawlh phah hialin ka buaipui ang a, Expert Teamte’n Civil Hospital room ruak chei theiha hman mai theih tur anga an sawi hi MLA Fund atangin emaw mipui thawhkhawm hmangin emaw a cheina hna thawh vat vat theihna turin ruahmanna ka siam ang a, kan mamawh angin sum leh pain min lo daih lo a nih pawhin amah Pu Zodintluanga hnenah ngei pawh ka dil hreh hauh lo ang. Chhim bial MLA a ni ve tho bakah mipui rawngbawl tura inpe a ni bawk a, a tlanchhiat ka ring bawk hek lo a ni. 

Health Minister ngei pawhin March 2020 daih tawhah khan chhim lam District Pali-te tan Rt-PCR Laboratory din alo tiam tawh a, nimahsela hei kum khat hnuah pawh hmalakna mumal ala awm chuang lo a, hengte hi MLA ni ta ila chuan ka bawhzui ngei ang a, Health Minister leh Chief Minister Office hi ka kal zut ang a, ‘he khawl pawimawh tak hi hman theiha min puitlin sak lo a nih chuan MLA atang hian ka bang ang’ ti khawpin ka nawr ang a, Mizoram sorkarin Rt-PCR khawl District Hospital Lungleia bunna tur enfiah tura expert: Dr. Lalhlenmawia, HoD Department of Pharmacy RIPANS, Prof Zothanzama Asst. Professor Department of Environmental Sciences, MZU, Dr Vanramliana Asst. Professor, Department of Zoology, Pachhunga University College te Lungleiah tirin June 15, 2020 ah a hmunah enfiah a, District Hospital Lungleia room ruak pathum awm chu RT-PCR Lab. dinna tlaka an lo ngaih tawh hi puitlin ngei turin ka theihna zawng zawng hmangin ka nawr ang. Chumi hnu lawk, June 26, 2020 a Lunglei Civil Hospital-a Rt-PCR khawl Opposition MLA rawn dah ngei pawh hi a neitu chan chang takin lawm takin ka lo dawngsawng ang. 

Nimahsela harsatna neuh neuh a awm ta si a, kan beisei anga thil a kal ta si lohah chuan vawiin thlengin kan mamawh ngawih ngawih chu kan la nei thei bawk si lo a. CM leh Health Minister Office lama theihtawpa kan lo buaipuina chuan rah tha chhuah kher lo mahsela beidawng duh chuang loin ka nawr zel tho ang a, ka insangphek zual sauh ang. Chutianga theihtawpa kan beihna avang chuan hmasawn phahna a nei dawn lo takngiala ngaih a nih hnuah chauh Court lam hi sawi rik a ni ang a, mipui leh Pathian lakah ngei pawh thiam changah ka in ngai ve thei tawh ang. 

Nimahsela hetiang ngaihtuahna hi tuna kan MLA te zingah hian nei an awm lo nge ni a, an lo awm a nih pawhin an ti lang ngam hauh chuang lo chu a nih si hi. Mipui aiawha ram rawngbawltu an nihna hi Party ngaihdana intukluhnan an hman phah ta zawk em ni tih tur a ni a. Mipui tana tha tura ngaihtuahna hmang loin party hruaitute ngaihdan tawmpui thei turin an thinlung an hmang ta zawk em ni tih tur a ni si a nih hi. Hei vang hian mipui rawngbawltu anga ngaih theih an ni ngai lo ang a, MLA niin mipui thlan tlin ni ngei mahsela mipui rawngbawltu ni loin Party tana rawngbawltu angah ngaih an ni kumkhua dawn tawh zawk a nih hi. Hetianga hripui vanga thih leh dam kara leng mipuite mamawh ngawih ngawih neihna atan pawha vawikhat pawh mualpho leh huat tawk ngam loa hmaiphih nan chauha engemaw sepsel tete chauh hmalakna nei thin ram rawngbawltu niin kan hre reng tawh dawn bawk a nih hi. A mamawh tute hi Opposition mipuite hlir nisela chuan ala hriatthiam theih deuh ang a, chutiang pawh niloin anmahni party mi leh sa, anmahni vote tlingtute ngei ngei pawhin an mamawh em em a ni bawk site hlei hlei hi lungawih a harna chu a ni. 

Tuna Court lama buaipui alo ngai ta te hi Lunglei khawpui chhunga MLA ni ila chuan ka zak ngawt ang a, ti lo turin nasa takin ka nawr ngei ang. Mizoram Sorkar ngei pawhin thu chhuah siamin 7th May, 2021 ah pawh khan Rr-PCR khawl hi Civil Hospital ah dah theih a ni tih a chiang a. Chuti chunga Rr-PCR Laboratory hi politics hmanrua ang mai a ngaih a ni ta hi mawhphurhna lain a tihreh dan ka zawng ngei ang. Tuna Court-in Lungleia CoviD sample test-na tur Rt-PCR khawl pek a nih ațanga kum khat chuang a nih hnu pawha Mizoram sorkar-in a hmang  duh lo hrethiam loa mak a ti phei hi chu zahthlak takah ka ngai ang a, Assembly Speaker hnenah MLA atanga banna ka thehluh phah ngei ang. NEC lama Rs. 7.8 Crores dil te leh DoNER lama DPR buaipui te pawh hi inbumna maiah ngaiin ka auchhuak ang a, hetiang sum hi dawng lo mah ila Lunglei Civil Hospital-ah hian Rt-PCR Laboratory hi hman theih turin kan buatsaih thei tho tiin kan mamawh lo ka ti ngei ang. MLA Fund atangin a puitlin theihna tur sum hman a rem lo a nih pawhin a puitlin theihna turin bawm ka siam ngei ang a, keimah ngeiin ka khawn bawk ang. 

 

Chutianga kan theihtawpa hma kan lakna chuan rah a chhuah ngei pawhin a rinawm a, Dan ngaih pawimawh vang tia MLA pakhat hekna vanga mipuiin min demna zawng zawngte pawh a chhilh bo zo ngeiin a rinawm a, MLA atangin ka lo bang ta a nih pawhin Chhim bial huamchhunga khawi lai Assembly Constituency-ah pawh ka tan din leh a huphurhawm loh phah ngeiin a rinawm bawk.