I DAM EM?

Mahmuaka Chhakchhuak 

May 30, 20 

 I dam em? Tih thu hi a tawi viau nain a pawimawh viau mai. Mizo zingah phei chuan ‘I dam em?’ kan tih hian ‘dam e’ ti chung reng hian kan dam lo a, ‘ka ṭha e’ ti chung rengin kan na si a nih hi. Hmanni lawkah khan kan thenawm hnai takah hian Cancer vanga natna khuma mu reng hi a awm a, hla deuh hlek atanga kan in bul vel rawn kal pel ziah mi pakhat hian ‘in tha em?’ tiin a rawn zawt ziah thin a, anni pawh chuan ‘tha e’ tiin an lo chhang mai thin a, nimahsela Cancer vanga khum beta mu reng chu a thi ta hlauh mai a, chu pa bawk chuan rawn kal lehin ‘tinge in tha em, ka tih che u in tha e in ti mai ṭhin si a, hei a boral si hi’ tiin ruang chungah chhuahchhal ang deuh hian a rawn sawi a, a hrilhhaithlak duh viau awm e.

Hetiang deuh hian keimahni ngei pawh hi ṭawngkama dam e ti reng chung hian kan thinlung lam erawh a na fo thin a, ka tha e ti chung reng hian natna kan tuar thin a ni. Pathianthu (II Lalte 4;26ff)ah pawh hetiang thu hi kan hmu a, Sunam nu chuan a fapa thihna avangin Zawlnei Elisa hnenah a rawn kal a, chhiahhlawh Gehazia chuan a lo dawngsawng hmasa a, Sunam nu hnenah chuan ‘I dam em le? I pasal a dam em? Naupang kha a dam em? Tiin alo zawt hmasa a, Sunam nu chuan chhiahhlawh hnenah chuan ‘Dam e’ tia a chhan hnu lawkah chuan zawlnei hnenah a fapa thih thu a sawi leh si a nih kha. Hripui leng rapthlak takin nasa taka kan nunphung min tihbuai lai phei hi chuan ‘I dam em?’ tih hi ral hlaa mi kan biakna ṭawngkam hmasa ber a ni hial awm e. 

Hripuiin min luhchilh tawhin nitin hlauthawng reng rengin hun kan hmang a ni a, kan hnathawh ngei pawh thawk pangngai thei loin Inah kan inkhung chawrh chawrh mai lai te hian ‘I dam em?’ tih hi kan dawn tam ber pawh a ni hialin a rinawm a ni. A ni chiah a, CoviD hripui hrang mek hian awlsam takin min kai mai theih avang hian kan fimkhur tlangin thenawm hnai ngei pawh inlen pawh ngam loin kan inkhung tlawk tlawk a, naupang tan phei chuan hrehawm deuh tur hi a ni. Nimahsela hei hi a himna ber niin kan hre bawk si a, duhin duh lo mah ila hetianga inkhung hi kan zavai tan a that lat bawk si. Chanchin thar kan han hriat te pawh chu hri kai thar te leh a khat tawka nunna chan awm thute a han ni tlat rihte hian dam hlutzia min hriattir mawlh sela a duhawm hle a ni. Dam ringawt kha a hlu a ni lo a, midang tana thil tha tihte, chhungkaw tana thil tangkai tihte leh mahni tan ngei pawha thil tha leh tangkai ti thei tura taksa dam phawt hi a tul hmasak ber si avangin he hri leng mek lakah ngei pawh hian kan him hram hram theihna atan kan inkhung rih chu a ngai si a. Natna sawi sawi te, dam loh thu sawi fo mai te hi a dawng sawngtu tan a lo ninawm hma duh khawp mai bawk a, hruaitu nihna chanvo chelh chin tan phei chuan sawi hauh loh chu thil tha zawk a ni mai thei a, natna pai reng chunga dam hmel taka awm pawh a tul chang a awm thin bawk ang. Hei hi khawvel dan a ni tlat a, kan mizo hnam nunphungah phei chuan a tulna a awm zawk mah thei e. 

Kan hnam pasaltha mualliam tawhte atang pawhin zir tur tam tak kan nei thei ang a, Hnungzang khawihlipui nei reng chunga puak phur tlat Vanapate, mawng khawihli pawh chhuat (dap) awng hmanga sawr mai te, Sakei sehna avanga zawn ngai hial tawh pawha kea kal la tum tlat Khuangchera te leh mi dang dangte kha mizopa tlawmngaihna kan tih tak chu a ni. Tlawmngaihna kan tih hi hnam dangte hian a tawngkam mal ngau ngau hi chuan an nei lem lo ni awm tak a ni lehnghal a, Sap tawng chuan ‘Unselfishness, Self sacrifice, Self denial perseverance’ tih tein a sawi theih mai awm a, Hindi pawhin ‘Aatmabalidan emaw Aatmatyag’ tiin an hrilhfiah ve mai a ni awm e. Tunlaiin kum bithliah bik pawh awm hauh loin a ram pumin harsatna in ang tlang vekin kan tuar mek a, eng chen nge kan la tawrh zel dawn tih lah chu tumahin kan hre bawk si lo. 

Sorkar lam aṭangin Lockdown a ṭul a ni an tihin kan lockdown mai zel bawk a, chutih mek laiin chhuanchham awm kan hlauh leh bawk si avangin sum leh pai leh chhungkaw mamawh chi hrang hrang kan inpe kual leh bawk a. He hripui zet hi chuan kan rilru put hmang zawng zawng min phawrh chhuah vek a tum em ni tih turin sorkar atanga chhungkaw berh ber thlengin min chawk buai ta a ni ber mai. 

Midang tana thil tih ṭhat phochhuah nuam ti mi te an awm laiin midang hriat hlau tak chunga tanpuina pe chhuak an awm bawk te hi hripui leng a puh loh theih loh a ni. A ngeiawm a nia. Kan chatuan hmun thleng tura kan dam that te hlei hlei hi a pawimawh a, midang mithmuhin lo dam tha em em pawh ni ila kan chatuan hmun thleng tura kan dam chuan si loh chuan a ho viau thei ang. Building ropui tak tak neiin a thlalak ringawt pawh phochhuak ngam loin awm ila, kan lawmna a kim chuang lo ang a, mahni hlawhfate thlabi hlawh pawh pek theih loh laia ualau taka midang tanpuite ngei pawh chuan awmzia a awm hek lo ang. Midang hmuha dam a pawimawh ang bawkin kan chhungril rilru puthmang pawh a dam that a pawimawh a, kan thlarau nun ngei pawh kan dam theih nana chunglam duhzawnga nitin hun kan hman a pawimawh fo a ni. Chu damnaah chiah chuan hriselna a awm mai bakah hlimna chhiar sen loh ala awm cheu bawk si a. I dam em le?