MEETING THUCHHUAK KHA

Mahmuaka Chhakchhuak

June 24, 2021

June 24, 2021 (Ningani)-a Central YMA Committee Room-a Mizoram Kohhran Hruaitute Committee, Political Party-te (BJP, INC, MNF, ZPM, PC, ZNP) leh NGO hrang hrangte Joint Meeting nei chuan zoram mipuite tana CoviD hri leng laka kan himna atan leh chu lam hawi thil pawimawh chi hrang hrang ngaihtuahna an nei a. An thurel tihchhuah kan lo hmuhah chuan a hmasa berin Sorkarin All Party meeting koh nise an ti a, hei hi thil ṭha tak nia alan laiin tun hunah chuan a tlai tawh mah mah em tih thinlungah alo awm nghal bawk a. 2020 March thla aṭanga hripui lengin min tihbuai tawh ngaihtuah chuan tuna All Party meeting ko tur sorkar-a thu thlen chauh mai chu a tlai tawh mah mah deuh em le? 

All Party meeting neih hi thil ṭul tak nia alan laiin kan sorkar lam erawh hi chuan ṭul a ti lem lo ni awm tak a ni a, kan society ṭha tak karah hripui hi a beihletna kawnga midang thawhpui ngai a ti vak lo tihna pawh a ni thei bawk ang. Kum khat chuang midang thawhpui loin kan sorkar chuan hripui beihletna hna a thawk tawh reng bawk a, a ṭhat leh chhiat dan chu a hre tu vek kan ni awm e. Second Wave ah ngat phei chuan sorkar demna lam pawh thawm a ring hle mai a, kan ram chhunga nunna hlu tak 80 chuang chan an awm leh thla hnih aia rei kan in Lockdown chung pawha CoviD positive tlem thei chuang reng reng lo te pawh hi lu ti haitu lian tak a ni thei ang. Kum 2020 chhung zawnga kan hripui beihlet danah khan sawi tur tam tak a awm thei bawk ang a, chung zinga pawimawh ber pakhat chu CoviD beihletna atana sum bawm pakhat emaw chauh kan nei hi a ni. 

Kan sum bawm neihchhun (?) Chief Minister Relief Fund (CMRF) a sum lut leh chhuak thlirin phunnawina tam tak a awm a, vawiin thlenga felhlel la awm ni awm takin phunnawi an la awm reng bawk a. Kan Chief Minister zahawm takin nikum lama ‘hripui beihletna atan chuan sum a tam a, in duh zah zah rawn dil ula, kan lo pe zel ang che u’ tia a sawi hnu lawka sorkar hnathawkte thlabi hlawh kan han pûk sak leh ta mai bawk te, sum ngah inti reng chunga sorkar bungraw pawimawh tak tak leina atana CMRF aṭanga cheng Nuai 537.99 chuang lai mai kan han hmang te kha hrethiam lo tam tak an la awm a ni. Chutih laiin kumin 2021 chhunga sum hman tura ruahman cheng Vaibelchhe 11,330 lai awmin hriat a ni bawk a.   

A hrim hrimin he meeting kotu ber CYMA te hi kan demna lam ni lo sela a ko tu bera an tang hi an tih tur a ni chiah em tih pawh ngaihtuah tham tak a ni awm e. CYMA ber kherin Kum khat chuang hripuiin min chenchilh tawh hnua hetianga meeting a ko hi an tlai em, engatinge nikum lamah khan an lo koh tawh loh a, tuna mi tam takin hripui beihletnaa sorkar hlawhchhama an ngaih tawh hnua an koh chauh tihte pawh zawhna awm thei a ni.  Hripui leng do letna kawnga thawhho dan chungchang rel tura koh hi State Disaster Management Authority emaw a hnuai a awm, State Executive Committee (SEC) emawin ko ta sela thil awm tak tur a ni zawk em. A nih loh pawhin Medical Operation Team (MOT) in ko ta zawk sela. Amaherawhchu CYMA lamin an ko pawh hi a demawm chuang hauh loh a, Community Base Organization an nihnaah Mizoram chhunga member nghah ber an nihna avang pawhin a inhmeh thei tho ang a. Nimahsela nikum lama Assam Rifle te hnena ngaihdam dil tura lehkha an pek hnua an ni ngaihdam dilna an tlangzarh ta lem lo kha chuan CYMA pawh dem an hlawh deuh avangin sorkar lam hian rul kaw zenna atan a hmang em ni a tih theihna lai a awm thei bawk ang a, chutiang a nih loh ngat chuan CYMA hruaitute hi an fakawm ngawt ang.     

Meeting Resolution kan hmuhah hian thurel pasarih thleng tarlan a ni a, All Party meeting koh chungchang an rel chhuah bakah hian Vaccine pek chungchangte SoP leh CoviD Appropriate Behaviour zawm chungchangte hi chu thil ṭha tak a ni a. A dawt leh chiaha CoviD positive hriatchhuah zung zung theihna tur atana chak taka Test kalpui ni rawhse tih hi chu sorkar lam tan thil harsa a ni thei ang em tih ngaihtuah ngai tak a ni awm e. A chhan pawh Pu Vana of LPS in a kawmnaah khan MoT Chairman berin “Ramdom test kha a ţha lutuk a, tam tak kan han hmuh chhuah phah a. Tunah ti ta vak ila, kan hmu ţeuh ang a, a dahna tur kan nei dawn si lova, kha kha thil buaithlak deuh mai a ni. Khum hi kan nei tlem ropui si a, symptom an nei deuh zel mai bawk si a. Chuvang chuan random test chu ngai rih lovah kan ngai a ni,” a ti kha a ni a.  Hei vang hian chak taka Test kalpui ni rawh se tih hi a hlawhtlin loh mai a hlauhawma hriatna a awm thei awm e. Resolution number 4 naa Kuthnathawktute thlai tharte hi awmze neia a tihral theih dan tur sorkarin ruahmanna siam rawhse tih pawh hi thil tha tak leh tul tak a ni a, Opposition Party lam phei chuan hun rei tawh tak atanga sorkar an ngenna a ni tawh nghe nghe. 

 

A hnuai leh chiah a ‘Hri leng mek do nan hriselna kawnga kan mamawhte tha leh changtlung zawk kan neih theih nan sorkarin hma la rawh se’ tih hi chu zau takin a sawi theih bawk ang a, sorkar lam pawhin an hriatsa tho a nihna lai a awm bawk thei ang a. Hri leng vanga kan harsatna tawh mekte inchhawk zangkhai a nih theih nan, In/ dawr luah man inngaihnathiam ni se. Tin, BPL leh AAY chhungkuate Sorkar Bill hrang hrangte Sorkar-in ngaihnathiam rawh se tih pawh hi thil ṭha lutuk a ni a. Nimin lawk, 21st June, 2021-a Mizoram Sorkar chuan In leh dawr luah hawh tu te tana In leh Dawr neitu te hnena ngenna a siamsak Letter No. B.1302/ 113/ 2020-DMR/ Vol-I/ Pt-II. Secretary to the Govt. of Mizoram & Member Secretary, State Executive Committee, Govt of Mizoram atanga chhuak kan hmuh nen hian danglamna a tam loin a hriat. A bik taka BPL leh AAY chhungkuate chu Sorkar atanga Electric Bill leh Tui bill te ngaihhnathiam tura ngenna hi a danglamna awmchhun a ni mai awm e.  

 

Sorkar hian he ngenna ang hian BPL leh AAY chhungkuate bill a ngaidam emaw a ngaihhnathiam a nih chuan a lawmawm ngawt ang. Nimahsela meeting neih hma lawka sorkar lam atanga lehkha kan hmuh nen hi chuan a in ang lo hretin sorkar lam pawhin In leh dawr luah tirtute alo ngen ve chiah bawk si avang hian a hlawhtling lo mai anga a tih theih zawk mai ang em?

Resolution tawp bera ‘CoviD hrileng do hnathawktute inpekna leh Aizawl khawpui pawn atanga an thlaithar tam tak an rawn pe ṭhin hi a lawmawm kan ti hle’ tia han ziah mawl tawp mai hi a zia lo mange. Aizawl khawpui chhunga thlai thar rawn petute hian neih chuangliam rawn pe an ni bik hauh lo a, mizo tlawmngaihna an neih vang zawka phut let nei hauh loa rawn pe an ni. He thu sawiho lai erawh hi chuan hetiang lo deuhin a lawmawm dan hi an sawi ngeiin a rinawm a, a ziaktu hian a ziak mawlmang deuhah ngai mai ila a ṭha awm e.