SAVUN KAWRFUAL A HMANHMAWHTHLAK

Mahmuaka Chhakchhuak June 4, 2021 Rev. Lalhmingchhuanga Zongte lei taksa chu kan thlahliam fel chauh a ni nain a thusawi erawh chuan mipuiah nasa takin thu a sawi thung a, a dam lai ai mahin ngaihven a hlawh zawk awm mah e. Hetianga thih hnu tawh pawha thusawi nasa hi zofate zingah hian chhiar tham lek an la awmin a rinawm a, hun lo la kal zel turah hian engang takin thusawi ring zel ang maw le? Savun kawrfual a hmanhmawhthlak tih thupuia hmang meuha a thuziak hi fiah fel fai takin a rawn sawi zau a, thui lo te tea han sawizui duh lai ka nei a, thupui tenau a pek ang zulzui hian han pe ve zel bawk ila a tha ang e; Midangin min au khalh dawn takngial: Mizo mizonaa Isua lalna puang chhuak tur hian a au awm tak tak Pastor te, Upa leh Evangelist te Kohhran mi tak takte kan ngawih reng lai hian a au lo tur zawk an au tho tho dawn a, an au tan mek tawh ni hial pawhin a ngaih theih. Kan kristianna hian kan mizo hnam nunphung tam tak a rawn thiah tak avangin nunphung thara nung thiam tak tak chuang siloin kan awm mek a, kan Pathian biak danah leh kan kalphung dang dangahte ngei pawh tute emaw tih dan chu dik bik tlata hriatna kan lo neih phah a nih tak hi. Thenkhat a beidawng zawnga au an awm a, a pawl chhuak zawnga au an awm bawk a, a hleihluak zawnga au pawh an lo awm bawk zel ta a. Hei hi kristiannaa nghet lo tak mizoteah hian a zual bik em ni tih tur a ni lehnghal a. Kristianna hun leh hmun bik ruat chhungah kan kristian a, rei kan peih leh tak tak chuang si lo a, hei vang hian kan kristianna pawh hi a nghet thei lo a, kumtina piangthar kan tam ang huin kan thatpui si lo a nih hi. Kan nihna dik tak hi i kristianpui ve tawh ang u tiin au tawh ila, muangchang loa kan au nghal a ngai tawh a ni. Hleihluaknain kan sawi tur min sawi khalh dawn: Kan rama Kristianna chi rawn tuh tute khan vawiina kan awmdan ang hi an chi tuh ang kha a nih a rinawm lem loh. Kan kristianna percentage pawh a sang zawngin a thang hleithei tlat lo mai te hi a veiawm a, a vei tur berte nia ngaih kan sakhaw puithiam thenkhatte lah chuan politician-te sawi awm tak tak an lo sawi bawk si. Inti zawlnei lah kutchang thleh nghauh nghauh tham kan awm tawh bawkin anmahni thusawi thlen dik tir tum ang hrimin a kalh zawnga thu lo sawitute chu an khak ang fawk fawk bawk a. Chutiang zirtirna leh kal dan chu thenkhatte chuan dik bik tlatin an lo hre leh zel bawk avang hian kan mizo kristianna hi inbihchian kan ngai ta hle a ni. A bual-at ve lohte hian hmanhmawh taka Savun kawrfual chanchin tha kan au chhuah vat vat a hun ta hle a ni. Hnam bil theology lo ri hian min tihmanhmawh: Isua Krista lalna tur nilo thil dang kan buaipui tam ta lutuk hian kan mizo kristianna hi a chawkhnawk em ni tih tur a ni hial ta. Bible zirtirna a ni em tih pawh ngaihtuahna hmang hman miah loin zirtirna te alo awm tain Renthlei hnam ni rengte pawh an lo Juda ta hial a nih hi. Keini aia hmelah leh khawsak phung hrim hrimah pawh duhawm zawk leh awh-awm zawk an tam tehlul nen hian Mizote hi Pathian hnam thlan kan ni inti tlat pawl te an lo awm a, Pathianin Mizorama a lei lalna ram a rawn hunna tur hmun lo hualte pawh kan awm ta hial mai. Rom 10;19 ziaka ‘Chia sawi tham lohte chu hmangin ka thik tir ang che u a; Chi fing lote hmangin ka tithinur ang che u’ tih thute chu thenkhatte chuan mizo hnam tundinna a ni an lo ti bawk zel a nih hi. Kawr tin chhung khat a, tlang tin rawt hniam vek tawhtu kan Lalpa hian tumah thlei bik leh duhsak bik pawh nei chuang loin angkhat veka a Chanchin tha hmanga min kohna hi kan puanzar hmanhmawh a ngai ta. Kan thiam lo tlang theuh a ni: Kan ramah harhna vawi tam tak a thleng tawh a, kum tam tak liam tawh atanga Kelkang harhna thleng khan uar bik tak engemaw hi kan nei zel. A uar zual phei chu kohhran atangin an chhuah phah fo thin bawk a, hmun thenkhatah phei chuan harhna boruak nena inzawm rengin kohhran inthenna a thleng hial bawk thin. Hetiang vang hi em ni kohhran za chuang lai kan lo awm tak na chhan hi ni ang le. Hman kum lawka Sihal uu anga uu te, puitling pui tawh si bawnghnute pek ngai tlat ang chi te leh nimin lawka thlarau thlawk lai hmuh zawng zawng kha harhna atanga lo awm vek a ni awm si a, kan kristiannaah hian fello lai enge emaw hi chu a awm a nih ngei a rinawm. Kawrchung leh Nectie nalh tak nena rawngbawltu rawngbawlna ai hian kekawr hlim chhing a, kawrban thlep chunga rawngbawltu kan mamawh ta zawk a nih hmel. Kan ngawi mai ang maw?: Kan sakhaw inzirtir dan hi alo inan vek loh avang hian emaw kan uar zawng leh tuipui zawng alo in an vek loh avangte hian kan mizo kristianna hi pawh thenin a awm mai tur a ni lo a, zuitu tam tih vanga dika ngaih ngawt tur lah a ni hek lo. A dikna leh kan zavaia kan pawm tlan theih ngei tur chu kan Pathian Lehkhabu Thianghlim hi a ni. Hei hi kan zavaia kan pawm tlan leh dik kan tih vek a ni a, hemi atang hian Sahal kan khai tur a ni. Calvinism leh Sebellism pawh hemi atang hian kan teh tur a ni a, chutiang bawkin Thiangzau leh khurbing pawh. Hnim phum leh thlawr chungchang pawh a dik zawk hre turin he Pathian Lehkhabu bawk hi kan hmang tur a ni. Pathian thikthuchhia, pate khawlohna avanga fate hrem thintu hi hmangaihnaa khat nimahsela a thinurna kan tawng buak hma ngei hian hmangaihna talhfiak vilik chunga rawngbawlna kan neih a ngai ta a nih hi. Savun Kawrfual rawngbawlna hi chanvo sang leh zahawmte chauhin an neih tur a ni bik lo a, mitinin kan neih vek tur a nih zawk ang hian he rawngbawlna hna hi kan zavai koa innghat a ni tih hria a, naktuk nilo, vawiin atanga rawngbawlna hi kan ṭan nghal a ngai a ni.