AIRPORT THLALER

Mahmuaka Chhakchhuak

June 27, 2021

Mizorama Airport kan neih chhun Lengpui Airport chu kan ram hruaitute chuan ‘Airport Cute ber’ ni turin ruahmanna an nei mek a ni awm a, chu mi atan chuan April 2021 thleng khan cheng Nuai 7300 (Nuaih sang sarih leh za thum) teh meuh mai hman alo ni tawh bawk a ni awm e. Engzatnge sunction a nih a, engtianga ruahman nge a nih tih lam erawh chu ka hre hauh lo nain heti zat pawisa kan sen tawhna hi vawiinah ringawt pawh hian a hmuhnawm tham tawhin a rinawm. Fiamthu nge tak tak ka hre lo nain ruahmannaah hian tlang lian tak takte pawh siam chawp tur ni awm tak a ni a, kan Chief Minister zahawm takin ‘Airport Cute ber’ tia alo mitthla anga peih a nih meuh chuan Cute tak turah ngai phawt ila a tha awm e. 

 Chutih lai erawh chuan Airport Terminal kawt maia April kung puitling tawh engemawzat chu kih thluk a niin ‘Airport Cute ber’ tura ruahmannaah hian a hnawk a ni awm a. Kum 2006 vela April kung phunte chu Ui pum tia tia an lo ni tawhin mawi tak tak tein an lo par thin tawh nain kung engemawzat chu kih thluk an ni. He thu hi nimin piah lawka thleng kha a ni awm a, social media lamah chuan sawi sep sep a ni nghe nghe a. Nimahsela hmasawnna hna thawhna tur alo dipin alo hnawk pawh chu a ni mai thei a, hetia kih thluk a ni pawh hi thenkhatte rilru lo na deuhin an ui thu an sawi hlawm a. Mihring tana boruak tha pe chhuaktu an nihna leh Airport hnaih taka par mawi tak a lo chhuah thinna chu mi tam takin pawi an tihna chhan ber a ni mai thei a. Chutih rual chuan lohtheihloha kih a ngaihna te leh hmasawnna tura hnathawhna kawnga a lo hnawk avanga kih a nih tak nate han hriat erawh chuan a pawiti tu tan pawh a hriatthiam theih deuh awm e.  

Kum 1854 daih tawhah khan America President Franklin Pierce chuan Red Indian lalpa, Chief Seattle hnenah an ram leisak tuma lehkha a thawnna, Chief Seattle in a chhanletna kha a lar hle mai. Chu lehkha thawnah chuan vawiin thlenga thangtharte pawhin dik leh ril kan la tih tawngkam pakhat chu – Lei hi mihring ta ni loin mihring zawk hi lei ta a ni a. Thil zawng zawng hi thisen inzawm chhungkhat angin a inzawm tlat a. Mihring hian nunna zâi khat pawh a tah lo a, mihring zawk hi nunna zâi khat lo awm ve chu a ni chauh zawk a. Chu thil tah chu a tihbuai leh amah chu a buaichai a ni ve mai’ a tih kha a ril vawng vawng hle a ni. Lei chunga thilsiam zingah hian mihring hian thuneitu ber dinhmuna ding emaw kan intih tlatna hi he thu hian a paihthla chiang hle mai a, Pathian thilsiam dangte aia chanvo sang hret kan chan avang maia kan duh dan ang anga kan tal a, kan duha kan mak a thiang ngawt lo tih chiang taka a sawina a ni.  Vawiina kan duh dan dana kan rama nungcha awmte leh thing leh maute kan tih chereu nasat tawh ziate hi ngaihtuah chiang ila sim thei hlawm ila a duhawm hle mai.  

Hmanni lawkah khan Serchhip atangin Lungleiah kan hawng phei a, kawng tluana thinrimna tur ka hmuin ka tawng a. Kawng laih mek a niin chei that mek a ni nain kawng laitute lah chuan an duhna hmun hmuna leivung thahnemtham tak an paih reng mai te, ruahmanna fel a awm lo tih hriat taka ram ngaw thing tha tak tak an chhilh han hmuhte chuan mittui a tla thei dawn hial mai a. Chu chauh ala ni loin kan piah hla deuh taka thlai chinna atana lo vahte chu an vah chin bak hi a kang nasa em em mai bawk a, ram ngaw tha lai kang chhia hi hmun tam takah hmuh tur a awm bawk a, motor-a chuang reng chung chuan mahniin ka insawh ka insawh a. Hetiang zela kan ram neihchhun hi kan sawisak zel chuan kum 10 lo kal leh turah hian ram ngaw tha kan nei lo mai ang tih pawh hlauhawm tak a ni.  Kan tu leh fate tana ram ngawt tha hnutchhiah loa thlaler ram ro tak kan hnutchhiah zawk a nih ngat chuan min la rawn dem ang a, kan hming an sawi apiang hian an la rawn thinrim mai ang tih pawh hi hlauhawm tak bawk a ni. 

Airport kianga April par kung tha tak tak han kihte pawh chu Hamleta thawnthu ang maiin a tulnain a ur thlu ngang tawh pawh a ni mai thei a, amaherawhchu chuti pawh chu lo nisela kan thing kih takte kha a ngai rawn awh leh tura ruahmanna tha tak kan siam a nih chuan si loh chuan rilru dam a har tho mai a, awlsam taka ‘a tha alawm’ han tih liam mai chu a harsa ve deuh a ni. Kan Airport neih chhun hi kan duat a ngai hle mai a, kan theihtawk chuan kan duat theuh bawk chuan a hriat. Kan kawtchhuah neihchhun a nihna lai a awm bawk avang hian a hmun leh hma mai bakah a panna kawngte thlenga hmangaih taka kan enkawl a pawimawh hle bawk a. Chutih laia a hmun leh hma alo nawm a, alo mawi zawk theihna atana tunhma lam atanga Florist Association lamte’n an chei thin leh mawi tak taka pangpar an lo par tir thin ang hian midangte pawhin a neitu rilru pu taka kan enkawl tlan hi thil tha tak tur a ni. Tuna Airport Cute ber ni tura ruahmannaa a kiang hnaih a thing hlu tak tak kih a han ngai ta mai erawh hi chu mittui a ti tla thei dawn hial mai a, a pawi hle a ni. Aizawl khawpui laili taka Children Park Oh sorry! City Park ngei pawh hi thing awmchhunte chu rawnga cheimawi chawp te a han ngai ta mai a, sava chiar nak nak thei tura tunhma atang khan thingphun ni ta zawk sela tha tur. 

Khawvelah hian a lem aiin a tak zawk zel hi mitin thinlung damna zawk a nih tlat avangin kan ram ngaw tha leh pangpar mawi tak takte ngei pawh hi kan inchhung banga lian leh mawi taka a lem kan tar ringawt hi a tawk lo a, a tak taka ram ngaw tha leh a chhunga sava hram nauh nauh hriattur awm te hi kan lawmna ti kim bertu zawk chu a ni. Chutiang a nih loha kan thing awm ang angte kan kih thluk zel chuan kum reiloteah hian kan kawtchhuah ropui leh hlun ber –Lengpui Airport hmun ngei pawh hi thlaler ro tak ang hi ala ni mai ang a, a kiang velah chuan rawng chi hrang hranga chei hian mitin hmuhtheih turin ram ngaw hi a lemin kan la tar lo ang tih pawh sawi theih a ni loin, hei hi tunhmaa kan zoram chhunga ram ngaw lem a nih hi tia lian taka ziak tar a la ngai bawk mai ang tih pawh awl tak tur a ni.