CHIEF SECRETARY TE INBIAKNA TUR HI

Mahmuaka Chhakchhuak

July 5, 2021

Assam CM Himanta Biswa chuan chanchinbu mite a kawmnaah Mizoram leh Assam sorkarte chu ramri buai chungchangah July 9, 2021 hian New Delhi ah Chief Secretary pahnihte an inbe dawn niin a sawi a. Hei hi kan ngaichâng niin a lang a, kan ngaihven hlawm viauin a hriat bawk. Engtin tak nge an inbiak ang tih chu sawi lawk theih ni lo mahsela Mizoram Chief Secretary chuan Mizo mipui leh sorkarin kan duh leh beisei ber leh kan ram chin nia kan pawm bawk - 1875 Inner Line hi a zuk sawi rik ngei beisei a ni. Nimahsela hei hian Assam state chhungah thui taka hmun a zuk luah bawk sia alan avangin tawngkam leh ziak lamah chuan kan sawi tam viau na a, atakah erawh Vairengte thlang emaw chauh kan la thleng rih bawk si. Vairengte dai hnai lawk thleng bak hi hma kan la sawn hleithei meuh lo niin alang. 

Nikumah khan State pahnih aiawh te inbiakna neih a niin Oct. 29, 2020 zana Assam Chief Secretary leh Mizoram Chief Secretary te video conference hmanga inbiakna neih alo ni tawhin Mizoram leh Cachar inkar (Lailapur leh a chhehvel) a lirthei tangkhangte chhuah tura thuthlukna siam dun a ni a, keini Mizoram lamin thuawih takin a zan la la hian lirthei kan chhuah nghal laiin Assam lam erawhin lirthei an rawn chhuah ve duh lo a, kan unau lirthei khalhtute ngei pawh ralmuanga awm loin Silchar Mizoram House-ah an awmkhawm ringawt a ni. Tichuan, Oct. 20, 2020 atanga motor rawn chho tur an dan chu dang chhunzawm char charin Nov. 8, 2020 (Pathianni) a Union Home Secretary hoa Mizoram leh Assam State Chief Secretary te meeting chuan Lirthei tangkhangte chu chhuah tura tih leh a niin Assam lam chuan tuna motor tangkhang an neih mekte chu harsatna an neih lohna tura escort tura tih an ni a.  He an thusawi ang hian a tuk, Nov. 9, 2020 (Thawhtanni) chuan Silchar Mizoram House compound-a motor tangkhang awm mekte chu harsatna nei loin Mizoram an rawn thleng ta a, nimahsela Mizoram House compound-a awm ve lem lo Mizoram lama chho tur motorte erawh chuan harsatna an tawk leh tho a ni awm e.  Hetiang hian kum kal liam taah khan CS Level inbiakna lo neih tawh a nih avang hian tuna inbiakna neih leh tur pawh hi hmasawnna vak a awm lo mai ang em tih ngaihtuahnaah alo awm nghal bawk a. 

Chief Secretary te meeting atang hian ramri-a duty turin Central lamin BSF leh SSB an rawn dah thu kan hria a. Assam lamin SSB hi an enkawl ang a, Mizoram sorkarin BSF te hi kan enkawl tur ni awm tak a ni. Nimahsela kan inrin hma mai bakah kan beisei loh lam atangin BSF te hian khawpui chhungah rawn lut ta thutin a thente chu an lo bazaar hman bawk a, screening engmah tih loh a nih vangin mipui an ti ral khel a, ply card hmang tein BSF te hi khawchhunga awm lo turin an ti hial a nih kha. 

Mizoram sorkar chuan Bengal Eastern Frontier Regulation 1 of 1873, Notification No. 2299P. Dated August 20, 1875 kha kan ram chin atan kan pawm a lo ti tawh bawk a. Hemi nei let leh tur hian Central sorkar lamah pawh kan theihtawpin hma kan la bawkin sorkar leh NGO lam te pawhin thawm kan lo nei reng tawh thin a. Tuna Chief Secretary pahnih inbiakna turah ngei pawh hian thupui bera an hman a rinawm a, chutih rualin Assam lam chuan vawiin thlenga an rawn chet dan thlir hi chuan keini pawm dan leh duh han hi an pawmin a rinawm chiah bawk si loh.

Tun hma lam atang tawhin ramriah hian buaina neuh neuh kan lo nei tawh thin a, kum 2007 ah MZP te’n Vairengte thlanga ZORÜN an sak chu Mizoram Police te an lo thiah tir tawh a, Zophai hmuna MZP te Chawlhbûk sak pawh Feb. 27, 2018 zanah JCB hmanga nawr chhiat vek a ni tawh bawkin Assam Police-te an duty nghal bawk a nih kha. Hetiang bawk hian Zophai hmuna CHAWLH BÜK sak tum vangin MZP te bawk hian March 10, 2018 (Inrinni) chuan buaina an tawk mai pawh niloin Assam Police te hian Firing Order keng sain MZP te hi silai nen an lo dang leh a. Chawlhbûk sak tuma MZP te’n ban an phun tur chu an lo nawr buai avangin tharum mai duh tawk loin silai an hmetpuak bawk a, lohtheihloha tlanchhiat a ngaih phah a nih kha. Hemi tumah hian zirlai maiin Assam Police te kut hi an tuar lo a, an zinga awm chanchinbu mite ngei pawhin vuak an tuar a. 

Mizoram lamin kan ram chin nia kan pawm hi Map lamah khawi lai chin nge ni ang tih hi kei ka hrethiam hauh lo mai a, tawngkama ka hriat dan chuan Assembly Constituency 11 lai a huam ni awm tak a ni. Chuti a nih phei chuan zau tak tur a ni a, a chhungah kan enga pui ni ve lo, kan biak pawh theih mai loh tur hnam dang hlir an lo awm nghet tawh bawk nen hian CS pahnih Inbiakna turah hian kan duh ang leh pawm ang hi min lo pawmpui ni ta sela kan tan buaina zâkhua thleng mai thei pawh a ni mai awm e. Lo huam zau lutuk lo pawh nisela kan sorkar hruaitute lu ti hai tham chu a nih tho tho a rinawm. Amaherawhchu chulam ai mah chuan buaina chinfel a nih chuan thil lawmawm tak a nih zawk dawn avangin hmasawnna ropui takah a ngaih theih ang. 

Nimahsela Assam sorkar hian ngaihdan nghet tak an neisa ngeiin a rinawm a, July 6, 2019 a Vairengte leh Lailapur inkara Building pakhat vang mai maia buaina tenau a chhuahte, Oct. 9, 2020 (Zirtawpni) chawhnu lama Cachar DC ho ngei maia Assam Forest Department leh Assam Police te zahnih rual lai mai Mamit District lama thawm an rawn nei leh ta thut mai te leh tun tuma thil an rawn tih dante ngaihtuah hian Assam lam hi chuan min zuam viau niin a hriat a, Mizo Police te puan In kaih te hial an ti chhe ngam bawk a nih kha. Hetianga hrohrâng taka an chet duh avang hian Delhi tlânga Inbiakna turah ngei pawh hian an inhrosa viau mai thei a ni. Eng pawh nisela lo ngaichâng phawt ila, Mizoram sorkar ngei pawhin hrohrâng na taka thawm a neih ngei beisei ila, Assam nena ramri buai nei tawh lo tura inbiakna tha tak an neih ngei ring ila a tha ang e.