COVID HOSPITAL DIN TUM

Mahmuaka Chhakchhuak

July 10, 2021

Mizoram Baptist Kohhran, Administrative Committee chuan Mizoramah CoviD hrileng a hluar zel avang leh hemi atana CoviD Care Centre-te indaihlohna a san chhoh zel avangin Mipuite harsatna leh mangannate chhawk zangkhai anih theih nan CoviD Hospital din thuai nise tiin an rel. Hemi chungchanga atul anga ruahmanna siam tur leh hma la turin Sub - Committee pawh din nghal a ni bawk. 

Baptist Kohhran hian kar hmasa lawkah khan committee pawimawh tak neiin CoviD hrileng avanga zoram pum kan buai dan leh mi za chuang laiin vanduaithlak taka nunna hlu tak an lo chan tawhna te mai bakah a enkawlna lama kan dinhmunte ngaihtuahna an neihin Lunglei khawpuiah hian CoviD Hospital din nise tiin ngaihtuahna an nei a, huphurh tak chung siin tul an ti bawk si a, mamawhna a san tawh bawk si avangin Pathian tanpuinaa innghat chungin an rel thlu ta a ni. Baptist Kohhran hian Serkawnah Hospital changtlung tak neiin kum 1919 daih tawhah khan bul an lo tan tawh a, mumal tak erawh chuan kum 1923 vel atang khan alo kal chho tan a ni awm e. Tunah hian khum 100 awm theihna niin mipui tana tangkai taka hman mek a ni a. Serkawn Chistian Hospital hi a tir lamah chuan hmeichhia leh naupang tan khum 30 awm theihna tura buatsaih a ni a, kum 1952-ah khan Nursing School atana hman chhoh tan alo ni tawh bawk a ni.  

Tuna CoviD Hospital din leh tura ruahmanna an neih erawh hi chu sum leh pai neih vang emaw tha tih ngawt lam vang niloin mamawhna a san em vangin a ni zawk a. Kum khat aia rei mah CoviD hrileng chuan kan nunphung a tibuai tawh a, a bik takin Lunglei lamah ngat phei chuan in ringhlelte tan pawh inentirna alo mumal vak loh mai bakah positive enkawlna ngei pawh duhthu alo sam chiah lo bawk nen mamawhna a sang hle a ni. Lunglei khawpui hi Second Capital of Mizoram tih nimahsela hriselna kawngah phei chuan mipui mamawh phuhrukna turin hmanraw chi hrang hrang ala ngai tam hle mai a, CoviD case ah ngat phei chuan ZMC lam pan kan ngai reng bawk si avang hian he CoviD Hospital hi hman theih tura peih a nih hunah phei chuan kan chhawr hle a rinawm. 

CoviD Hospital din tura ruahmanna an neihah hian Baptist Kohhran hruaitute hian sum leh pai hautak dan tur pawh an ngaihtuah thleng ngeiin a rinawm nain mamawhna a san tawh bawk si avangin a rang lama peih thuai a nih theihna atan Building luah theih mai tur zawn nise an ti a, CoviD vanga damlote enkawl theihna turin a hmasain Nuai 15 emaw chauh ruahman nise an ti bawk a ni awm e. 

Health Minister-in July 2, 2021 nia report a pek danin tunah hian Covid hri vei enkawlna hmun Dedicated Covid Hospital (DCH) - ZMC, Falkawn, khum 271 bakah ICU khum 34 awmna bakah Dedicated COVID Health Centre (DCHC) Mizoram hmun hrang hrangah 15 (belhkhawmin khum 152), COVID Care Centre (CCC) Mizoram pumah 55 (khum 1466 awm theihna), Paid CCC, Mizoramah hmun 2, khum 35 awm theihna leh state danga an neih ve loh, Community Covid Care Centre (CCCC) chu Mizoramah 177 (khum 3397 awm thei) lai awmin siam belh tum an awm thu a sawi a. Heng bakah hian Home Isolation kalpui niin, Saitual leh Kolasib district tih lohah chuan district dang zawngah kalpui mek a ni. Hei hi kan tun dinhmun a ni a, nimahsela heti chung hian Care Centre hrang hrangahte hian dam lo kan thahnem theiin khumte hi a full reng hlawm nia sawi a ni a, mamawh belhna a sang viau a ni. A bik takin Lungleiah hian Zobawkah CCC, khum 20 awm theihna, Polytechnic, khum 46 awm theihna, Eklavya, khum 48 awm theihna, Observation Home, khum 50 awm theihna, SIRD Pukpui, khum 13 awm theihna bakah hian Sazaikawn Urban Primary Health Centre chu DCHC atan ruahman mek a ni bawk a. Heng bakah hian khawtlang leh mipui tangrualte’n an din Community CoviD Care Centre hmun 15 ah siam a ni bawk.    

Hetiang hian Care Centre awm thluah mahsela mipui mamawh ber chu damna a ni tlat si avangin hengahte hian CoviD vanga damlo na zawng zawngte tan damna a awm tlat si lo a ni. Doctor leh damdawi lam thiamte chu an awm reng tak nain a na zualte chu ZMC lamah phur phei a ni lehzel bawkte hian CoviD Hospital hi mamawhna a ti sang lo thei lo bawk a, a nghahhlelhawm hle a ni. Tin, Lunglei khawpui leh a chhehvel atan chauha heng Centre hi awm an ni lo a, Tlabung leh Chawngte atang te leh thingtlang hmun hla tak tak atangte pawha an rawn pan reng bawk avang hian thawktute ngei pawh an hahin an thawkrim a, staff indaihlohna a nasa bawk nen, chumai bakah anmahni zingah positive an lo awm leh zauh thin bawk nen hian indaih lohna a nasa hle a ni. 

CoviD Hospital hi hman theih tura peih alo nih pawhin Baptist Kohhran hruaitute chuan sum leh pai hautak lo thei ang zawnga kalpui an tumin Serkawn Hospital atangin damdawi lam thiamte pawh a theih ang anga pawhpen nisela an ti a. Hospital puitling tak tak ang tur chuan tih theih ni lo mahsela tun hrilengah hian CoviD positive te enkawlna hmun alo niha tangkai taka hman theih tura Serkawn Hospital rinchhan chunga buatsaih nise tih a ni. Tun dinhmunah hian Lungleiah Truenat Quattro khawl pali hman mek a niin a hmaa Truenat Uno, vawi khata sample pakhat endik theihna khawl, TB ho ta an hman mek chu pet let leh tum a ni bawkin hriat a ni a. He Truenat Quattro khawl pakhat hi a thar niin FIND Company in CoviD hrileng denchhena Mizoram sorkar an pek, Mizoram sorkarin Lungleia hman tura a pek chhawn leh niin Lunglei Medical Superintendent chuan a sawi a. Heng bakah hian Serkawn Hospitalah leh John Williams Hospitalahte pawh RAgT khawl hman lai mek a awm bawk. 

Hetianga Baptist Kohhranin mipui mamawh tak CoviD veite enkawlna hmun tur nei thei tura ruahmanna an nei hi thil chhinchhiah tlak tak a ni a, kohhhran bil pawh niloa mipui zawng zawngin kan chhawr vek theih tur vawiinni la la pawha leh kan hman tangkai nghal tur a nih avang hian ruahmanna neitute hi a Kohhran ang pawhin an fakawm hle a ni.