COVID VANGA RAMCHHUNGA MI ZA THIHNA HI A PAWI A NI!

Mahmuaka Chhakchhuak

July 8, 2021

July 7, 2021 (Thursday) tlai dar 5;50 chuan Pu Lalsangzuala (43) chu ZMC, Falkawnah CoviD vangin a boral a, hei hi Mizoram chhunga CoviD vanga nunna chan kan neih Za na (100th) chiah a ni. A pawi hle mai a, a vanduaithlakin a thinrimthlak bawk. Tukin (July 8) ah CoviD vanga nunna chan hi pakhat awm leh bawkin tunah tak hi chuan 101 boral kan nei ta tihna a nih chu. Oct. 28 – December, 2021 inkarah khan mi 8 in nunna an lo chan tawhin April thlaah mi 4, May thlaah 25 lawih niin June thlaah phei chuan 53 kan kai a, tunah July thla kan hmang chho ṭan mek a, July thlaah ngei pawh hei nitin mi pakhat CoviD vanga boral kan nei ang a ni. Heti zel a nih chuan July thlaah ngei pawh hian engzatnge CoviD vanga boral hi kan neih ang a, August thla hian a kiam deuh ang nge a pung zel zawk ang tih pawh ngaihtuah thiam har tak a ni. 

Hetianga kan ram chhung ngei a CoviD hripui leng vanga nunna chan heti zat kan nei a, hri kai kan la ngah nitin zel bawkin nunna chan kan la nei chawl lo bawk te hi a thinrimthlak ngawt mai. Hrileng a ni a, a chin hi hriat a nih tlat loh avangin vanduai leh vannei inkara awm kan ni vek mai a, chutih rualin hnawhbo leh tih rem ngawt chu a lo theih chiah loh a nih pawhin heti lutuk lo deuh tal tur hian keini lamin tih theih kan nei em tih hi ngaihtuah tlan ngai tak niin alang. Kan kalphung pangngai reng hian awmzia a awm tawh lo pawh a ni thei a, test-na hmanrua lamah fello a awm nge, kan ṭanrualna a tha tawk lo lai alo awm nge mipui lamin kan zir lo hrim hrim zawk ni ang tih pawh ngaihtuah chiang ngai tak a ni ang. 

Sorkar lam thuchhuah (DIPR)-a kan hmuh danin Hri kai zawng zawng 85% hi chhungkua, ṭhian leh ṭhenawmte nena intlawhpawh nasa an ni tih thu kan hmu a, hei hi hri kai kan tlem theih lohna chhan pawimawh tak pakhat chu a ni thei ngei ang. April ni 20 atangin kan in lockdown tawh nain hri kai kan tlem thei chuang lo hi hetianga sorkar lam thuchhuah ang hi a nih chuan a pawi hle thei a, mipui lam hian thuawih kan mamawh hle a ni. CoviD laka invenna atan Mask hren ṭhat leh kut silfai ngun mai bakah midang hnaih loh tihte chu thil pawimawh tak a ni tih hre reng mah ila engemaw chang hian kan lo ngai pawimawh tawk lo leh tlat mai thin bawk si avang hian hri hi a darh ni ngeiin a hriat. CoviD laka himna hi kan ngaih pawimawh tawk loh avang hian punkhawmna hmun leh midang zinga awmin khabe-a mask hreng ta mai mai hi hmuh tur an awm reng a, midang khawih nawk nawk tawk lah an lo awm reng bawk a.   

Tin, Sorkar leh mipui lam hian ṭanrualna ṭha kan nei tawk lo a ni ang tih pawh hi a chhan a ni thei. A bik takin CoviD hri leng hi tunah ngat phei chuan politics inbeihna hmanruaah a chang lek lek hial ta mai bawk te hi ṭanrualna tha tiṭhuanawptu a ni thei bawk ang. Hri len tan tirh 2020 March thlaah te khan emaw pangngai takin ṭanrualna tha tak lo nei tawh ila chuan heti em em chu kan ni lo deuh mai thei a. Vawiin thlenga CoviD beihletna atana sum bawm pakhat chauh (?) kan nei pawh hi a ṭha ber lo mai thei bawk awm e. Tin, hri len ṭan tirh aṭanga kum khat aia rei liam tawh hnu, June 24, 2021 (Ningani)-a Central YMA huaihawta Mizoram Kohhran Hruaitute Committee, Political Party-te (BJP, INC, MNF, ZPM, PC, ZNP) leh NGO hrang hrangte Joint Meeting neihnaa zoram mipuite tana CoviD hri leng laka kan himna atan leh chu lam hawi thil pawimawh chi hrang hrang ngaihtuahna neih a ni chauh te kha ṭhenkhatte chuan a tlai tawh viau niin an sawi a. Ṭanrualna tha nei tur tan leh lungrual taka thawhhona neih tum tan ngei pawh Se bo hnua Se kawng khar ang chauhah a ngaih theih awm e. 

 

Heng baka pawimawh tak dang leh awm thei chu hri kai leh kai lo enna atana RAgT kan hmang lutuk hi a ni bawk ang. A tir aṭanga kan hman uar ber leh kan hman rim ber Sample endikna a 50% vel result hmusual palh thei, Rapid Antigen Test (RAgT) hi rinrâwl a kan hmang hi a chhan pawimawh tak a ni thei bawk ang.  Sorkar hian sample test na atana rintlaka ngaih Rt-PCR hi a tir aṭang khan hman theih turin lo ruahman sela chuan hri kai kan hmu chhuak zung zung thei ang a, invenna kawngah pawh awmzia a awm ngei a rinawm. Tunah ngei pawh Falkawnah (ZMC) ah chauh Rt-PCR hi kan la hmang a, District Capital tinah chuan a lo harsa deuh a nih pawhin Lunglei leh Kolasib leh Champhaiah te chuan hman theih tura ruahman ngei ngei tawh tur a nih laiin Nikum lam daih tawha Lungleia khawl donate ngei pawh ‘a petu hian a pek dan kalhmang a fel lo’ tih vang emaw chauhin vawiin thlengin kan la hmang thei lo a nih mai bakah Court lama kal hial alo ngai ta te hi a pawi ngawt mai. Tin, RAgT hmanga sample test tawh Rt-PCR hmanga test nawn loh tur ni awm taka sawi hi tak tak nge ka hre chiah lo nain a dik a nih chuan a pawi ngawt ang. 

Heng bakah hian  July 2, 2021 nia CoviD Second Wave leng mek laka mipui an him theihna tura hmalak zel dan tur chungchanga Chief Minister Pu Zoramthanga hova Assembly Annexe Conference Hall-a inrawnkhawmna neihnaa Health Minister-in Dedicated Covid Hospital (DCH) - ZMC, Falkawn, khum 271 bakah ICU khum 34 awmna bakah Dedicated COVID Health Centre (DCHC) Mizoram hmun hrang hrangah 15 (belhkhawmin khum 152), COVID Care Centre (CCC) Mizoram pumah 55 (khum 1466 awm theihna), Paid CCC, Mizoramah hmun 2, khum 35 awm theihna leh state danga an neih ve loh, Community Covid Care Centre (CCCC) chu Mizoramah 177 lai awmin (khum 3397 awm thei) siam belh tum an awm thu a sawi a, a bengvarthlak hle a ni. Thil lawmawm tak a ni pawhin a hriat a, amaherawhchu heng Centre-te hi CoviD positive awmna  a ni nain a serious te erawh chu ZMC lama dah luh leh tho an ngai ṭhin bawk hi thil buaithlak tak a ni thei awm e. Heng Centre-ahte hian Doctor leh mithiam dangte an awm tho bawk si avang hian sorkar lam pawhin anmahnia (Centre hrang hrangte) inenkawl theih tur hian thuam ṭha ta zawk mai sela hri vanga thihna hi a tlem phah thei ang em tih ngaihtuahnaah alo awm bawk a. 

A tawp ber atan chuan he hri leng vanga kan ram chhung ngeia kan unau duh tak tak mi 100 chuang laiin an nunna an chan phah hi a pawi lutuk a, chhan dang vanga boral chu an awm nameuh mai nain CoviD vang kher hi chuan thihna hi thleng tawh lo sela a duhawm hle a ni. Vanduai leh vanneih pawh a awm thei bawk ang a, ram dang leh ṭhenawm hnai state-te ngei pawhin lockdown te pawh awmze nei taka an kalpui theih laia keiniin kan thei lo bik anga lang ngawt te pawh hi a ṭha lo viau thei awm e. Hawh teh u, kan za hian tangrual lehzual ila, CoviD vanga thihna hi a thlen tawh lohna turin theihtawp i chhuah ṭheuh teh ang u khai.