ENTAWN TLAK BORSING BEY

Mahmuaka Chhakchhuak

June 28, 2021

June 21, 2021, Thawhṭanni zanah chuan Moreh, Manipur atanga rawn chhuak Super Bus (MN06B-0511) chuan Dimapur tlan tlangin Guwahati lam a pan a. Chu motor khalhtute nena inthurual tih hriat tak hian Tamil Nadu nu pahnihte chuan an ruihtheihthil Methamphetamine, high quality ngat mai chu motor Steering bul hnaih taka box chhungah chuan 3 kgs lai mai chu an lo thukru a.  A man phei chu tam tham tak niin 12 Crore lai a ni nghe nghe. Nuai za hlira chheh a, chheh 12 lai tihna a nih chu. Dimapur chu tluang leh him taka an rawn tlan pelh hnu lawkah chuan Assam State luh tan tirh, Karbi Anglong District huam chhung chin a Police Duty Post awmna Dillai-ah chuan Police leh anmahni puitu Home Guard tlemtete chuan Bus chu an lo ti dingin an lo check a, Home Guard pa tawi lam leh thau lam lek lek Borsing Bey chu Bus-ah chuan lutin a han check kual velnaah chuan beisei loh tak maiin tunlaia damdawi lar tak mai ‘Meth’ an tih mai chu 3 kgs lai a man ta hlauh mai.  

Borsing Bey hi Dokmoka khuaa cheng a ni a, he khua hi mihring 4670 cheng mekin tuna Bey te duty-na hmun Dillai atanga 90 Kms laia hla a ni a, Karbi Anglong District khawpui Diphu atang pawhin 85 kms lai a ni nghe nghe. Thingtlang khua ve tak niin National Highway – 36 paltlang khua a ni nghe nghe a. Borsing Bey hi Kum 1986-a piang niin 2003 khan Home Guard (Asssam ah hian Home Guard-te hi thlaruk dan  zelah an hun pawhsei an ni thin) ah a lut a, thlabiin Rs. 9000/- ala mekin a nupui leh fanu leh fapa, Class V zirlai a nei bawk a. Hetia tum reng vang pawh ni lo, tihpalh thilthu tak meuh meuha damdawi tawlhru a man takah hian a tan vanneihna kawng lo inhawngin Police Constable atan lak a ni a. Hetia Constable a nih takah chuan a thlabi lawmman lak pawh Rs. 27,000/- vel lai ni tawh tura ngaih a ni a, amah chauh pawh niloin a nupui leh fanaute tan chuan a lawmawm lehzual ngei ang le. Heng damdawi tawlhru tute hi Chennai (Tamil Nadu) hmeichhe pahnih leh Manipur mipa pakhat an ni a, anni chuan chhuah an nih chuan lawmman thahnemtham tak pek an tiam nain Bey chuan chung lawmmante chu hnawlin huaisen takin a man ta a ni.  

He chanchin hi a ngaihnawm ka ti a, khulai ram vela kum hnih vel emaw ka lo chen ve tawhna avangin an khawsak phung thenkhatte ka lo hre ve nual tawh bawk a, Borsing Bey tana thamna lak mai a awl dan tur leh a lak duh loh avanga malsawmna a dawn dante hi ropui hlein ka hria a ni. Keima tawn ngei hi sawi ila an khawsak phung chu a hriat fiah theih maiin ka ring deuh a, tawitein han sawi teh ang. Tumkhat chu Nahorlangso khuaah kan kal a, he khua hi In 15 vel lek awmna a ni. Zing chaw ei loin kan kal a, chawhma dar 11 velah he khua hi thlengin eitur kan han zawng a, chaw bel a lo ruak vek mai a, In dangah chuan zawng zelin chung In zawng zawngah chuan chaw thing ei tur a lo awm hauh lo mai a, chawhmeh thing pawh hmuh tur a awm lo. Chaw chhum kan tum leh a, buhfai pawh an lo nei lo a, buh hum hi kan deng chawp a, kan han thap fai leh te te bawkin chaw chu kan chhum thei ta chauh a ni. Hei hi thingtlang khua tak tak a ni a, keini, mizo thingtlang khuate chu tluk lo tak an ni. 

Hetiang hi an khawsak phung a nih avangin mihring sang li chuang chenna khua pawh changkang tak an ni lo mai thei a, an hnam nunphung hrim hrim hi mizote aia an hniam zawk avang hian kawng tam takah min tluk lohna atam viauin a rinawm bawk a. Borsing Bey te ngei pawh hi khawsak phung changkang tak an nih a rinawm kher loh a, an khasak hi a pan ve viau ngei tura ngaih a ni. Hetia a duty-na hmuna sum thahnemtham tak hmanga thamna hi pawm mai awl tak tur a ni a. Nimahsela pawm loin a hna a nih ang ngeiin a man sak ta zawk a, chu chuan lawmna ropui tak a dawn phah ta  zawk a. He a damdawi man hi International market ah chuan Rs. 12 Crore man lai a ni a, Bey hian hetia a man tirh hian Driver pawhin tawngkam thiam taka a ngen sak chung pawhin Bey chuan ngai pawimawh duh loin a ‘Meth’ man nen chuan an hruaitute hnenah a hruai lui ta tho a, Police te chuan anmahni leh an motor chu hrengin an man ta nghal a.   

Hetia Borsing Bey thiltih hi rang takin Bhaskar Jyoti Mahanta, State Director General of Police (DGP) chuan lo hriain lawmawm a ti a, lawmman atan hian cheng Nuai Khat pein ‘midangte tana entawn tlak leh hmahruai tlak a ni’ tiin a chawimawi bawk a. Chu mai chu la ni loin Assam State sorkar ngei pawhin midangte tana entawn tlak tiin a vawikhatna atan Borsing Bey hi Police Constable atan a hlangkai nghal a, June 24, 2021 (Thursday) khan Cabinet thukhawmin a remtih thlap a ni nghe nghe. Cabinet thukhawm hian he thu an sawiho a, an remtih tlan hnu chawhnu lamah hian DGP hnenah he thu hi sawiin cheng nuai khat lakchhuah theihna tur chegue a hlan nghal bawk a ni. DGP hian hetianga chawimawina leh lawmpuina a hlan rual hian ‘Borsing Bey thiltih hi sawi tawp ni a awm lo ang’ ti a sawiin mitin chungah rinawmna lan chhuah tir theuh ang u tiin midangte pawh a ngen nghal bawk a.

He Hindu sakhaw ringtu pakhatin a thiltha tih avanga khawvel hriat khawpa a hming alo than takah hian keini kristiante tan chona lian tak a siam nghal bawk a. Chu chona chu ‘An ni aiin kan rinawm thei zawk ang em’ tih a ni. A hnam ang zawng pawhin chona lian tak min pe nghal bawkin a hriat a, engtinnge kan chhan let ve dawn le. He hnam, Pathianthu leh kristianna kawnga inti hre tak leh nunpuina lama nunpui leh chuang lem lo tak Mizo kristianna hian a hnam ang zawng pawhin chona lian tak min siam niin ka hria. A mimal ang te, a chhungkua angte, a khawtlang leh ram ang te hian he chona hi chhanglet turin kan inbuatsaih dawn em le?  

Anni aiin kan rinawm thei zawk ang em?