HMEICHHIA I NIH ANGIN AWM MAI RAWH

Mahmuaka Chhakchhuak

July 2, 2021

Hmeichhe zak thei lo tak tak ka lo tawng ve fo tawh ṭhin a, a bikin nula senior lam hi an zak lo tlangpui niin a hriat nghe nghe. Puipun nikhua leh awmkhawm engemaw hlekah te hian an tawng phar phar a, mipa zakzum deuh tan phei chuan lo kimkit chawi chawina tham hian zahmawhte hi sawi zuk hrat hlawm a maw le. Kohhran thalai atangin an pension tak vang maiin kohhrana kan inhman lai chuan te hi an han ti thlazen mai thin bawk a, thenkhatte phei hi chuan ipte an ak ve ziah tak nain sahdah fun khawro tak leh khawchhak chhuak powder, darthlalang chhawp nghal ang chi emaw te chauh hi an ak a, inthlahrung hauh loin an kianga patling leh tlangvalte kuhva an la dil ham ham bawk thin te han ngaihtuah hi chuan vantlang chawm an tih thin hi hetiang hi an ni mai lawng maw tih awl tak tur a ni.

Hmanni lawk khan kum 10 kal tawh daiha ka hmelhriat tak mai nula senior tawh, tlangval tam takte ngei pawhin rim ena an en tawh loh leh zing thawh hlima tlemte, hing tak chauh zung tawh thin an tih ang tur hi ka fiam sual pek a, ka inchhir hle a ni. Kum 10 kal tawh daiha ka hriat a niin innel takin kan titi bawrh bawrh thin a, nimahsela a WhatsApp number ka lo la neih loh avang hian engtin tin emaw ka nei thut chu facebook-a a thil comment nate chu screenshot-in ka thawn ta a, nimahsela ka beisei loh tak mai hian min rawn chhang let ta hrep mai a, ka ngam lo chiang hle mai, ngaihdam dilin ka tawpsan ta zawk a. Insawiin min hre ta sela chuan a nui ve vak vak ngeiin ka ring a, min hriat loh vang tak chuan a thinrim te pawh ti ila a dik thei tho bawk awm e. Kei lah pek chu vawiin thlengin ka la insawi duh ta chuang lem lo a, tul kherin ka hre lem lo a ni ber mai.

Mizo nunphungah hmeichhiate hian pawimawhna tam tak an neih zingah mipa tawiawmtu an nihna hi a langsar ber hial awm e, zing thawh hlimin buh an deng a, tui an chawi a, eirawng an bawl vek bawk a, chaw eikhamah lah mipa ei turin chaw an la fun sak thlap bawk thin. Ram hnathawka an chhuah ho reng reng pawhin hmeichhiate chuan chawfunte chu an phurhsak a, mipa thlazar hnuaiah thlamuang takin an awm a, mipa zawkte tana tangkai taka an awmna chu an tih tur pawimawh bera ziak loh dan an neih chu a ni. Mo ngat phei chu tunlai kan dinhmun atang thlir phei chuan khawngaihthlakawm khawpin khatiang dinhmunah khan an lo ding tawh thin.  

Hetiang hi kan mizo nunphung hmasa lam ni mahsela vawiin hunah erawh chhawm zel chi lohna tam tak a awm tawhin khawvel hmasawnna avanga chhawm zel remchang lo tam tak pawh a awm ngei bawk ang. Nimahsela kan chhawm emaw chhawm lo emaw vawiin thlenga la danglam ngai lo chu mipa thuhnuaia awm tur an nihna hi a ni. Hei erawh khawilai hmunah pawh a tih theih hial ang a, vantlang inkhawm a ni emaw Inchhung khur a ni emaw ram lamah pawh nisela kan mizo danah hian mipa aia hmeichhe chungnunna tur hi khawi hmunah mah hian a awm lo hrim hrim a. Mipa zai ngai thiam taka an awm hi an tihtur pawimawh ber pawh a ni bawk awm e. Hnam dangte erawh chuan hetiang hi an hnam zia a ni chiah lo mai thei a, kan chhehvel tlangmi zingah pawh an tam kher lo mai thei e. Khasi erawh chuan hmeichhe dinhmun chawisan hranpa ngai loin mipa aiin an chungnung sa hrim a, mahni Inchhungah pawh pa ber pawhin nupuite thurawn an la zuk zuk e an ti a. Nupui/ pasal an inneih pawhin hmeichhe hnam an han chhawm tlat mai zawk a, mipa zawk hi hmeichhe Inah an lawi lut tlat bawk a, chuvang te pawh chu a ni ang e. 

Amaherawhchu kan mizo hnam kalphung anga hmeichhe dinhmun hniam zawka dah pawh hi thil remchang ber a lo ni tawh lo mai thei a, chhungkaw tam takah phei hi chuan pa aia nu felna zawkte leh nu rorelna zawk anga ngaihtheih lek lek tur chhungkua hi a tam tawh bawk a ni. Lincoln-a anga nupui ngam lo chung chung pawha ram hruaitu tha hi kan nei ve ngawt te a nih loh phei chuan ram hruaitu zingah hian nupuite thu thua thuneihna hmang ta mai hi awl deuh tak tur a ni. Anmahni ram hruaitute dawr dawn pawha an nupuite biak that hmasak ngai ziah ang chi te erawh tunhma atanga kan kalphung ve reng emaw tih turin vawiin thlengin kan la kalpui a ni ber a, a tha lo erawh ka ti hauh lo nain hmeichhe thu hi a pawng a puia la vek lem loa a chintawh hriat erawh a tha mai thei e.   

Hmeichhe tan pawh pasalte ngam lutuk anga lan pawh thil mawi tak a ni lo thei a, midang hriat leh hmuh tura a pasal a ngam lutuk phei chuan hmeichhe nasa tia sawi mai awlsam tak tur a ni. Kum rei deuh tawh takah khan kan lenna Kohhran upa pakhat Inah chuan an nu hian an pa malchungah a bawp a han hlang kai kher a, an pa lah kohhran upa a ni bawk si a, mawi hi ka ti chiah lem lo a, ka lo ngaimawh ang reng hle. An pa kha a duh dan danin thunun thei pawh nisela midang hmuh laia a mal chunga bawp hlan kher kha chu a mawi chiah lo deuh a ni. Hei erawh mi nupa kar thu a ni a, keini lo sawi vak a rem kher lo ang. Amaherawhchu pawn lamah erawh an pa a chawimawi thiam thung chuan nu fel tak a ni tihna a ni ang a, nu chhuanawm tak a ni ngei ang. A pawimawh ber zawk erawh chu mipa zawk pawhin hmeichhe innghahna tlak a nih a pawimawh a, chutiang bawkin hmeichhia zawk pawhin hmeichhia anga awm thiam hun a neih a pawimawh bawk a ni. Hei vang hian mipa chu mipa taka awm mai a, hmeichhia pawh hmeichhia ang taka awm mai hi inchhung khurah mai nilo khawtlanga nunphung hmanna chi hrang hrang thleng pawh hian a lo la tha ber rih awm e.