HRIATTHIAM HAR

Mahmuaka Chhakchhuak

July 14, 2021

Nimin lawk, July 13, 2021 niah chuan Mizoram sorkarin High Court-ah tun dinhmunah chuan Lunglei Civil Hospitala Rt-PCR laboratory dah a remchan loh thu leh Lunglei District tan Rt-PCR laboratory mamawhna a awm loh thu an thlen chungchang hi kan hriat rual rualin thin a thawng nghal hle mai. Court-ah hian Health Secretary-in July 9, 2021 niah khan affidavit thehlutin Lungleia Rt-PCR laboratory bunna tura sorkar hmalaknate a  tarlangin tun dinhmunah chuan Rt-PCR khawl hi mamawh rih lo niin a thlen a. Hei hi Rt-PCR khawl an nei lo ang tihna lam ni loin sorkar ngei pawhin sum indaih lo chung chungin laboratory dinna turin a hmun te pawh laih a ni a, building hi peih a nih hunah chuan Rt-PCR chauh niloin laboratory dang te pawh dah a nih tur thu tarlang a ni bawk a. Heng bakah hian tuna Lungleia Truenat khawl hman mek chuan mipui mamawh a phuhru rih angin an sawi bawk.

Tun dinhmunah hian Lungleiah Truenat Quattro khawl pali hman mek a niin a hmaa Truenat Uno, vawi khata sample pakhat endik theihna khawl, TB ho ta an hman mek chu pet let leh tum nia hriat a ni a. He Truenat Quattro khawl pakhat hi a thar niin FIND Company in CoviD hrileng denchhena Mizoram sorkar an pek, Mizoram sorkarin Lungleia hman tura a pek chhawn leh niin Lunglei Medical Superintendent chuan a sawi a. Heng bakah hian Serkawn Hospitalah leh John Williams Hospitalahte pawh RAgT khawl hman lai mek a awm bawk. Hei vang hian nge ni sorkar chuan tun dinhmunah Rt-PCR khawl mamawhna a awm lo angin a sawiin Mizoram chhim lam district 4 te mamawhna chu a phuhru zo hlein CoviD hri kai enfiahna atan a țha tawk tih a ni. 

Hei hi hriatthiam a har riau mai a, June 15, 2020 nia Aizawl atanga Expert team-te Lunglei kalin Civil Hospital-a Rt-PCR Diagnostic Laboratory bunna tura sorkarin a ruahman mek chu inspection neiin hmalak tulte an enfiah a, Lunglei Civil Hospital-a room pathum ruakte chu a that tawk thu an sawi tawh nghe nghe a nih kha. Nimahsela a nih dan tur ang taka buatsaih dawn chuan sum leh pai pawh Nuaih 100 chu a lo berah a tul dawn thu an sawiin hun pawh a duh deuh hlek dawn thu an sawi nghe nghe a. Thawm a reh vang vang hnuah leh chhim lam mipuite phei chu an beidawn hman tawh hial hnuin May 7, 2021 ah chuan Dr. T. Lalhmangaihi, Director, Hospital & Medical Education hnen atangin Rt-PCR khawl chu hman theih tura Install tura hriattirna a rawn chhuak leh a nih kha. Nimahsela June 2, 2021 niah Director, H&ME bawk chuan Lunglei hmunah chanchinbu mite kawmin Pu Zodintluanga, MLA khawl pek chu a pek dan kalhmang a dik lo tiin min sawihnawm sak leh ta mai bawk a!

Hetianga boruak a awm mek lai hian State Bank Of India (SBI) chuan vantlang hnathawhna pual Corporate Social Responsibility (CSR) hnuaiah CoviD hri leng laka mipui mamawh phuhrukna atana an ruahman Rs. Nuai 100 chu Mizoram state tan dil theiha a awm thu an hriattir a, chumi bawhzuina atan chuan Mizoram sorkar chuan Lunglei Civil Hospital (LCH) tih changtlunna turin an dil niin SBI lam atangin thu dawn a ni a. Health Department lam chu LCH atana hman an tum dan Submit turin SBI chuan an rawn ti a, chutiang chuan 3rd June khan Dr. T. Lalhmangaihi, Director, Hospital & Medical Education bawk chuan SBI Regional Manager hnenah hian a chhanletna lehkha ziakin a thawn let leh a. Subject ah pawh ‘Improvement of Civil Hospital, Lunglei for preparedness of Covid- 19 pandemic – prayer to allocate fund thereof’ tia a ziah lan bakah he lehkhaah hian sum hmanna tur pawh a ziak lang lang nghal bawk a. 

Chungte chu -

1. Construction of Mortuary Building – Rs. 48,89,000. 00

2. Construction of Oxygen Generation Plant – Rs. 19,12,000. 00

3. Purchase of Cold storage, fire fighting and furniture – Rs. 31,99,000. 00

TOTAL – Rs. 100,00,000. 000 (Rupees One Crore)  

 

Hetiang chauh hi ala ni lo a, Kan Health Minister Dr. R. Lalthangliana ngei pawhin June 16th, 2020 ah khan NHM atanga Rt-PCR khawl lei chu Lunglei ah dah a nih tur thu a lo sawi tawh bawkin June 14, 2021 khan Lunglei East bialtu MLA, Pu Lawmawma Tochhawng chuan Rt-PCR khawl chu Laboratory Block peih fel a nih ve leh bun a nih tur thu leh Laboratory din tur hian hun a la duh dawn thu a sawi leh bawk a. May 25, 2021 ni khan Pu Zodintluanga MLA pawhin Rt-PCR khawl atana hman tur hmanraw pawimawh chi hrang hrang chu Lunglei Civil Hospital ah hian alo hlan leh tawh bawk a. Health Department Secretary lahin Laboratory Building sakna turin DPR Rs. Nuai 750 chu NEC leh DoNER-ah an thehluh thu an lo sawi tawh bawk a ni.  

Hetianga hmalakna hrang hrang alo awm tawh avang hian Lungleiah hian Rt-PCR khawl hi nei mai tawh tura kan inngaih mek laiin vawiinah chu Kan sorkarin Lungleia Rt-PCR dah a remchan loh thu leh Lunglei district tana mamawhna a awm loh thu High Court ah a lo thlen a, hei hian rilru a ti buai hle mai. Heti tak hian chhim lam mipuite hi min lo ngaihthah ta a ni maw tiin rilru kan nei hial a. Rt-PCR khawl hi a nihna tur ang taka function tur chuan a khawl operate (enkawl) turin Microbiologist 2 (pahnih) a lo ngai kher a nih pawha chumi chu tunah alo remchang chiah lo a nih pawhin a theih dan dana mipui mamawhna phuhru tura hma min lakpui dawn emaw tih laiin sorkar lam atanga hetiang thu han hriat chu mittui a tla thei hial mai. Tunah Court lamah thu a awm mekin ngaihtuah mek a ni a, nakin lawkah hian Court lamin engtinnge thuthlukna ala rawn siam dawn chu hriat a ni hauh lo nain chulam chu tuna lo sawi vak theih pawh a ni lo a. Heti taka Lunglei khawpui leh chhim lam mipuite hripui vanga kan buaina min hriatthiampuitu ber tura ngaih kan sorkar berin beisei loh lam hawia thu a han nei thar leh hi mak pawh kan ti hle a ni. 

 

Hriatthiam har kan ti a, mak kan ti bawk a, Court thlen ngai lo a atir atanga theihtawp min chhuahsak dawn emaw tih lai leh Expert team te thu thlen ngei pawh min han palzut sak ta mai hi hriatthiam har kan ti hle a ni. Thinlung tina tu ber chu Lunglei khawpuiah ngei pawh CoviD vanga nunna hlu tak chân kan neiin nitin hri kai kan nei reng bawk a, kan hmanraw neihte hian kan mamawh min phuhru zo lo kan tiin hmanraw tha zawk leh changtlung zawk kan mamawh em em laia sorkar lam atanga Rt-PCR khawl mamawh lo anga min han sawi lai tak hi hriatthiam har kan tih lai tak leh kan thinlung ti na tu tak chu a ni.