KAN CM THUSAWI CHUNGCHANG KHA

Mahmuaka Chhakchhuak

July 19, 2021

July 16, 2021 (3;14PM)-a sorkar thuchhuak 𝐍𝐨.1425/2021-2022 anga kan hmuh angin July 13, 2021 nia 𝐏𝐫𝐢𝐦𝐞 𝐌𝐢𝐧𝐢𝐬𝐭𝐞𝐫 𝐥𝐞𝐡 𝐡𝐦𝐚𝐫𝐜𝐡𝐡𝐚𝐤 𝐒𝐭𝐚𝐭𝐞 𝐂𝐡𝐢𝐞𝐟 𝐌𝐢𝐧𝐢𝐬𝐭𝐞𝐫𝐭𝐞 𝐯𝐢𝐫𝐭𝐮𝐚𝐥 𝐦𝐞𝐞𝐭𝐢𝐧𝐠-𝐚 𝐌𝐢𝐳𝐨𝐫𝐚𝐦 𝐂𝐡𝐢𝐞𝐟 𝐌𝐢𝐧𝐢𝐬𝐭𝐞𝐫 𝐏𝐮 𝐙𝐨𝐫𝐚𝐦𝐭𝐡𝐚𝐧𝐠𝐚 𝐭𝐡𝐮𝐬𝐚𝐰𝐢 𝐩𝐮𝐚𝐧𝐳𝐚𝐫 𝐝𝐚𝐧𝐚 𝐝𝐢𝐤 𝐭𝐚𝐰𝐤 𝐥𝐨 tih thupui hmanga an thuchhuah kan lo hmu a. He thuchhuah hi Chief Minister Office aṭanga siam a niin chanchinthar ṭhenkhatin an chhuah dan chungchangah sawifiahna an rawn siam a. A thu tak chu ’Mizoram Chief Minister chuan a State chhunga COVID hri punna chhanah Myanmar leh Bangladesh aṭanga refugee lo lut te puh thu leh ṭanpui an ngaih thu Prime Minister a hrilh’ tih hi a ni a. He thu hi CMO lam aṭang chuan thu belhchian dawllo leh a ngaithlatute leh chhiartute tana ngaihtuahna hruai sual thei thil a nih avangin an ngaih thutak thu an sawi bawk a.

He meeting-ah hian Chief Minister Pu Zoramthanga chuan hripui leng chungchanga Mizoram dinhmun a sawifiahnaah Mizoram State chu Myanmar leh Bangladesh ria awm a nih thu leh dan loa luh ruk theihna hmun tam tak a awm thu a sawi a. Kum kal ta, hripui thawhkhatnaah khan ram leh hnam hmangaihna avanga mi tlawmngai penchhuak, a sang tel teh meuhin thla tam tak riahchilhin ramri an veng a (Hetih hun lai hian ram dang nena kan inrina luhka (international border) zawng zawng khar a ni a, ram pawn aṭanga thlawhna thlawk lut leh thlawk chhuak pawh tihtawp vek a ni.) Hripui thawhkhatnaah hian Chief Minister chuan hripui dona kawngah Mizoram a chet ṭhat thu leh hri kai pawh an tlem hle thu a sawi a. He thu hi hriat sual palh awl thei tak tur pawh a ni ang a, phai lam chanchinbu mite hian an lo hriat sual palh pawh a ni thei. Ram pum huapa harsatna leh buaina neuh neuh kan tawhte hi sawi pawlh awl tak pawh a ni ang a, khawchhak lama kan unaute chuan buaina lo tawkin himna zawnga an tlanchhiat alo ngai bawk si a. Chutih mek laiin African Swine Fever (ASF) lengin Mizoram a rûn mek bawk nen. Hengte avang hian kan CM ngei pawhin meeting pawimawh tak an neihna hmunah hian midang tana hriat pawlh theih tak turin alo sawi pawh a ni mai thei a ni.

Congress Party Ṭhalaite chuan July 16, 2021 khan thuchhuah siamin kan CM zahawm tak chu July 13, 2021 nia Prime Minister hoa virtual meeting an neihna hmunah Mizorama CoviD hluar chhanah Myanmar buaina avanga zohnathlak raltlante a puh anga sawiin pawi an tih thu thuchhuah hmang meuhin an puang a. Anni hian behchhan turin finfiahna tha tak an nei pawh a ni thei a, ringhlel ang pawha sawi loa chiang tak anga an sawi avang hian ṭanchhan ṭha tak an nei a nih ngei pawh a rinawm. ZPM Ṭhalaite pawhin thuchhuah siamin sorkar hotu ber Chief Minister Pu Zoramthanga chuan mawh ala ngam lo a nih pawhin Myanmar raltlante kher chu puh lo turin an ngen a. Hei vang hian a ni nge kan hre lo nain CMO aṭang hian thuchhuah pawh rawn siam nghal a ni bawk a. He PM hoa virtual meeting neihnaa kan CM ṭawngkam anga sawi hi social media lamah chuan hmuh tur a tam hle mai a, The Aizawl Post chanchinbu ngei pawhin July 17, 2021 chhuakah khan Editorialah rawn sawiin hetianga Mizoram Chief Minister thusawi, dik lo baksaka puangzartute hi Mizoram chhunga thuthar thehdarhtute niin an lang lo a, Mizoram sorkar hian thudik lo thehdarhtute hi chhuiin an thu thehdarh dik loh dan hi siam ṭha leh tur leh ngaihdam dil tura a phut ngei hi a ngai a ni tiin a rawn sawi a. 

Hei hi thu pawimawh tak a ni a, thu dik a nih leh nih loh hi fnfiahna awm thei ang ang nena mipui hriat tura puanchhuah ngei a pawimawh hle a ni. PM ho meuha meeting a nih avang hian audio/ video pawh dahṭhat ngei a nih a rinawm a, kan sorkar hian ngawih liampui mai loa a dikna tak a haichhuah ngei a ṭha a ni. July 15, 2021 zana LPS news puangtuin a puan danin Myanmar ram atanga Mizoram chhunga raltlan lo lutte hi hetiang hian a zat sawiin Tuipui ralah 1457 awmin, Farkawnah 668, Vaphaiah 208, Khawbungah 180, Thekteah 136, Zawlseiah 100 bakah hian Tuipui ral khaw hrang hrangah 10 – 40 inkar an awm ṭheuh thu a sawi. Tin, CoviD hri kaite enkawlna turin 4C buatsaih a nih bawk thu a sawiin Tuipui ralah 4C hi pali (4) a awm mek thu a sawi a, Vaphaiah pawh 4C hi siam mek a nih thu a sawi bawk a, hetiang a nih chuan hri hi anni atang hian darh awm lo tak chu a ni. 

CMO aṭang ngei pawh hian hetianga thuchhuah siam ngawt hi duhtawk mai lo a, a dik ngei leh dik ngei lohna hi mipui hriatah puang ngei sela, chutilo chu mipuiah inhnialna awm reng thei thil a ni tlat a ni. Kum kal liamta lawkah pawh khan hetiang deuh hian chanchinbu mite hian CM thusawi chungchangah sawi alo awm tawhin kan Minister pakhat phei chuan ṭawngkam alo neih tawh nghe nghe kha. Hmanni lawkah ngei pawh MKHC leh CM inkarah thuchhuah dik lo a awm nge ni CMO aṭang bawk hian FIR thehluh hial a nih tawh bawk kha. Hetianga ram hruaitu lu ber Office aṭang meuha sawifiahna lam hawia thuchhuah leh FIR hial thehluh a han awm ṭhin hi a pawi hle mai a, a zia lo hle a ni. State dangah leh ram dangahte hian hetiang hian CMO aṭanga thuchhuak leh FIR thehluhte hi awm ve ṭhin tak maw le? Tunhma lamah pawh khan hetianga CMO aṭang thuchhuah leh FIR thehluhte hi sawi a awm tawh em ka hre chiah lo nain alo awm tawh a nih pawhin sawi tur a tam lo mai thei.

Kan Chief Minister zahawm tak ṭawngkam anga sawi hi finfiahna tur ala awm ngei a rinawm a, hmanni lawka Assembly House bathlara kan MLA te pahnih inbakkaih ang deuha sawi pawh kha Assembly Speaker ngeiin a hnu lawkah a video ngeiin min rawn hmuhtir leh a nih kha. Tuna kan CM sawi anga sawi pawh hi Opposition Party Ṭhalaite chuan thuchhuah siamin an rawn sawi ve ve lehnghal avang hian CMO aṭanga tuna thuchhuah an siam hi duh tawk mai loin thudik hi puan chhuah vat nise a ṭha ngawt mai. A nih loh chuan inhnialna a ni reng theiin kan CM tan ngei pawh thil zahthlak tak a ni thei bawk si a. Helai Mizoram chhunga mipuite chuahin an thu leh hla hi an hmuh loh avangin anmahni ngeiin ngaihdam dilna mai bakah thudik tak hi an puan chhuah leh ngei hi a ngaiin a hriat a, mizo mipuite ngei pawhin kan ram hruaitu ber chunga rinngamna kan neih ngheh lehzual theihna atan a pawimawh bawk ngei ang.