KAN TLAWM CHIANG E

Mahmuaka Chhakchhuak

July 20, 2021

Pathianthuin ‘hri te a lang ang a…..’ a tihte chu lo chhiar ri fo tawh ṭhin mah ila, a taka a rawn thlen meuh chuan rapthlak kan ti a, kan beisei ngam loh leh kan beisei phak bakin kan nunphung min tibuai a nih hi. Khawvel letliama zawlnei emaw kan ram chhunga zawlnei inti thinte ngei pawhin tun hri leng chu sawi tur an nei lo nge ni an thu leh hla hriattur a awm lo riau mai a, hri leng reh hun turte emaw te hi sawi awm sela tha tur a nih laiin an reh hlawm vek mai a nih hi. Kan hriattheih chhun lah chu China rama Wahan Province atanga rawn darh a ni awm e tih chauh a ni a, chu pawh chu ‘a ni ngei e’ tih sawi thei azeng lah kan awm a ni chuang der bawk si lo. Khawvel lu a ti hai a, ram hruaitu ber ber atanga a mi chhe ber thlengin kan mangang takzet a nih tak hi. 

Mizoramah ngei pawh March 21 aṭangin kan khawsak phung min tibuai tan a, mipui tan pawn chhuah khap a niin kohhran inkhawm hial khap a ni bawk a. Aizawl khawpuiah phei chuan chhun leh zan chawl loin kawngpui kiangah an duty a, chhun leh zan a reh dùk a, motor a tlan zauh zauh a, naupang ninhlei leh thawm riva hrim hrim awm loin a reh vek mai. Sorlai laipui lam pawhin ngai pawimawhin he hripui CoviD avang hian March 24, 2020 zân khân India Prime Minister ngeiin ram pumah “Ni 21 chhung atan Complete Lockdown” a puang ta rûp mai a nih kha. Kan la hmelhriat ngai loh a nih vangin awmdan pawh kan thiam meuh lo a, a thente phei chuan a ipik zawngin an lo sawi bawk a.

Zep thu a cheng lo, kan ram hruaitute ngei pawhin a tir lamah kha chuan an cho viau niin a hriat a, kan Chief Minister zahawm tak phei hi chuan Health Minister hnenah pawh ‘hri leng beihletna atan sum leh pai in mamawh zah zah rawn dil rawh u, kan lo pe zel ang che u’ tiin thlamuanawm takin a sawi a, nimahsela June 29, 2021 alo thlen meuhah chuan ‘nitin hian kan pawisa neihte uluk taka chikin, a mawngnawi kan hai a ni’ tiin a sawi leh tawh hial a. May 23, 2020 pawh chuan kan CM zahawm tak chuan CoviD hripuiin sum harsatna namen lo a thlen vangin Mizoram sorkar chuan sorkar hnathawkte hlawh a puk (bat) then sak tur thu a sawi ta mai a. Hei hi thlabi hlawh (gross salary) atangin Group – A te 15%,  Group – B te 10% leh Group C leh D te 5% -a June – August thla chhung, thla thum chhunga pûk sak a ni dawn a, sorkarin sum a neih huna a pung awm loa rulh leh tur a ni a, hetah hian Health leh Home Department te erawh puk sak an ni ve dawn lo niin a sawi a.  Heng sum puk tur zawng zawng zat hi Vaibelchhe 90 tling tura ngaih a ni. Kan tlawm chiang e.

Kohhran lam ngei pawhin he hripui leng lakah hian Pathian kan au nasa tawh a, rampum huap ang pawhin tum hnih lai tawngtai rualna kan lo nei tawh nghe nghe. A hmasa zawk kha March 28, 2020 (Inrinni) zan dar 7;00pm ah thupui 12 lai neiin tawngtaina neih a ni a, a hnuhnung zawk pawh July 18, 2021 (Pathianni) zan dar 7;00pm ah bawk niin hei phei hi chu kan CM ngei pawhin a thlawp viau a ni. Amaherawhchu kan tawngtaina hi kan beisei angin chunglamin  min chhang chiah lo nge hri leng ber lah chuan rem lam a pan thei meuh lo a, CoviD vanga nunna chan pawh ram chhungah mi 125 lai an lo tling ta hial a. Kohhran ho inpawlkhawmna ber Biakbuk ngei pawh khar ngai hialin a awm phah a, CoviD hripui leng vang hian March 22, 2020 atangin Kohhran Inkhawm dar a ri tawh lo a, Dec. 27, 2020 (Pathianni) nen chuan vawi 41 Kohhran Inkhawm kan nei thei tawh lo tihna a ni. Kumin 2021 kan chuankai hnuah pawh Feb. 7, 2021 atang chauhin chhun en laia Inkhawm remtih a ni a, a hnu lawkah kar khata zan thum inkhawm remtih leh a ni a, fimkhur taka inkhawmna neih a ni reng tho a, amaherawhchu April 18, 2021 thleng bak kan inkhawm thei chuang lo a nih kha. April 19 zanlai atangin Lockdown puan a ni a, vawiin (July 20) thlengin kohhran ngei pawh chuan inkhawmna nei thei loin kan la awm reng a. Inkhawm chauh niloin kohhran function pawimawh reng reng pawh neih a remchang lo vek mai a, he hri leng zet hi chuan Kohhran ngei pawh min va tlawm chiang em!

Kan mithiamte ngei pawhin an theihtawp an chhuah a, an tha leh zung pawh an seng nasa ngei mai, amaherawhchu hri leng kan thunun theih phah chuang lem lo a, kum khat aia rei hri lengin min chimbuai tawh hnuah pawh kan mithiamte chuan CoviD lak ata mipuite min hum tak tak thei lo a, vawiinah phei chuan hri kai thar hi 807 lai hmuhchhuah a niin hei hi nikhat thilthua Mizoram chhunga hri kai hmuhchhuah tam ber a ni nghe nghe. A tir phat atangin ramri lamah duty kan indah a, vawiin thlengin kawng pawimawh zawng zawnga duty kan indah vek chungin mipuiah a darh tho a, lohtheihlohin test runpui neih alo ngaih phah ta hial a nih hi. Mithiam an nih avangin an himin an thla a muang bik reng reng lo a, keini mi pangngai tam takte ai hian thenkhatte chuan he hrileng hi an tuar daih zawk ngeiin a rinawm. 

Mipui lam ngei pawhin a tir lamah kha chuan hri leng hi kan pawisa vak lo deuhin a hriat a, man hlauh vang ringawtte khan mask hréng kan awm thin a nih kha. Chumai a ni lo a, dawrah te, khawilo kan kalna hmun reng rengah khan midang hnaih tak takin kan awm bawk a, amaherawhchu vawiinniah chuan mahni Inah kan tawm tlawk tlawk ta thung a, thenawm hnai tak takte ngei pawh kan tlawh ngam meuh ta lo a nih tak hi. He hri leng lakah hian tumah in dah chungnung thei kan awm lo a, mi hausa ber atanga rethei ber thlengin kan zain kan tlawm vek a, kan tlawm chiang kher mai. Hmeltha leh chhia a thliar hek lo a, thau leh cher thliar bawk hek loin tupawh mai chu a laka inven alo ngaih phah a, kan fimkhur ta em em vek ta a ni.  

Heng zawng zawng hi han ngaihtuah ve la, mihring kan lo ropui loh zia leh chapo thei kan lo nih loh zia hi. Kan In ropui leh lirthei changkang neihte chuan min thlamuan zo lo a, kan A/c-a sum awmte lah chuan hlimna min pe tak tak thei chuang hek lo. A nei zawkte ngei pawhin nuamin an awm chuang lo a, a rethei zawkte nen angkhat rengin CoviD hrik tereuhte, mit lawng pawha hmuh tham loh laka him duh vangin nunphung danglam khawpa kan awm a ngai vek tho a ni. Nimahsela hetih hunah hian nghet taka rinna neitute erawh chuan lawm takin hun an hmang thei thin a, thlaphan hunah pawh Pathian vangin hlim takin an awm thei ṭhin a ni.