MIZORAM HI KA RAM A NI - I

Mahmuaka Chhakchhuak

July 6, 2021

Mizoram chhungah ka piang a, Mizoram chhungah vek ka seilian a, mihring huntawp – thihna hial pawh ka lo la tawk a nih pawhin he ramah vek hian phumin ka la awm dawn bawk a ni. He mihring damchhung niah hian hei lo hi ‘Ka Ram’ tih tur hmun dangah ka nei lo a, hei chauh hi ka ram neihchhun a ni. He ram hi a zau lem lo viau mai a, Sq. Kms 21081 chauh a niin, India hmarchhak kil tawpah awmin kan thenawm hnaite chu keini aia lian zawk vek an ni a, ram chhung inrelbawlna kawng hrang hrangahte tunhma lamah chuan keini aia hnuai zawka kan dahte an ni thin tak nain tunah erawh kan chunga leng an ni vek tawh zawk a, hmanni lawka kan hnena mikhual taka rawn cheng ‘Dumka’ kan tih, thenkhatte phei chuan ‘Dumka mihang’ an tih kherte lah chuan keini aia changkang tawh zawkin an leng a, kan hnena inhlawha rawn kal duh pawh an awm tawh loh hi. 

Nimahsela mizo kan ni a, kan hnam tawng ngei kan hmang bawk a, kan khawpui ber Aizawlah ngei pawh khawi lai hmunah pawh mizo tawng a hman theih vek a, sap tawng leh tawng dang reng rengte chu khawlai leh pisa chhung hmun hrang hrangahte chuan kan nek chep hneh hle mai nain kan thangtharte erawh chuan kan hnam tawng chu an lo kaihlek mek a, social media lamah lah sap tawng ni chiah si lo, mizo tawng ni chiah bawk si lo Zo-lish tawnga ziak hmuh tur a tam hle mai bawk. Hetiang zel a nih phei chuan kum reiloteah hian kan hnam tawng ngei hi kan zir thar leh ala ngai hial mai awm mange a tih theih hial. Chutiang bawkin incheina lamah lah a mawi leh a zahawm lam thlu lem loin a changkang lam kan intihhmuh mek bawk a, a neite chuan engtiang pawha changkangin lo inchei pawh nisela a pawina a awm reng reng lo a, neih zawng zawng incheina atana hmang tih hriat chian em em te’n inthlahrung hauh loa incheina atana sum heti zat an han hmang hi chu a zia lo lam a ni. 

Changkang kan duh rualin keimahni zawkin changkan tumin tan lak kan tum chuang lo a, incheina leh Cell Phone changkang tak tak kan nei a, sap tawng kan thiam chhun kawi hnih khat lah chu kan hmang zing hrep lehnghal bawk a, dik mang hlei loin Bryan Adams hla sak mawi em em te chu kan han sa ve mai thin bawk a. Middle School kan kal laia examnaah kan thianpa Rsa’n a thiam loh luat avangin Answer paper-ah chuan ziah tur engmah a hre lo a, paper blank-a dah ai chuan tiin sap hla hi dik mang hlei loin a ziak ta dul mai a, kan teacher ngei pawh chuan thinrim lama la loa a lo nuih kiah kiah ang deuh a ni awm e. Hnam dang tawngte hi chu thiam tur a ni tehmeuh mai nain kan thalai tam takin anazawnga mahni hnam tawng aia an han uar ta thin leh sap tawnga thil ziak tur leh mizo tawnga lehlin tur thil alo awma chhawr theih miah bawk si lo hi chu thil buaithlak tak a ni awm e. 

Mahni chhungkua leh khawtlang pawh kan inenkawl that hman meuh loh laiin kum 2020 march thla atang chuan hripuiin min han tibuai a, nunphung thlak danglam vek ngai khawpin vawiin hun thlengin kan la awm mek a, ram chhungah ngei pawh mi za dawnin an nunna hlu tak an chan phahte hi a thinrimthlak ngawt mai. Hri leng vangin kan nitin khawsak pawh tih danglam a ngai bawk a, engtikah nge min kiansan ang tih lah chu kan mithiamte ngei pawhin an hre bawk si lo. Chutianga kan buai em em lai chuan kan thenawma hnam dangte chuan min la rawn tibuai ve sek mai lehnghal a, ramri depa kan unau awmte an rawn tithlabar a, mi pahnih khat lekin silai keng chunga a za rual tehmeuhin an han hmachhawn chu a zamawm duh ngawt ngei ang. Chutiang chauh la niloin an thlam luah lai ngei chu an han hal sak bawk a. Chutianga kan unaute’n harsatna leh buaina an tawh mek laiin keini, mahni ina thlamuang taka awm chungin social media lamah mahni tawng ngei mai hmangin kan han an-khum tak tak mai thin bawk a nih hi! 

Roreltute lam lah chuan kutdawh chungin tanpuina an sem mek bawk a, sorkar ber lah chu Relief Fund hmanga bungraw lei sak alo ngai a ni chek ang chu nikum (2020) khan cheng Nuaih 537.99 chuang lai thawhkhawm sum kan hmang a nih kha. A lehlamah a tangkaina leh an hnathawh ber pawh kan hriat mumal lohna Board 14 ah lah chuan thlabiin sum Rs. 2, 236, 220/- emaw lai kan seng mek bawkin, chutiang bawk chuan PAHOSS ah Vaibelchhe tel tehmeuh sum kan dah hrang bawk a ni awm a. Thil dang sawi loin heng thil pahnih atana kan sum hman leh dah hrang ringawt pawh hi lehlamah hmang ta zawk ila chuan awmze nei tham tak tur a ni ngei ang le. Hetiang sawi sawi chuan phunchiar chang kan chang duh riau lehnghal a. 

Ngawi reng ila engmah sawi ngam lo chan kan chang leh bawk si, tawng ila tawng thei chan kan chang bawk a, awmdan pawh thiam har tak a ni. Nimahsela Napoleon-a em ni ‘khawvel hi misualte vangin a bawlhhlawh ngawt a ni lo a, mi thate an ngawih reng avangin a bawlhhlawh a ni zawk’ lo ti tawhtu kha. A dik ngawt asin, he kan chenna khawvel hi mi sual leh mi thate’n nitin boruak thuhmun hipa nun kan hmanna hmun a ni miau a, a thenin lem an chang a, a then lemchang thiam hauh loin an nung bawk a, mi chitin chitang kan cheng ho mek a ni hi. Chutiang karah chuan an hmuh leh hriat rengte ngawihbopui mai thin mi tam tak an awm laiin sawi loa awm thei lo mi an awm bawk a. A thenin an sawisel a, a thenin an sawisel lo mai mai ve bawk a nih hi. Kan sorkar meuh pawhin Medical Operation Team (MOT) te thu aiin Sakhaw rawngbawltute’n Lockdown pawhsei leh pawhsei loh chungchanga ngaihdan an thlen chu a pawm zawk a ni lawm ni kha?