HNATHAWHA PATHIAN CHAWIMAWI

Mahmuaka Chhakchhuak

June 20, 2021

Pathian chawimawi hi kan bat a ni a, mi zawng zawng hian kan tih tur pawimawh ber a ni. Nu chhul atangin tap chungin kan lo piangchhuak a, naupang engmah hre lo leh, ngaihtuahna mumal pawh nei loin kan lo seilianin mi pangngai angin kan lo chhuak te hi Pathian vang chauh a ni a, a venna leh awmpuina vang chauha vawiin hun thleng thei kan nih avang hian amah fak leh chawimawi hi kan tih tur pawimawh ber a ni. Vawiin hunah ngei pawh hian ṭhenkhatte chuan natna hrehawm tak an tuarin, oxygen bur nena inchhawpin an marphu chauh ente pawh an awm bawk ang. Chung zawng zawngte chu ngaihtuah ila, kan duh dan dana kan kal a, kan thu a, kan la che vel thei hi Pathian hnena lawmthu sawina chhan tur pawimawh tak a ni bawk thei ang. Natna tuar pawh ni ila, Pathianin engmah hi chhan nei loin a siam lo tih angin amah kan hnaih phah theihna tura a ruahman pawh a ni theiin kan tana ṭha tur zawk pawh a lo ni thei a, thihna hial pawh lo tawkin lo hmachhawn mah ila Pathian hnenah chuan vui tur kan ni chuang lo a, kan tana ṭha lo turin ruahmanna engmah a siam lo ang tih hi kan ring ngam bawk tur a ni.

Nimahsela chutianga Pathian malsawmna tam tak kan dawn lai chuan keini erawhin amah chawimawi dan turah hian kan ngaihdan a inang ta lo a ni. A tam ber hi chuan kohhran kaltlanga Pathian chawimawi hi dik berin kan hria a, ṭha ber pawhin kan hria a. Chutiang bawkin kohhrana chanvo neih leh nihna neih chu intihtheihna atan taka lo hmang pawh kan han awm zel bawk a. Lemchang chungtea kohhranah rawngbawlna neite lehzel kan han awm bawk a ni awm a. Hming bula Reverend tihte Upa tihte Evan tihte chu ropui riaua lo hriate pawh kan la awm ta zel bawk te hi a ṭha vek e. Hengte hi ka sawisel hauh lo nain hengte hian Pathian min hnaih tir phah sela chu a ṭha ngawt ang a, Pathian min hnaih tir nge min hlat phah tir zawk tih pawh mi tam takte hi chuan kan ngaihtuah meuh pawhin a hriat loh a, luakchhuak hlui khawpa lo insuih titiìk peih pawh kan awm bawk a nih hi. 

Nimahsela heng kan nihna leh chanvote hian ram ropui min thlenpui tak tak lem chuang lo a nih hi. Khawvel politics bawlhhlawh ang mai a sakhaw rawngbawltu nih theihna atana pu chûam neih hial alo ngaih takah phei chuan chunglam hian engtin tak lo ngai ang maw tih tur hi a lo ni hial ta zawk a. Kohhran Office ngei ngei pawh ṭawngṭai thianghlim ngai khawpa alo bawlhhlawh tawh chinah phei chuan chunglam malsawmna hi beisei ngam chi loh law law zawk a nih hmel a ni.  Heng vang hi a nia piangthar lo tan chuan kohhrana rawngbawltu nih hi thil chakawm tak a nih loh. Amaherawhchu hengte kan han sawi avang hian kohhran hian Lalpa a hawisan e, kawng a bo e tihna erawh a ni hauh lo a, rawngbawltu fakawm tak tak kara mi tlemte fello awm avang hian kohhran hmel ho alo bal ta thin e tihna mai chauh a ni zawk a. Chung mite chuan sum thianghlim an la ei leh zel bawk avang hian an sim loh a, an bansan loh phei chuan an tawrh tur chu a rapthlak bik ngawt ngei ang le. Cheng sangkhat rû tu leh mi nu uire tu chu a hremna a inang thei ngai lo ang hian sakhaw rawngbawltu ni chunga sual zakkêp neitute chu a hremna a inang thei hauh lo ang le.  

Chanvo sang leh zahawm tak an chan tak avanga Pathian hnaih ta riaua inhria an lo awm a nih pawhin keini sawi phak a ni hauh lo ang a, nimahsela chu ai chuan mahni nihna ang anga Pathian duh dana thianghlim taka nun a hman a, taima taka hna a thawh chuan chunglam malsawmna pawh a dawng zawkin a rinawm. Pathian hnaih tihah pawh hian mahni inngaih aia midangin min ngaihdan hi thil pawimawh tak zawk niin a hriat a, sitting room banga ‘Lalpa, i malsawmna hlu kan engkim chungah alang’ tih thuziak tar chunga Pa berin zu a ruih reng emaw kuttling loa sum a lakluh reng tho si chuan awmzia a awm lo mai thei. Kan mimal nun leh chhungkaw nun zawng zawngahte hian Pathian awmpuina kan mamawh reng tih hi hriat hmaih chi rual a ni lo ang.

Kohhranah leh khawtlang mai niloin Ram rawngbawlna thlengah pawh chanvo sang leh ropui tak tak kan changin kan chelh a ni mai thei bawk e, chung zawng zawngah chuan kan theihna aia Pathian hnathawh alan theihna tura Amah kan hnaih lehzual a pawimawh fo a, tawngtaia inhlanna hun kan nei hman lo a nih pawhin rilru tawngtaina tal kan neih fo a pawimawh a ni. Tawngtaina hi he leia thiltihtheihna sang ber leh ropui ber a nih tlat avangin kan kut mawhphurhna pawimawh tak tak a awm lai leh awm loh lai pawha tawngtaina kan neih fo a pawimawh. Chu tawngtaina avang chuan kan hnathawh pawh alo tluan phah theih bakah finna min pek phah ngei bawk ang. A ni chuan ‘ka mite chuan inngaitlawma an tawngtai a, min zawn a, an awmdan sualte an hawisan chuan van atangin ka lo ngaithla ang’ a ti a ni.  

He khawvelah hian enge min din chhan hi ni ang? Tih ngaihtuahna nei miah loin keini chuan kan tisa duh zawng leh nuam kan tih angin kan tlan mai thei. Mahni taksa pawh hreawm khawpa sum leh pai kan zawnte leh rual pawl hman lo khawpa lehkha kan zir vak te hian kan hlawhtling kher chuang lo thei, naktuka ka hlawhtlin theihna tur atana min tiam thei tumah an awm lo a, hlawhtling tura kawng pawimawh ber zawk chu taimakna a ni. Nimahsela taima apiang an hlawhtling vek chuang hauh lo a, a chhan chu chunglam remruatna chu a pawimawh zawk tlat si a. Hei vang hian engti mi pawh kan ni ang a, zirlai kan ni emaw sundawng kan nih pawhin emaw chunglam atanga min hmu rengtu malsawm duh zawnga hun kan hman phawt chuan lawmna leh hlimna chhiar sen lohin min lo hmuak thei reng a ni. Hei vang hian kan hnathawhna kawng hrang hrangte hi Pathian chawimawina atan alo tling vekin alo hman theih vek a ni.