INBIAKNA HIAN RAH ṬHA CHHUAH SE

Mahmuaka Chhakchhuak

Aug. 5, 2021

August 5, 2021 (Ningani) chuan Assam sorkar aiawhin an Cabinet Minister pahnih, Atul Bora leh Ashok Singhalte chu Lengpui Airport aṭanga Mizoram rawn lutin kan sorkar aiawhin Pu Lalchamliana, Home Minister leh Pu Lalruatkima, I&PR Minister te nen chuan Aijal Club ah chawhma dar 11;30Am an inkawmna an nei a. Hetih lai hian kan Chief Minister chuan Twitter lamah he inbiakna hian Mizoram sorkar leh Assam sorkar inkarah rah ṭha a chhuah ngei a beisei thu tarlangin a hma niin alo puang tawh bawk. 

Tun hnaiah ringawt pawh hian Assam sorkar aiawhte nen ṭum thum emaw lai kan inbiakna alo ni ta a, a hmasaber chu July 9, 2021 niah khan a ni. Hei hi sorkar laipui ruahmannaa state pahnihte inbiakna a niin ramri chungchangah a ni a, Mizoram State aiawhin Chief Secretary Pu Lalnunmawia Chuaungo niin Assam sorkar aiawhin Chief Secretary Jishu Barua te chu Delhi tlangah an inbia a ni. Meeting ah hian Pu Lalnunmawia Chuaungo chuan ramri hrulah hian harsatna awm lovin kum za chuang mizote’n lo neiin an lo enkawl tawh ṭhin tih a sawi a. Mizoram Sorkar leh Mizoram mipuite aiawhin Assam Sorkar chu Vairengte ram chhunga Aitlang-a June ni 29, 2021 atanga Assam police inkulh mekte chu a rang thei ang bera hnuk let tur leh lonei tute thlai leh thlam an tihchhiatte pawh zangnadawmna pe turin a ngen a ni.

 

Chief Secretary pahnihte inbiakna hian inremna an nei thei lo a. An inbiak hnua Union Home Secretary Ajay Kumar Bhalla, IAS hova meeting neih leh-ah pawh an ngaihdan leh duhdan a inmil theih loh avangin State Sorkar thuneitu sang zawkte rawn ve ve a, hmalak zel dan tur ngaihtuah ni se tih a ni. He an thu dah ang deuh hian state pahnih Chief Minister-te chu July 24, 2021 (Inrinni) tlai dar 5;30PM ah Union Minister of Home Affairs Amit Shah hoin India hmarchhak Chief Minister te chu State Convention Centre ah inbiakna an nei a, Assam Chief Minister ngei nen pawh inbiain state pahnih ramri buaina chu a rang lama chinfel thuai a nih theih nan remchang hmasaa Mizoram lo kal turin a sawm nghalin Assam CM ngei pawh hian tihhlawhtlin a tum thu leh Mizoram rawn kal a tum ngei thuin a chhang nghe nghe a nih kha. 

Chief Secretary-te pahnih inbiak hnu lawk July 10, 2021 (Inrinni) chuan Assam sorkar mite’n Phainuam Buarchep hmuna Pu Chalchhunga leileta huan thlai tichhiain kawng an rawn lai lui a, an hnathawk lai chawlhsan tura ngentu mizo nute chu kut an thlak bawk a. Kawng hi meter 100 lai an rawn lai hman nia sawi a ni a, insaseng tura an tih hnu reiloteah Assam Police inpun khawmin hmeichhe Police te nen an rawn thawk tha leh a, mizo lam lah mi 20 vel chauh an lo awm lai a ni bawk nenan lo nawr hneh lo a, Assam Police te hian tiang hmangin kan mizote hi an vaw nual bawk. Silai em chu hmehpuah nilo mahsela Assam lam hian Puan In kaih tur leh Solar Light te nen meuh an rawn thawhchhuah avang hian rawn kal zawk chu an ang lo riau a, awm deuh rih an tum hmel hle a ni. Hetih lai hian kan Home Minister ngei pawhin July 12, 2021 nia Press Conference a neihnaah chuan ‘Thal thlah hmasatu nih hi tha kan ti lo a, amaherawhchu a tul ang zela hma la turin kan sorkar a inpeih a ni. Inkah loh hram kan duh a, a tul a nih erawh chuan kan inkap ang’ a ti nghe nghe a nih kha. 

Hemi hnu hian buaina lian tak erawh chhuak tawh lem loin Assam lam pawh hian ngawih an chuh  deuh ni awm tak a ni a, ramri lamah erawh Mizoram leh Assam State pahnihte hian sipai la awm tir ve vein ralmuang ang reng takin boruak pawh a awm a. July 24, 2021 (Inrinni) tlai dar 5;30Pm a Union Minister of Home Affairs Amit Shah hoa India hmarchhak Chief Minister te chu State Convention Centre ah inbiakna an neih leh hnu lawk, July 26, 2021 ah chuan a hma ang bawkin Assam lam hian ramri hnaihah boruak tha lo an rawn siam leh ta a. Assam Police 200 vêl leh civil mi engemawzât chu Cachar DC, Keerthi Jalla hoin, Assam Police IGP, Cachar SP Shri Vaibhav Nimbalkar Chandra Kant leh DFO te nên an lo kal a. Assam lama CRPF duty post leh Mizoram lama CRPF duty post rawn pal zûtin Mizoram Police duty post chu tam hnehin an rawn luhchhuah ta hial mai! Mizoram Police duty post-ah chuan police 20 emaw lek an awm a  Mizoram Police 20 vel lek tak chuan tharum hmanga ṭan lo khawh ngawt chi a ni lêm lo. Vairêngte mipui lo pungkhâwm chu Assam Police-in tear gas-in an kâp a; tiangin an vaw bawk a. Khatia Mizoram Police-te insaseng rih lâi han hmuh kha chuan an lainatawm a; mipui pawh kha an mangang hle tih a lang. Assam lam hi an rawn thawk rip hle mai a, Ambulance Motor (Doctor & Nurses) Prison Van, Tiang, Tear Gas, Silai leh Bomb te rawn kengin inkah peih atin an rawn thawk chhuak a. Lohtheihlohin Silai pawh a puak ta nge nge a nih kha. 

July 26 nia inkahna avang hian Assam Police 6 leh Civil pakhatte chuan an nunna hlu tak an chanin mi 50 velin hliam an tuar bawk a, mizo lam erawh kah hliam pakhat kan neiin nunna chan hi kan awm lo hlauh thung a, kan vannei hle. Assam lam chu he thihna vang hian an thinur hle mai a, social media lamah an inhrosak dan pawh kan hriat hlawm hi. Hemi ni atang hian Mizoram luhna kawngpui National Highway 306 chu an dang ping bawk a, Rail Way line an tichhe bawk a, Assam CM chuan ramri hnaihah Commando 4000 dah a tum bawk niin a sawi a, Mizoram hnaih tak Lailapurah Armour Vehicle a rawn dah bawk ni tein an sawi a, Supreme Court-a kalah min vau bawk a. Thil dang dang pawh sawi tur ala awm ang a, kan MP (RS) ngei pawh man tumin an veh bawk a nih kha. 

Hetiang hian inbiakna neih a nih hnu lawkah Assam lam hian chet an rawn thawh tlat zel mai avang hian tuna (Aug. 5) inbiakna neih hnu lawkah ngei pawh hian chet an rawn la leh mai lo ang maw tih hi ngaihtuah tham tak a ni awm e. Tuna inbiaknaah lah hian vawiin thlenga kawng dan pin chungchang lam pawh ziah lan a ni lo a, sawi lang thoin an ziak lang lo pawh a ni thei bawk a, amaherawhchu kan mi pawimawh ve ve te laka FIR thehluh erawh keini lamin kan hnuhdawh vek laiin anni lam hian a then chauh an hnukdawk a ni awm a, chubakah damdawi lam mamawh thil pawimawh tak tak te ngei pawh an rawn chhuah duh tlat lo chunga inbiakna kan lo neihpui ta mai hi thil tha tak a ni em tih pawh ngaihtuah tham tak a ni thei ang. Hetianga ei leh bar lama min hrek chung renga inbiakna kan lo neihpui hi a tlawm thlak viau bawkin a hriat a, inbiakna thu leh hla (Statement) ah lah chuan kan buaina ber sawi lan a ni tlat bawk si lo nen. Engpawh nisela, inremna neih hi thil tha tak a ni a, heianga state pahnih aiawhte inbiakna neih hi a lawmawmah ngai ila, he inbiakna hian rah tha chhuah mawlh teh se.