PEIH A NIH HMAA HAWN

Mahmuaka Chhakchhuak

Aug. 14, 2021

Jan. 5, 2021 niah chuan kan Chief Minister zahawm takin Bairabi Kawnpui Lui Bailey Bridge thar chu a hawng a, he Lei (Bridge) hi zoram mipui chawmtu buhfai lakluhna kawng pawimawh taka awm a nih avangin sorkar leh department lam pawhin an theihtawp an chhuah tiin CM chuan a hawnniah hian a sawi nghe nghe. Mizorama chakkhai pawimawh rel (train) chawlhhmun atanga aphur chhuahna kawng pawimawh tak a nih avangin leh helai lei hmasa kha a chak that tawk tawh loh avanga state sorkarin sum remchang ang ang hmanga lei thar siam a nih dan Chief Minister hian a sawi bawk a. He lei (Bridge) hawn tak hi TDR EW 70R with pedestal Bailey Bridge niin, cheng nuai 365 senga dawh fel a ni a. Lei a zuk innghahna (Abutment/ Foundation) hi Contract hranin Mizo in an thawk a, tunah hian River training leh approach hi duh anga la zawh fel loh a ni a, a thawk zo thuai tura ngaih a ni. A Bridge bik chu Essen Infrastructure Pvt. Ltd, Kharagpur ten ni 20 chhungin an rawn dawh zo a ni tiin sorkar thuchhuahin a tarlang bawk a. 

 

Nimahsela he lei dawh hawnna hi a hawnni atang hian hman theihin a awm lo ni awm takin tute emaw chuan BAIRABI LEI HAWN KHA HMINGṬHAT DUH VANGA MIPUI BUM TUMNA A NI tih thupuia hmang meuhin thuchhuah an rawn siam zui nghal mai bawk a. Hetianga hman theih pawh niloa lei hawnga ram hruaitu meuh hawn tir hi a enkawltute thiam loh nge tih pawh ngaihtuah tham tak a ni awm e. Ram hruaitu lu ber Chief Minister meuh hawn tir tur chuan Department lam pawhin a hma lamin theihtawpa inbuatsaih tur a ni a, lei ngei pawh zawh theih a nih zia lantirna atan motor ngei pawh tlan tir nghe nghe tur ni awm tak a ni a, an zawh tir lo tawp tih a chiang reng mai. CM meuh hawn tir hi thil ropui leh lawmawm tak a ni a, ram khat hruaitu an nih avangin mipui pawhin kan ngaihvenin sorkar lam ngei pawhin inbuatsaihna tha tak nei tur a nih laiin hetianga kawng pawimawh tak ni chunga zawh theih tura peih a nih hmaa hawn tir hi intihmualpho tumna a ni zawk hial lawng maw tih ngaihtuahnaah alo awm bawk a. Tun hnua a chanchin hriat leh dan chuan he lei hi thla khat vel lai chu motor zawh theih ala ni lo ni awm tak a ni a, hawnna hun hman zawh a nih hnu lawk atang hian mau hmanga pin lehnghal a ni.  

Hetiang bawk hian Aug. 13, 2021 niah khan Mizoram Chief Minister Pu Zoramthanga chuan KDZKT Road (Khedacherra-Damcherra-Zamuang-Kawrthah-Tuilutkawn road) chu Tuidam khuaah a hawng leh a. He KDZKT Road hi khawthlang mite tan chauh niloin Mizoram tan kawng pawimawh tak a ni a, Tripura leh Assam lam atanga kan chakkhai leh bungrua lakna kawng pawimawh tak a nih mai bakah kan thar chhuahte state pawn lama kan hralh chhuahna kawng pawimawh tak a ni. He kawng hi 84.50 Kms laia thui a ni a, tunhma lama Single lane ni thin a niin Intermediate lane tura siam mek niin kan Chief Minister zahawm tak hian hna la thawh zawh hma hian a hawng leh tiin news lamah kan lo hmu a, a zia lo hle mai. Hachhek tlangdung zawha thenawm state thlunzawmna a nih avang hian a pawimawh hle mai a, chutih laiin a area-a awmte atangin hetiang hian thu leh hla hriat a ni nghal bawk a – Mamawhna avanga lo hawng a nih chuan a lawmawm viau mai; mahse, hna hi thawh zawh ala ni lo a, KDZKT tia hming putu khaw thenkhatte ém pawh ala pawh kim loh laia ram khat hotu lu berin a rawn hawng ngawt mai hi chu a fuh lo deuhin a lang, Inkalpawhna lei thenkhat pawh siam a la ni lo bawk nen, Tunah chuan an hawng ta rau rau bawk a, thawk zo thuai turin hma la nghal se a duhawm khawp mai. Bial hmasawnna tur a nih chuan kan theihna zawnah thawhpui pawh kan inhuam reng a ni – Lalvansanga Pautu. Chairman, Hechhek Constituency Development Committee.

Hetianga kawng pawimawh tak kan ram hruaitu hawn atana kan hmanhmawh thin ta mai hi enge maw a chhan ni ang le. Kan Chief Minister ber hi chu a demawm pawhin a hriat loh a, alaka tlaktum tum mi thenkhatte thiltih a ni zawk ang em tih rilruah a awm zawk a. Kan CM hi chuan a department enkawl nimahsela ram khat hruaitu ber a nih angin thil dang dangah buaina a ngah ngei ang tih hriatsa a ni a, Department Officer-te emaw CM Adviser-te emaw fellohna zawk pawh a ni mai thei e. News hrang hrangah alang lo thei si lo a, keini chauh niloin hmun hran hran atanga an lo hmuh ve bawk thin avang hian kan CM chauh hi a mualpho a ni lo a, mipuite tan ngei pawh a mualpho thlak a ni. 

Bairabi Kawnpui Lui Bailey Bridge hawnna ngei pawh a hnu thla khat velah chauh lirthei a tlan thei a ni a, khatiang kha a vawikhatna ni hiala hriat a ni awm e. A mak a, hriatthiam a har a, kan CM tihmualpho tumna em ni zawk ni hial ang tihte pawh ngaihtuahnaah a awm phah a ni. A nih loh vek chuan kan CM hian helai lei hi hawn a chak ve hrim hrimin alo hmanhmawh pawh a ni thei zawk.  Tunah hei thenawm State nena inpawhna kawng pawimawh tak mai kan CM bawkin hna pawh la thawhzawh a nih hmain a han hawng leh hi chu hriatthiam a har tawh hle mai a, khawvel hmundangah hian hetiang hi a la thleng kher bik awm lo e. Engvanga heti taka kawngpui hawnna hun hman hi hmanhmawh nge an nih tih hi enquiry lakna tham ni hialin a hriat a, a zahthlak hle a ni. Kan sorkar hian engmah thawm a neih loha a reh mai a nih phei chuan sorkar lam chu a mawhphurtu an ni emaw tihna a ni ang a, mipui lam chuan sorkar kan dem ngeiin a rinawm a, hetianga peih a nih hmaa ram hruaitu hawn tir hi sorkar lam hian a remti ang hial pawhin kan ngai ngei ang.

 

Kan ram hruaitute hi fellohna tam tak chu an nei ngei ang a, nimahsela Pathianin tun hun atana ram hruaitu atana min pek a ni tih hi kan pawm a tha ang. Amaherawhchu hetianga thil pawimawh leh hnam tan ngei pawha ro thil tak tak hawnna hun meuh hmang tura hun pawimawh an hman dawn hi chuan anmahni niloin Department lam hruaitute hi an pawimawh tawh zawk thin a, kumin ngeia kan ram hruaitu berin peih a nih hmaa Lei leh Kawng hawnna hun a han hmang mai hi dem tur zawk hre chiah lo mah ila thil zahthlak tak a ni a, a hnam ang pawha mualphona a nih theih avangin nakin hnu zelah pawh chin chhunzawm tlak loh tak tur thil a ni.