RAMRI LAMA KAN HRIATTHIAM LOHTE

Mahmuaka Chhakchhuak

Aug. 7, 2021

RAMRI CHIN NIA SAWI HI THU MAI EM NI:

District Council hnuaia kum hnih (2) kan awm hnuah, Feb. 2, 1972 ah Union Territory- a hlankai kan ni a, North Eastern Area Reorganisation Act hnuaiah UT ramri atan chuan District Council ramri chu chhawm zui zel a ni a. Union Territory-a kum 14 vel kan awm leh hnu, Feb. 20, 1987-a State-a hlankai kan lo nihah pawh khan UT ramri bawk chu chawm zel ala ni. India leh MNF te’n inbiakna an neih kan mipuite chuan ramri chungchang hi an rawn chingfel ngei turah ngaih a ni nain Memorundum of Settlement kha an rawn sign ta si a. Hei hi vawiin thlenga kan ramri pawm tlan chu ala ni ta zel a. Hun a lo kal deuh a, MNF chuan kum 2018 General Election-ah hnehna changin sorkarna an siam leh a, MNF Ministry chuan July 8, 2019-ah Cabinet Meeting chuan Mizoram ramri chin atan Bengal Eastern Frontier Regulation 1875 chu ramri atana an pawm thu an han pass leh hnuhnawh a. Hei chiah bawk hi Mizoram Boundary Committee chuan July 30, 2021 khan alo pawm nawn leh thu an sawi a. 

 

Hetiang a nih vang hian kan sorkar hian Ramri atana kan pawm chin hi a thu lamah sawi chiang viau mahsela a taka a tihchian a ngai a ni. BEFR 1875 hi a thu chauha kan pawmna ala ni rih hmel a, kan sorkar hian Official Map pawh siam ni ngei sela, ramri chin tichiang turin Boundary Pillar phun ngei bawk sela, fiah leh chiang takin zoram mipuite min hrilh hre ngei rawh se. Hei hi tun hnaia Official lam inbiaknaahte pawh hian sawi rik a ni lo nia hriat a ni a, Aug. 5, 2021 nia State pahnih aiawh inbiaknaah ngei pawh khan sawi rik a ni lo hi thil mak tak a ni awm e. Hei vang hian keimahni leh keimahni hriat tur atana kan ramri pawm chin sawi nawn leh ngawt hian awmzia a awm tam vak hmel loh a, mipuia boruak siam tumna chauh niin a hriat. 

 

STATE PAHNIH AIAWH INBIAKNA KHA:

Aug. 5, 2021 (Ningani)-a Aijal Club-a State pahnih aiawhte inbiaknaah khan Joint Statement siam a niin point 1 – 4 thlenga siam a ni a, chuta a pahnihna chu The representatives of Government of Mizoram convey condolences for the loss of lives on 26th July, 2021 and convey best wishes for speedy recovery of those injured tih hi a ni. A thu hi uluk takin han chhiar ila, hetiang taka kan sorkar a han inphahhniam thei hi a mak a, hetiang tak hian kan sorkar hian Assam sorkar hi alo hlau ta a ni maw tih mai tur a ni awm e. Kan Home Minister ngeiin Thal thlah hmasa nih kan duh lo e a tih lawm lawm hnuah lohtheihloha thal an rawn thlah hmasak tak siah chuan kan kap let ve chauh kha a ni a, chumi avanga thihna lo thleng chauh a ni. Assam lam hian ngaihdam min dil tur zawk an ni hliah hliah a, nunna chan awm chiah lo mah ila, khami avang hliam kan neih ve tho avangin kan hliam neihchhun hi pakhat chauh pawh nisela Assam sorkar hian a kanna pe hial tur zawk an ni a sin. Chutiang pawh niloa ‘Mizoram sorkar aiawhte chuan 26th July 2021 a thite a tuarpui a, inhliamte dam leh thuai turin duhsakna a hlan’ han tih hi kan tih loh tawp tur niin a hriat. 

Khawvel sorkar hrang hrang inkahna leh inbeihna hmuna tihte hi hetiang ang hian intawrhpuina thu an sawi hi hriattur a awm hi a rinawm chiah loh. India leh Pakistan inkarah pawh a awm a rinawm loh a, Afghanistan leh US inkarah pawh a awm a rinawm hek lo. Dik takin sawi ila, Assam Police 200 rualin Indona hmanrua leh Ambulance te nen hiala Vairengte dai an rawn thleng kha a thinrimthlak a, a huatthlalaawm ngawih ngawih a sin. Chumi chauh pawh niloa kan sipaite awmna tur bûk an han chhuhsak mai te leh silai an han hmetpuak hmasa zawk te kha eng levelah pawh hian thinrim thu sawi char char tur nia kan hriat laiin kan hotute erawh chuan khami vanga thite tawrhpuina thu an han sawi ta mai a, hliamte pawh dam thuai tura duhsakna an han hlan ta mai hi an inbiakna zawng zawng kan hriat ve loh vang pawh a ni ang a, flag var zar aiin a ropui chuang hlei lo ang e. 

 

Tin, August 5, 2021-a Mizoram leh Assam sorkar aiawhte inbiaknaa thuchhuah intawm an siamah hian Economic Blockade hi sawi hmasak ber tur nia alan laiin an sawi lo nge thuchhuahah hian tarlan tel a ni lo hi thil mak tak a ni.  July 26, 2021 ni atanga kawng an dan tawh chu hei Aug. 7 zan dar 7;15 Pm thlenga la dan char char a ni a, Ni 12 chuang kawng hi an dang tawh tihna a ni. Kan ei leh in tur lakluhna kawng pawimawh ber a ni a, chu chauh niloin Damdawi lam thil pawimawh hrang hrangte pawh an dan vek bawk avang hian keini lam hian kan nawr dan a dik lo nge kan nawrna tawk lo zawk ni ang tih pawh hriatthiam har tak a ni. Heng mai bakah hian tunhnai hian Social Media lamah kan Minister zahawm tak takte leh Assam CM leh Minister te nena an thlalak dunna hmuh tur alo awm thar leh ta bawk zel te hi Nationalist thinlung mit atanga thlir phei chuan mit ti mimtu lian tak a ni thei awm e.  

Ramri lam hi Party Politics-a hamthatna lak chi pawh a ni lo a, tu party tan pawh hian party mala beih chi a ni hek lo. Tanrual hun a ni a, tha taka thawhhona hun zawk a nih avang hian kan mizo thinlung tak nena kan tanrual a ngai zawk a ni. Kum 2006 daih tawhah khan Assembly House-ah Boundary Commission din turin Central Sorkar-ah thlen ni se tia rél a ni a, chumi bawhzui chuan Home Department pawhin document tam tham tak khawnkhawmin PM hnena thehluh tur Memorandum chu July, 2007-ah an peihfel bawk a, mahse he Memorandum copy hi engtin nge a kal zel hriat a ni ta lem lo a. Hemi chungchangah hian ZPM MLA Pu Lalduhoma chuan kum 2019 khan Assembly House-ah zawhna a siam a, Memorandum copy hi thehluh a nih leh nih loh thu hi Home Department hian an hriatpui loh thu in an chhang a. Heng bakah hian Ministry of Home Affairs (MHA) chuan Mizoram Chief Secretary hnenah ramri chungchanga Mizoram sorkar ngaihdan sawifiah tura a tihna chu Dec. 26, 2018-ah a rawn thawn a; chumi hnu, kum 2019 chhung khan reminder vawi 5, February 20, April 10, May 19, August 16 leh September 24-ah te a thawn leh pawh chu Mizoram Sorkar hian Ministry of Home Affairs-ah engmah chhanna a pe lo niin JAC hruaitute tawngkam atangin kan hre bawk a.  

Hriatthiam loh hi a va tam ta em!