THIS IS MIZORAM - XXVI

Mahmuaka Chhakchhuak

Aug. 10, 2021

Kum 20 vel zet kal tawhah khan thingtlang khaw pakhatah hian kan kal a, chu khuaah chuan lirthei a la lut thei lo a, Khaw hnai ber atanga kea kal ngai hi a ni. Nimahsela khaw taihma tak khua an nih avangin rangva In a lo awm thluah a, In engemawzatah chuan a bang atan tile hmang an awm bawk a, thenkhatte phei chuan an In bante chu RCC hmangin an lo chhung bawk a. Khaw fakawm tak an niin ka hria a, an khaw panna atan hian khaw hnai ber atang pawhin 20 Kms vel kea kal ngai a ni a, heng hmanraw tha leh tlo zawkte hi an phur luh dan turte ka ngaihtuahin ka fak viau a ni. Hetiang chauh hi ala ni lo a, Television signal manna Antenna bial lian tak chite kha nei an awm fur bawk a, lirthei lut lo khuaah chuan khaw changkang tak an ni. 

Amaherawhchu khaw chhuanawm tak an ni nain heng an thil neih ropui tak takte hi a tulna leh mamawhna vanga an neih nge ni ang a, an intihhmuh vanga nei ve ta mai zawk ni ang tihte ka rilru alo awm nghal bawk a, keini lo sawi phak chu a awm hauh lo nain keia lo ngaihdanah chuan tul lo tih a awm nual mai. Mizote hi thil intihhmuh ching tak kan ni a, vawiin thleng hian kalphungah kan la nei zel ni bawkin a hriat. A tha lamah chuan intihhmuh chu thil pawi lo tak pawh a ni ang a, amaherawhchu kan mamawh leh ṭangkaipui tur a nihna lam pawh thlu lem lo a sum tam tham tak hmanga neih ve mai te pawh a awm bawk thei ang. Hman kum lawka sawhthing rate that deuh tumah pawh kha khaw pakhat chuan an hlawkpui viau maiin In tin deuh thawhin Two wheeler an neih tak kha maw le. 

Tunlai hunah ngei pawh hian thenawmte neih avanga neih ve tum tlat mi hi sawi tur an la awm thluah mai a, Aizawl khawpuiah ngat phei chuan Computer neih kha kan intihhmuh nasa a nih kha. Mi tam ber kha chuan hla ngaihthlakna atan kan hmang a, film enna atana hmang kan awm bawk a, nileng lenga Computer hmaa thu pawh kan tam thin viau kha. Nimahsela Economy lam atanga thlir chuan sum tam tham tak sen thlawnna mai a nihna lai a awm thei bawk a, vawiinah erawh chuan tangkai takin kan hmang ta zawk a nih hi. Tun hma lama tlangvalin zan rei tak tak thlenga Computer hmaa earphone vuah chunga an thut kha a lawmawm vak loh nain tunah erawh zan rei tak tak thlenga Games khel ni lo a Computer thutchilh peihte chu fakawm tak an ni ta zawk a, hei hi a chhan ni a lang chu a boruak alo danglam tak vang leh kan rilru puthmang alo dik tak vang zawk a ni ngei ang. Heng atang ringawt pawh hian hmasawnna tam tak kan neihte hi sawi tur a awm thei ang a, khawvel her danglam ruala kan in herrem ve thei zelte hi thil tha tak a ni thei a ni. 

Hetianga kan sawi lai hian kawng lehlamah chuan kan hmasawn hleihtheihlohna lai hi sawi tur tam tak a awm thei bawk a, a hahdam zawnga rilru put a, mahni aia hniam leh dinhmun chhe zawkte ngaihtuahna avanga kan awmdana lungawi thei mai zel mi hi chhiar tham fe kan awm ngeiin a hriat. Hei hi kan hnam saltanna lian tak a ni thei bawk ang a, a hri man ngheh tawhte lah hi a man nghet thei fu bawk lehnghal a, inkai darh awlsam tak a nih bawk avang hian nakin lawkah chuan kan la boral phahna tur te hial pawh a ni thei a ni. Pa pakhat pawh a nupui fel lohna an hrilhin ‘in nu hi zilh deuh teh, pawn lamah hian tlangval kawp a neiin an sawi thin a nia’, an tih pawhin a ni chuan ‘keini pawh hi engmah kan nih bik loh hi’ alo ti sam et mai a a hahdamthlak viau a ni awm e. Hetianga thil tha lo pawh pawmzam theih maina thinlung nei chunga ni leh thla hmang liam fo thin hi kan lo awm thluah a nih phei chuan a zia lo hle ang. 

Mimal leh chhungkua mai pawh niloa sorkar kalphung hrim hrimah ngei pawh hian kan ram hian beisei aiin hma a sawn lo tihna hi kum rei tak liam tawh atang khan sawi rik fo a ni a. Hei hi kan ram hruaituteah thil tam tak a innghat thei ang. Sorkar inthlak pawh kan hrawn tawh thin a, mipui hnena an in zawrh anga an awm loh fo mai bakah beiseina thar nei thei ngai tawh lo tur hiala bei ti dawngtu hi tun hnuah hi chuan mipuite hian inthlahrung hauh loin an sawi bawl bawl tawh hial mai a. Chutih mek laiin Sorkar hruaitu lam atanga insawifiahna thu hriat tur a han awm leh thinte ngei pawh hi hmasawnna rahbi rahna a ni vek theiin a rinawm loh a, tawngkam bungraw thar chherchhuah leh thinte pawh hi nuih tizatu mai a nih zawk chang a awm fo bawk thin. Ram hruaitu nih hi tlin har tak tur pawh a ni nain a thutthlenga thut hi alo nuam em ni tur a ni a, mi tam tak hi chuan mawi leh mawi lo pawh sawi loin kan chuh ta chiam mai thinin, hmanraw thianghlimin a daih loh huna hmanraw bawlhhlawh la hmang hreh lo hi kan la awm leh zel zawng a nih hi. 

Kan hruaitute thinlungah hian a chang chuan ram changkang tak leh nuam tak ni thei tur hian ngaihtuahna a awm thin ngei pawhin a hriat a, hetiang lam hawia awihawm taka an han sawi thin hi chuan mipui lam pawhin kan lo phurin Pathian min pek ram hruaitu ni ngei turin kan han sawi leh mai thin bawk a. Amaherawhchu an sawina chilper pawh ala ral hma hauhin anmahni atang ngeiin mipui lamin beidawnna kan nei leh mai thin bawk si a, thaw loin vuivaina thu hlam chen chen kan sawi leh thei mai thin a nih hi. Hawh teh u, he ram hi hmangaihna tak tak nen enkawl theuh ila, keimahniin a rah kan seng hman lo a nih pawhin kan tu leh fate tan ram nuam leh duhawm zawk din thei turin ngaihtuahna pawh i hmang zawk ang u tiin thu tha tak pawh han sawi ila thenkhatte thinlung hi chu a chawlawl tlat emaw tih mai tur te hi a ni ang lawi a. Amaherawhchu kan duh emaw duh lo emaw nakin lawkah hian keini aia ram leh hnam vei zawk tute hi an la rawn chhuak ngei ang a, anni chuan he ram hi an la rawn khaichhuak tho thoin a rinawm.