BAPTIST COVID CARE CENTRE

Mahmuaka Chhakchhuak

Sept. 20, 2021

 

Sept. 20, 2021 ni khan BAPTIST COVID CARE CENTRE, SERKAWN tlawhin a hmun ngeiah ka han belchiang a, Baptist Kohhran hnathawh ropui leh chhuanawm tak tak ka hmuhin lawmawm ka ti hle a ni. 

CoviD hripuiin Zoram mai bakah khawvel nunphung buai vek khawpin min chenchilh a, tumah thliar bik pawh nei chuang loin min hrut rual vek mai bawk a nih hi. Damlo enkawltute ngei ngei pawh zuah bik loin a luhchilh ve tho a, kum upa lam lah a kalkan bik chuang hek lo. Sept. 19, 2021 (Pathianni) report naa kan hmuh danin Mizoram chuan nikhata CoviD hri kai hmuh chhuah thar tam lamah ni 27 chhung a zawnin hmarchhak State 8 zinga a sang ber nihna kan hauh a, hri kai hmuhchhuah zinga 58.23% chu Mizorama hmuhchhuah a ni.

Hetiang hian Mizoram chu min luhchilh hneh ta hle mai a, April thla atang phei kha chuan thla khatah sang chuang hlir kai thar hi hmuhchhuah ala niin July thla atang phei kha chuan sing kan kai chho ta hial reng a nih hi. Sept. 20 thleng khan CoviD hri kai hmuhchhuah thar hi 20,612 an tling tawh a, naktuk lamah pawh hian kan tlem duaiin a rinawm chiah loh nen, heti reng a nih chuan kan hmabak hi a eng rih lo mai thei a, ei leh bar zawnna lamah lah harsatna kan la tawk reng bawk nen harsatna thuah hnih thuah thumin kan tawk a ni ber mai.

Sorkar lam atanga kan inkaihhruai dan leh enkawl dan ngei pawh thenkhatte chuan an sawisel nasa a, Mizo zinga mimala CoviD chanchin buaipui peih bera chhal ngam Pu Huna Kawlvawm chuan Mizoram ber hauhna tiin hetiang hian a sawi nghe nghe a:

Population atanga teha nitin hri kai thar tam ber

Population atanga teha hri vei mek (active case) tam ber

Hri kai zat atanga teha dam (recovery) hniam ber

Za zela teha dam zat tlem ber

Dam thang muang ber

Hri kai zat atanga teha thi thang chak ber

CoviD sample test-na atana Rapid Antigen Test hmang nasa ber

Hetiang a nih mek avang hian Baptist Kohhranin CoviD Care Centre an buatsaih hi mipuiin kan chhawr hle mai a, damlo khum pawh 24 lai awm mahsela a ruak hi a awm hman meuh lo a ni. Thawktute ngei pawh Serkawn Hospital atangin an pawt peng mai thin a, Office work lam khawih tur erawh a hranpain an awm tho bawk. Nurse te erawh chuan ni 20 vel kar dana inthlakin a hmunah an inriah chhawk thin thung a, an hah thin hle. Mahnia eirawng inbawl chawp an ni bawk a, an buai ve thin viau a ni.

Baptist CoviD Care Centre awmna hmun hi a nuam hle mai a, tlangchhipa awm a niin Baptist kohhran hmun tho a ni a, thawm a rehin thing sang tak taka dingte chuan a hual khup bawk a, a boruak pawh khawpui chhung ai chuan a hrisel bawk ngeiin a rinawm. Lirthei thawm bengchheng a awm lo a, a fianrial that riau avang hian damlote tan ngei pawh dam a awl phah bik ngei ang le. Tui lam pawh hnianghnar takin an dawng a, a hmun leh hma pawh a felfaiin enkawl that tih a hriat ngawih ngawih avangte ngei pawh chuan a hahdamthlak hle bawk a ni.

Baptist CoviD Care Centre hi kan hriat angin July 28, 2021 nia hman theih tura hawnna neih chauh kha a ni a, Baptist Administrative Department enkawlna hnuaia awm a ni. A bul tanna atang hian Doctor 1 leh Nurse 3 te chu damlo enkawl tu tur atana ruahman a ni a, vawiin thlengin hetiang hian la kalpui a ni.

Hetianga Baptist Kohhranin CoviD Care Centre a buatsaih hi thil lawmawm tak a ni a, Lunglei mipui bik tan leh kohhran bik pawh thliarna engmah awm loa mi zawng zawng tana an buatsaih hi an fakawm takzet a, Chunglam malsawmna pawh an dawn tam lehzual ngeiin a rinawm a, hriatreng tlak bawk a ni. Kan hriat theuh angin Mizoram chhungah ngei pawh CoviD vanga nunna chan 260 chuang lai kan lo awm takah phei hi chuan ralpui phiar taka kan vei tlan a ngai takzet tawh a, CoviD vanga nunna chan hi pumpelh theih hram nisela a chakawm takzet a ni. Kohhran malin CoviD Care Centre an buatsaih hi a lehlam kawnga ngaihtuah chuan Sorkar hmalaknate hi rintlakin innghah ngam nisela chuan thil tul tak pawh a ni lo mai thei a, nimahsela a bik takin Lunglei khawpui leh a chhehvel mipuite tan phei hi chuan a lo tul hle si a.

Tuna khum 24 lek awm theihna tura buatsaihah ngei pawh hian damlo hi an khat reng mai bawk si avangin Sorkar lam atangte hian Building sak belhna turte hi sum leh pai thehchhuak thei hlauh sela a duhawm rualin chulam erawh beisei ngam chi pawh a nih hmel chiah bawk si loh a, kohhran mal ringawt tan chuan hautak tham tak tur a ni. Kohhran ber pawh chuan sum leh pai a lakluhna chu kohhran mipuite a nih tho bawk si avangin hetianga ei leh bar zawnna kawnga harsatna kan tawh nasat takah hi chuan sum leh pai lut hi a tam lo mai awm mange tih a rin theih mai bawk si a, kohhran hruaitute lu a hai duh ngawt tein a rin theih mai awm e.  Amaherawhchu Chunglam zarah an ngeih bik kher chuan a rinawm loh.

Lunglei leh Chhim lam mipuite tana hriselna kawnga sorkar hmalakna duhkhawp lohna hi a na hle mai a, hei Rt-PCR Laboratory din chungchanga thu a kalkualna pawh kum khat aia rei alo ni ta mai a. June 17, 2021 daih tawha Laboratory dahna tur Building atana ruahman pawh hmanhmawh taka a hmun leh hma laih a nih nen hei thla thum hnu (Sept 20) ah pawhin a building ban tur ber pawh phun ala ni chauh mai bawk si a, engtikah nge luah theih tura peih a nih ang tih pawh sawi thiam har tak ala ni rih bawk si. Chutih mek laiin Lunglei District chhunga CoviD cases nei pawh sang nga chuang lai mai an lo awm ta bawkin CoviD vanga nunna chan pawh 6 lai an lo awm tawh bawk avangte hian a enkawlna lamah induhthawhna a na hle mai. Baptist Kohhrante hian nakin lawkah hian kan tlin tawh ngang lo a ni an tih phei chuan manganthlak tak tur a ni a, Lunglei District chhunga mipuiin an aiawha an thlanchhuah MLA te lahin thu leh hla reng reng an nei bawk si lo lehzel avangte hian a tuar tur berte lah chu mipuite bawk kan ni dawn bawk si. Hei vang hian tuna BCCC awmchhun hi kohhran mal chauh pawh niloa sorkar leh mipuite ngei pawh hian hmangaih taka kan enkawl a pawimawh hle awm e.