‘BER’ THLA KAN THLENG LEH TA

Mahmuaka Chhakchhuak

Sept. 1, 2021

Hripui lengin kan nunphung min tihbuai mai bakah mi engemawzatin nunna hlu tak an chan bawk a, kan ramchhung ngeiah pawh kan hmangaih tak takte an boral a, a boral lote pawh ngaihṭha takin kan awm thei chuang lo a, nitin inkharkhipin hun kan hmang kumtluan a nih tak ber mai hi. April 20 aṭang ngat phei kha chuan khuahkhirhna khauh tak nen kan inkharkhip a, ṭhenawmte nen ngei ngei pawh inlenpawh a rem lo a, hun danga kan tih ngai loh takin chhungkuain Inah kan tawm ṭhap hlawm a. Hri lak aṭanga him a ngai a, dam a ngaih bawk avangin mi hausa leh rethei min thliar bik chuan loh avangin mi zawng zawng kan buai vek a, a ṭhente chuan a bika enkawlna hmunah kan han awm ren rawn a, chu aia ziaawm deuhte lah chu home quarantine, home isolation tein kan han awm bawk a. Vawi tam tak hnar hawlh ngaia awmte pawh kan awm bawk a nih hi. Engpawh nisela, nang leh kei chu kan la vannei rih e, kan ram chhung ngeia hripui vanga nunna chan 200 chuang lai awm tawhah keini chu kan fel bik vang pawh ni hauh loin min la zuah rih a, lawmthu i sawi ang u.  

Eizawnna ngei ngei pawh buai khawpin kan awm a, zirna lamah pawh pangngaiin kan kal thei lo a, Biakbuk ngei pawh kan pan thei lo lehzel bawk a, a thinrimthlak viau nain tih vak ngaihna a awm chuang si lo. Nimahsela chuti chung pawh chuan kan ti nek nek a, hei ‘Ber’ thla chu kan thleng rual leh vek tho a nih hi. Nakin hnu lamah hian enge kan tawn dawn a, enge kan hmabak tih erawh kan hre lo nain kum hmasa lama Beihrual thla kan hman thin ang hun kan han thleng leh thei hi lawmna chang kan hriat chu a ngai ngei tho ang. Kum dangah kha chuan Kohhran Inah emaw Biakbukah emaw beihrual neiin zantin kan inkhawm thin a ni a, a chang phei chuan ruahsur hnuaiah nihliap nen kan kal hram hram thin a nih kha. Tunah erawh hrileng avangin mahni Inah tawm ṭhap alo ngai ta zawk si a, a lunglenthlak mang e tih leh mai loh chu sawi tur a vang a nih hi maw le.  

Thlawhma lamah erawh tun hun hi boruak nawm lai tak hun a ni a, lo zawh hun thla a ni tih pawh kan hre hlawm ngeiin a rinawm. Mizo nuna lo zawh boruak nawm zia leh hlimawm thin tak hi ṭhangthar tam takte chuan an hre kher awm lo e. Ṭhen leh rualte nen lo zawhna hun hi hman thin a ni a, hlo thlawh tur tak tak phei chu awm tawh lo mahsela a hming lekin buh kara hnim to tlem tlemte chu an han thlo puat puat hlawm a. A thenin thlam tlaitlan atangin Fanghma chhip an han thlawh vang vang thin bawk a, Ṭingṭang nena zai an lo awm bawk nen he hun hi Mizo pipute hun atanga loneitute’n hun hlimawma an neih a ni a, vawiin hun thleng hian khawi lai hmunah emaw chuan hmang pawh an la awm ngei ang. Kum 2015 ah phei kha chuan kan ram hruaitute (Minister-te) ngei ngei pawhin Ratu khaw lamah Lozawh runpui an hmanpui a nih kha. Ratu khua atanga 8 Kms vela hla, Buallawn zau-ah lozawh runpui hi hman a ni a, chhungkaw 115 zette chuan helai hmunah hian thlawhhma neiin kumtluanin hun an hmang a, ram hruaitute hoin lozawh runpui hi hlim takin an hmang a ni. 

‘Ber’ thla hian mizo nunah awmze thuk tak a nei a; kumtluana hah taka thlawhhma neite tan hahchawlh theih tawh hun a niin, favang boruak nawm hun alo thlen tan lai a ni a. Buh leh bal bakah thlai dangte rah seng tan a lo nih tawh bawk avangin mi tamtakte chuan thingtuah la tein hun an hmang tawh zawk thin a. A ṭhente lahin ram lamah thangkamin hun an hmang bawk a, nu ho lahin puantahin in lamah hun an lo hmang thin bawk a, mahni duh zawng zawng leh nuam tih dan danin he hun hi hmun tinah hman thin a ni ber mai. Nakin lawkah Buh seng mai tur a nih dawn avangin chumi hun atana inbuatsaihna atan te pawha he hun hi hman ṭhin a ni bawk a, Buh vuakna tur Hruih laih zawlna atante an lo hmang bawk thin. Nula tlangval inngaizawngte tan phei chuan he hun hi hun hlu tak a niin chhungte telloin thlawhhma lamah chawhmeh zawnga chhuahna hun atana hman thin a ni.  

Ruahtui la tla ngei pawh chu alo hul tan a, zan lamah boruak a thiang nuam bawk a, chhun lamah pawh boruak a lum lutuk lo a, a vawh lutuk loh bawk avangin he hun hi a nuam em em thin a, mihring tupawh kan harhvan hun lai tak a ni. Thlawhhma lamah thlai thar tam hunlai a niin Vaimim, Fanghma leh thlai dang dangte ei tur a tam bawk a, Maian sih tur a tam bawkin Maite ngei pawh lawh tur a awm bawk a, Bazaar lamah pawh chawhmeh tlawm lai hun tak a ni bawk. Sumdawng mite lahin he hun hi kumtawp lama thawmhnaw thar zawrh tur inlakkhawlna hun atan ram hran leh hmun hla tak tak amite an ngaihven hun lai tak a ni bawk a, kumin ngeiah pawh hian hri leng alo ziaawm deuha kan inkhawm theite a nih ngat chuan khawpui lama kan hmeichhe ṭhenkhatte chuan eng thawmhnaw thar emaw tak chu an rawn nei ngeia ring an awm nghe nghe. 

Khawvel hi ṭhenkhatte tan chuan danglamna awm lo, pangngai reng ang a nih laiin ṭhenkhatte tan chuan nitin hi thil danglam hmuh a, hriattur hi a awm reng bawk a, kan ramah ngei pawh kan Pathian biak dan thlengin thil danglam tak tak hriattur a awm ta a nih hi. Nimahsela danglam ve ngai lo pakhat chu Favang boruakin thinlung a khawih dan hi a ni. Ṭhenkhatte chu an mittui a kochhuak hial a, thenkhatte lahin kum kal lai mek hi zo vat vat se an lo ti bawkin ṭhenkhatte lahin kum kan hmang liam mai tur hi an lo ui thung a. Kum upa lam tan ngat phei chuan he hun hi nunhlui ngaihna hun tak te pawh a ni ta ve ngei ang le….