HET SHALLA

Mahmuaka Chhakchhuak

Sept. 26, 2021

 

Tiau Track hla sak ‘Het Shalla’ kha vawi tam ka thlir tawh a, vawiin thleng hian ka mit an la ti tlai reng tho mai. Mipa pahnihte zei hawh hawh dante khan min ti nui leh fo thin bawk a, lawm an hlawh hle a ni. An hla sak erawh chuti takin lung ti lengtu a ni lem lo a, an music video thlir paha lo phun pui ve atan erawh a rem ngang thung. Mitthlaa an lam lai hmuh loh phei chuan chuti taka sak pui hluah chi a ni chiah pawhin ka hre lem lo a, zan khaw tairekah pawh lung ti lengtu tak chi a nih chiah bawk lem lo. Chutih chung si chuan mahnia awm pawhin ‘Het shalla’ tih fo mai a awl phian mai a, hla zangkhai tak leh ho ang reng tak a ni chungin pawnlang taka thinlung a hneh dan erawh sawi thiam har tak a nih si hi.

Tuirial Bialtu MLA chu vanduai thlak taka Aug. 17, 2021 nia alo boral avangin a hmun ruak hnawhkhah leh a ngai lo thei lo a, chumi avang chuan Election lam pawhin Aug. 18, 2021 ah Tuirial bial chu bial ruakah a puang nghal bawk a, Election lam hi an hmanhmawh khu-ruai deuh nia alan laiin hun kaltawh kan thlirin an tihdanphung pangngai tak alo ni zawk awm e: Chalfilh bialtu MLA, Pu Chawngtinthanga chu Sept. 16, 2012 ah a boral pawh khan a tuk mai, Sept. 17, 2012 ah Election chuan Chalfilh bial chu bial ruakah a lo puang ve tawh tho a. Chutiang bawkin East Tuipui bialtu MLA, Pu B. Lalthlengliana ngei pawh April 15, 2013 ah a boralin Election chuan April 15, 2013 ni hian bial ruakah alo puang tawh bawk a, Lunglei South bialtu MLA, Pu S. Laldingliana pawh Nov. 3, 2018 a a boral khan Nov. 5, 2018 ah a bial chu bial ruakah Election lamin an lo puang ve tawh tho bawk.

Election lamin bial ruaka an puan hma leh puan tlai hian kawngro a su vak lem lo a, chu ai chuan Political Party lam zawkte hian bial ruak hnawhkhat tura an hmalakna hi a pawimawh zawk mah awm e.  Pu Andrew boral hnu ni 4-na lekah a awmna ZPM Party ngei chuan Tuirial biala By Election neihna tur atan Candidate Search Committee te, Campaign Committee te leh By Election Fund Rising Committee te an han din nghal rum rum mai te kha Party tan alo that zawk phah thei a ni turah ngai ila. MNF Party pawh chuan Sept. 10, 2021 khan Nomination Committee member tur an ruat fel a, Sept. 14, 2021 ah thutkhawm hmasa ber neih a ni bawk. Candidate tur pawh hi puang hmasa berin Sept. 19, 2021 ah khan MNF Official Candidate atan K. Laldawngliana chu an puang a ni. Congress Party pawhin Sept. 22, 2021 ni khan Tuirial By Election-a ding tur hian Chalrosanga Ralte chu an lo ruat bawk a. BJP hian Candidate neih ngei an tum thu chu an sawi tawh tak nain hming hmerh chuan an la puang chhuak rih lo a.

PC Party erawh chuan thu leh hla an nei lo ni awm tak a ni a, nakin lawkah kan la hre tho turah ngai ila. ZPM pawh hian Candidate Search Committee te, Campaign Committee te leh By Election Fund Rising Committee din te kha han din hmanhmawh viau mahsela Candidate tak hi an la thlang fel lo ni awm tak a nia, an thawm ala reh rih riau mai. Heng Party bakah hi chuan Candidate dang hi an awm chiah tawh lo mai thei a, Independence-a ding tur pawh hi an awm lo mai thei bawk e.

Kum 2018 Election-ah khan Andrew chuan vote 4387 hmuin amah hnaih ber tu Sailothanga Sailo, MNF Official Candidate chu vote 204 in a hneh a, vote tla zawng zawng atangin 30.9% a hmu a ni. Mi 7 laiin Tuirial bialah hian an dingin Congress MLA, Hmingdailova Khiangte enkawl lai a ni nain amah ngei pawh hi Congress Party chhuahsanin NPP hmingin a ding a, Congress Party atang hian Joseph L. Ralte a ding a, anni bakah hian Jacob T. Vanlawma chu BJP atangin a ding a, PRISM atangin B. Vanlalhruaia dingin V. Lalennawma chu Independent in a ding bawk a. Hetia ngaih mai chuan sympathy vote an tih mai thin, khawngaih vote hi ZPM lam hian an dawng tha viau mai thei a, amaherawhchu Candidate an vawrhchhuah dan a zirte pawh a ni thei bawk ang.    

Tun atang hauhin thawm chi hrang hrang kan hre tawh a, Election Department lamin Inthlan hun an la puan hauh hmain a then hi chu kan lo buai tawh hle a nih hmel. A thenin 2023 Inthlanpui a hril theia an hriat avangin Tuirial By Election awm tur hi an nghakhlel viau ni tein a hriat a, chutih mek laiin Serchhip bial By Election kan neih zawh hlim hlawl tak nena thuhmun anga ngai pawh an lo awm bawkin vawiina thenkhatte chet dan thlir hi chuan an campaign dan a danglam lo viau. Inthlan hun hriat ni tawh phei sela chuan thawm mak tak tak hriattur pawh ala awm zel turah ngai bawk ila.

Vawiin thlenga Party tinin kan la sim leh bansan theih loh chu midang sawichhiat hi a ni. Hei hi thil tha tak a nih loh ang bawkin a ngaithlatute tan hlawkna a awm lem lo thin viau. Ngaihdan nei lem lo a thle mai maite tan erawh a tangkai viau mai thei a, ngaihdan lo nei ve a, bengsik meuha lo ngaihtuah nawn leh thin tan chuan a hlawk tampui lo mai thei. A chhan chu side nei loa ngaihte pawh hian a ruk tak chuan side an lo neih ve vek thin tho avangin ngaithlatute rilru a kawihher sak phah theiin a tihnat phah hial thei. Nimahsela an sawiselna thu erawh thudik tak a nih erawh chuan mipui hnehna atan a tha viau thei thung. Chu pawh lo nisela kan Politiciante hian hetianga midang sawichhiatna hmanga mipui vote an zawng hi kei tha ka ti thei chuang lo a, thudang sawi tur a tam a, mahni policy pawh sawi uar viau mai tur. Ramhlui zia kan tih anga vawiin thlenga kan la kal hi sim har tak a nih hmel a, mipuite ngei ngei pawh hian hetiang hmanga vote zawngtute hi hnawl ngam a hun tawh viau. Chuti ni loa ramhlui zia anga kan la kal reng a nih hi chuan Tiau Track hla kan sawi tak ang maiin lung kuai em em lo mahsela thinlung pawnlang chin emaw chauha ‘Het shalla’ tih paha thlek nghelh nghelh hi a tawk viau mai thei e. Sum an sem a nih pawhin lak a, kan duhna taka vote tho tur tihna a nih ber chu.