INRINNGAMNA

Mahmuaka Chhakchhuak

Sept. 12, 2021

 

July thlaah khan ni khat chu sarang chhunga hmarcha tiak engemawzat hi dahin phun tumin Chemkawm nen ka chhuak a, Task Force duty-te chuan min lo dangin ka kal tumna hmun leh a chhante min zawt a, kei chuan hmarcha ṭiak phun tur ka nih thu leh hmarcha tiak pawh ka keng nghal thu ka sawi bawk a, nimahsela rem min tih sak loh avangin min let tir leh ta. Ka hmarcha ṭiakte pawh chu paih ngawt ai chuan tiin a rem remah ka phun ta mai zawk a. Ka rilruah chuan hmarcha ṭiakte lah ka pawt vek tawh bawk si a, ka dil luih ngial pawha an remti miau si loh avang chuan anmahni, Task Force duty-te hel zawngin kal lui mai dawn em ni aw ka ti hman hial a, nimahsela thuawih taka let leh mai chu tha zawkin ka hria a, ka let leh ta mai a. Ka rilruah chuan min ringngam sela chuan keipawhin hmarcha ka phun zawhah chuan ka let leh mai dawn chauh a ni si a, thildang engmah tih tur ka neih bawk chuang si lo a, min rinngam loh vang zawk em ni ang aw ka ti a.

Keimah ang bawka thil pawimawh tih tum Task Force Duty-te lo dan tak leh remtih loh hi midang an awm ve ka ring a, dik tak phei chuan hmun ṭhenkhata Task Force duty-te phei hi chuan an ti mah mah deuh thin bawk a ni.  VLTF/ LLTF te’n anmahni khua/ veng chhunga CoviD vei nia rinhlelh emaw harsatna nei an awmin, thinhrik leh endawn an nih lohna turin chak takin hma an la ang tih a ni nain kan In bul lawk lawka Motor Siren rawn rik ta ruai ruaiah chuan min ti ralkhel lo thei lo a, inlan tha ngam loin tukverh darthlalang chhan atangin kan thlir dek dek a, rilru no deuh tan phei chuan thin a phu lo thei lo a ni. Home Quarantine-te banga lehkha tar ngei pawh a tir lamah phei chuan an bul hnaia kal pawh kal ngam lo a, tun hnuah erawh HQ-te nen ngei pawh kan au lawng lawng hreh tawh lo thung a, CoviD nena chen dun kan thiam sawt viau tawh a ni. 

CoviD hri lo kai palh hi a tir lamah kha chuan phar vei ang maiin kan ngai lek lek kha a ni hial a, a vei-ate zinga ṭhenkhatte ngei pawhin an inngaihdan a ni hial bawkin a hriat. A vei lemlote pawhin kan ṭhenawm hnai tak taka vei an lo awm takah chuan kan thlir dan a pangngai chiah lo deuh bawk a. Khatiang ngaihdan kan nei kha thil ṭha lo tak a lo ni. Vawiin thleng hian khatiang ngaihdan nei kha hmun ṭhenkhatah phei chuan an la awm lehnghal ni awm tak a ni a, a pawi hle mai. A tir lama kut silfai dan tur thlenga kan uluk dan atang khan he hri hi danglam bik takin kan ngai tih a hriat reng a, thil pawi erawh a ni lemlo nachungin chu chuan vawiin thlengin kan thlir dan a ni ta zel erawh nghawng ṭha lo a nei zawk thei hial awm e. Hmai tuam ṭhat leh a theih chhung chu midang hnaiha awm chuang loin he hri hi palzam mai mai thei tawh zawk ila a fuh zawk tawh ang em le? 

Tunhnaiah Task Force Duty te demna lam rawng kai social media lamah hmuh tur a awm zauh zauh hi a pawi hle mai a, Duty-te ngei ngei pawh hi kan unau leh ṭhianṭhate an lo nih lehzel bawk avang hian mipui leh duty-te inkara boruak tha lo awm mai thei tur ang zawnga ngaihdan neite tan ngei pawh boruak siamṭhatna lam kan hawi a pawimawh hle awm e. A hrim hrimin social media-a thil zawng zawng chinfel kan tum leh tarlan kan tum vek mai thin hian rah tha a chhuah duh lo viau thin a, hmelma insiamna mai mai a nih zawk theihna a awm. Chu ai chuan tihsual palh leh ṭawngkam hman sual palhah pawh ngaihdam dil hreh lo ila, mizo kan nihnaah hian inhmangaihna pawh a hun taka lantir hi kan tih tur ni awm tak bawk a ni. Kan chhehvela he hnam tihchhiat tum rengtu hi an awm a, Chakma unaute’n min lo chhaih buai rengin Assam lam mi leh sate pawhin min lo perh kauh kauh reng bawk a. Hetih kara keini hmelmaa lo insiam emaw lo inhuat emaw hi kan tih loh tawp tur a ni. 

Task Force-te tan ngei pawh kan duty chhan hi kan hriat chian a ngai a, duty-na hmunah mi fel hlir an awm bik loh avangin mi fello lo awm palhte chungah ngei pawh rilru pangngai tak kan put a pawimawh viau thin. Hri vanga duty kan nih ngei mai karah hian hri vang ni kher loa duty a ngaih chang pawh a awm bawk ang. Duty-na hmuna thil zawng zawng chingfel kan tum mai nghal ṭhin pawh hi a nihna tur a ni chiah lo bawk a, thunun ngai leh hrem ngai mi an lo awm palh a nihte phei chuan midang pun vat a, Police lam te ngei pawh hriattir vat kha kan tih tur ni zawk awm tak a ni. Chutih lai erawh chuan vengchhunga ‘misual’ tia chhinchhiah bik hi an lo awm ve tho bawk avangin chung mite nen zan rei tawh lama kan lo intawng palh a nih pawhin Police lam hriattir vat ṭhin chu a finthlak zawk ngei ang. 

A pawimawh berah chuan inrinngamna kan neih loh chuan khawilai hmunah pawh hian buaina hi thleng mai thei vek a ni a, Task Force duty-na hmun ni kher lo, Sorkar Office ah leh Kohhran rawngbawltu awmkhawmna hmunah ngei pawh hian harsatna a thleng fo thin bawk. Kan kiang amite kan rin ngam loh chuan hrehawm tak a niin thil tha lo tak tak ngaihtuahnaah alo awm phah thei bawk a, chutiang bawkin anmahni ngei pawhin min rinngam tlat loh bawk chuan hrehawm duh tak a ni. Hei vang hian tupawh mai hian rinngam turin awm ila, rintlak turin awm bawk ila chuan kan awmna hmun apiang maiah hian kan tlangtla mai dawn zawk a ni a. Rintlak kan nih loh ṭhin avang hian alawm midangte pawh hian min rinngam loh ṭhin bawk ni.