LUNGLEI ROAD PROTECTION TE FAKAWM

Mahmuaka Chhakchhuak

Sept. 7, 2021

 

 September 1, 2021 niah khan Lunglei Road Protection Squad te chuan khawpui chhung kawngpui dungah kalin kawngpui nek chep zawnga insakna bungrua leh bungraw hrang hrang dah leh lirthei chhia dahte an endik tawhin Sept. 6, 2021 khan hetiang bawk hian endikna neih leh a ni bawk a, hei hian rah duhawm tak a chhuah ngei pawh beisei a ni. Heng an endiknaah hian kawngpui tana hnawk tura bungrua leh lirthei dahtute hnenah chuan dah sawn turin an hriattir a, hun biktuk awmin hriattirna pek a ni a, reiloteah khawpui chhung kawngpuite pawh a nih dan tur anga nuam tak leh zau taka mipui tan a awm ngei pawh a rinawm.

Aizawl khawpuiah chiang takin kan hre tawh a, sorkar lamin thupek khauh tak siam mahsela vawiin thlengin Aizawl khawpui chhung kawngpuiahte chuan chhun leh zanah lirthei hnawk takin ala awm reng tho a, mipui tana hnawkin ala awm reng tho a ni. Sorkar tan pawha hmalak harsa khawpin lirthei neitute hi an tam tawh si a, vawiinah chuan Aizawl khawpui chu Traffic Jamna khawpui alo nih phah ta reng a, hunbi neia hnathawk thin leh hunbi hmanga nitin hun hmang thinte tan ngat phei chuan thinrimthlak khawpin Traffic Jam hi a awm reng a, sorkarin a sutkianna a tan PAHOSS ruahman mahsela a sawt phah lem lo a nih hi. Kawngpui chhawng kan neih hunah erawh a ziaawm deuh mahna le.

Hei hi Lunglei khawpuiah ngei pawh kan hmabak a nih mai theih avang hian vawiin hun atang hian sorkar leh mipui lamte ngei pawhin ruahmanna kan siam a, kan zawm that a pawimawh hle mai a, thu kan awih loh fo chuan Aizawl khawpui ang maiin Traffic Jamna khawpui ala ni ve palh thei a ni. Tun atanga Road Protection lamin khawpui chhung kawngpuite an fang a, kawngpui nek chep zawnga In sakna bungraw dahtute leh lirthei chhia dah tute hnena senghawi tura an hrilh hi anni pawhin an zawm ngei a rinawm a, an zawm lo a nih ngat chuan thuneitute hian na zawka hremna an pek ngei pawh a la tul mai thei a. Chutiang niloa insa mekte emaw lirthei chhia neitute ngei pawhin kawngpuite hi bungraw dahna hmun ang maia an ngai a, tawngkama insawifel mai an tum leh thin a nih chuan a tha hauh lo ang a, anmahni bawk chu a tuar tu an ni leh thei bawk a ni.

Lunglei khawpui hi tun hunah rih chuan enkawl a harsa lutukin a rinawm loh a, mipui lam pawhin chuti taka hnawk chuan kan khawpui kawngpuiah hian bungrua leh lirthei chhiate hi kan dah hnawk pawhin a rinawm chiah rih lo. Nimahsela nakin hun atana kan inbuatsaih erawh a ngai a, chumi tur chuan vawiin atanga thuneitu lamte pawhin theihtawp an chhuah a tha bawk a ni. AOC Petrol Pump atanga Chanmari thlenga kawngpui kama lirthei dahte, Venglai chhung kawngpui hrang hrang kama lirthei leh hmanraw dang dahte, Tlabung peng atanga Saizaikawn panna kawngkama lirthei dah reng tute ngei pawh hian garage ngaihtuah sela, vawiin atang hian senghawi dan an ngaihtuah a tha a ni. Mi tamtakte hi chuan kawngpui kama lirthei dah hi a lo remchan bawk avang hian chhun leh zana dahna tak atan an lo hmang reng tawh nite pawhin a hriat a, hetiang hi thuneitute lam pawhin hrilhfiahin nakin lawka kan la buaina tur a nih dante hrilhfiah sela an lirthei dahna tur hmun dang buatsaih ngei rawh se.

AOC Petrol Pump bul lawk, Ramthar veng panna peng bulah sawn kawngpui kama two wheelr han hun zawkna tur hmun pawh awm loin chhun leh zanah motor (LMV) an hung reng thin a, a kiang hnai dawra thil lei dawn pawhin hmun hla taka lirthei hunna zawn phawt te a ngai thin. Hetiang hi lirthei neitute hian lirthei hunna atana an lo hman ngun tawh avangin an ta bil ang maiin an lo ngai tawh tihna pawh a ni thei a, hmun dangah pawh a nih tho ang a, chuvangin thuneitute hian lirthei vanga kan kawngpui ala chep theih mai dawn avangin hrilh hre vat sela anmahni pawh chuan hmun danga lirthei dahna tur buatsaih a ngai zia hria sela a tha a ni. kan kawngpuite hi a neitu vek kan ni a, kan ta vek a nih avang hian kn dimdawi pawh a ngai a, midang tana hnawk tura lirthei leh bungrua kan dah hian a tha loin hmelma hial kan insiam thei a ni.

Lirthei chauh niloin In sakna bungruate avang hian kan khawpui chhung kawngpuite hi a chep phah bawk avang hian Road Protection lamin hmalakna an neihna hi thil lawmawm tak a ni. Lunglei khawpuiah ngei pawh hengte avang hian hmun hrang hrangah lirtheia hel ngai khawpa insakna bungraw dahhnawk hi hmuh tur a awm a, a bik takin kawngpui lian atanga peng a vengchhung kawngpuiahte hian a ni lehzual awm e. Reilote dah a, senghawi leh thinte erawh hi chu tu tan pawha hnawksak an ni kher lo ang a, rei tak tak dah thinte erawh hi chu a hnawksak mai thin avangin UD&PA lamah pawh dil sela sorkar lam remtihna leh ruahmanna ngeiin dah thin zawk se. Sorkar lam remtihna pawh ni lem loa mahni duh dan dana kan dah mai thin avang hian midang tan hnawksak a ni mai ṭhin.  

Heng bakah hian kawngpui kama lirthei siamna hmun (workshop) kan neihte ngei pawh hian lirthei tlante tana hnawksak khawpin kawngpui an ti hnawkin an dip thin a, a theih hram chuan kawngpui atang pan ngai hian workshop hi nei sela emaw a theih ngang loh pawhin kawngpui rinchhan loh theih hram turin hnathawk thin sela a duhawm hle a ni. Thil dang dang pawh sawi tur ala awm ang a, hengte atang hian kan khawpui chhung kawngpui enkawlna kawngah hian mipui kan pawimawhna a hriat theih mai awm e. Sorkar lam leh khawtlang hruaitute kutah chauh dah loin mitin hian kan kawngpui hi enkawl uluk ila, kawngpui tana hnawk turin kan bungrua leh lirtheite hi dah loin mitin tana remchang thei turin i dah awl hram hram thin ang u. Chumiah chuan himna pawh a awmin chetsual palh theihna lakah ngei pawh kan lo him phah thei zawk ngei bawk ang.