NA TAKA DEM

Mahmuaka Chhakchhuak

Sept. 2, 2021

 

 

Aug. 7, 2021 zan dar 8-a CYMA OB te thutkhawm hmanhmawh nei chuan Assam sorkar ruahman anga Mizoram House, Silchar, Assam-a Mizo motor tunhnaia ramri buai vanga tangkhangte Mizoram panpui mekte, Lailapur, Assam-a Police-te venhimna hnuaia an awm lai, Lailapur mipui te’n an lo dang buai leh motor thenkhat khawih a ni hi hriatthiam har an tiin CYMA chuan a dem takzet a ni tiin thuchhuah an siam a. Hetiang deuh bawk hian CYMA hian Dec. 4, 2020 khan lui dung kan humhalh mek laiin, tunhnaia khawih an ni chu a dem takzet thu thuchhuah hmangin an lo sawi tawh bawk a. Kum 2014 ah pawh khan CYMA hian NLFT hel nia hriat te’n khawthlang lam Rajiv Nagar leh New Kawnpui inkara hnamdang sumdawng mi 2 an rukbo chungchangah pawh an dem takzet a nih hi an lo sawi tawh bawkin kum 2020 ah ngei pawh khan Assam Riffle mi leh sa thenkhatin Vairengte check gate an paltlang luih chungchangah demna thu an lo chhuah tawh bawk a.

Demna thu chhuah hi kan tih tur awm tak a nihna pawh a awm a, pawla anga thuchhuah siam pawh hi thil tha tak a ni bawk awm e. Amaherawhchu a hun leh hmun a zirin mipui lamin hetiang Demna thuchhuah siam hi kan ngaihhlut dan a dang thei thungin nuih ti zatu hial a ni zawk thei a. Pu Denga khan a CM laiin Assam Riffle-te khan mizo an kahhlum chungchangah khan demna thu a chhuah a, kha erawh kan thlanmuanpui viau a ni awm e. Tuna Ramri buai kaihhnawiha Vairengte thlang lawka Lailapur mipuite’n lirthei engemawzat an lo dan buai avanga Mizorama pawl lian ber leh mipui huapzo ber YMA hming meuha Demna thuchhuah kan hmuh ngei pawh hi nupuite pawnfen tlang zût chunga thuchhuah tha tak siam án deuh avangin mi thenkhatte nuih a ti za ni awm tak a ni a, mizo mipuite thlawp a hlawh chu sawi loh nghawng pawh a nei lian vak lo a ni mai thei e. Thuchhuah siamtu CYMA lam hmuhhniamna leh deuna lam erawh a ni kher lo ang a, Mizorama pawl lian ber leh mipui huap zo ber chunga beiseina kan neih len em em kara thuchhuah hetiang lek alo chhuak ta hi inhmeh loh an tih vang pawh a ni zawk thei.

Assam Riffle thiltih demna leh ngaihdam dil tur CYMA lamin an ngenna chungchangah hian vawiin thlengin thenkhatte chuan hriatthiam loh an la nei a. Vairengte lama dan an bawhchhia anga sawina leh Sesih khuaa Assam Riffle bawk te hian mizo nula feh hawng chu mawi lo taka an lo chhaih avangin CYMA lam hian mizo mipuite aiawhin hmalakna an nei vat a ni a. He thil avang hian Chief Minister leh CYMA hruaitute chuan Aug. 22, 2020 ah meeting pawimawh tak an nei nghalin Home Ministry lama na taka Asam Riffle-te chet dan hi thlen nisela an ti a ni. A tuk mai, Aug. 23, 2020-ah chuan CYMA hruaitute hian Assam Riffle hnenah hian lehkha pein August thla ral hmaa ngaihdam dilna an hnena thlen turin an ti a. Nimahsela AR lam hian min lo ngaichang lawk ru an tih avangin CYMA hruaitute chuan Sept. 1, 2020 niah chuan meeting nei lehin Sept. 5, 2020 thleng ngaihchan leh nisela tiin an rel leh a. Sept. 5, 2020 alo herchhuah meuh chuan AR lam pawhin an ngaihdam dilna chu CYMA hruaitute kutah hian an rawn thlen ta a, CYMA lam pawhin ngaihdam dilna hi an dawn ngei thu an puangchhuak nain vawiin thleng hian Assam Riffle-te ngaihdam dilna lehkha hi vantlang mipui hmuh tura tlangzarh ala niloin engtiang chiahin nge an ziah tih hi hriat ala ni ta chuang lo a. Hei vang hian mi thenkhatte chu an la dam thei meuh lo ni awm tak a ni. 

He lehkha pawimawh tak, Assam Riffle in mizo mipuite hnena ngaihdam an dilna lehkha hi a dawngtu CYMA hruaitute hian mipui hnena an tlangzarh loh avang hian July 26, 2021 nia Inkahna nghawng kalzelin kawng dan pin hial a thlen a, CYMA meuhin demna thuchhuah an siam pawh hi thlawptu an tam loh phaha langin social media lamah phei chuan nuihza siamna ang deuh thawa sawina hmuh tur a tam phah ni ngeia hriat a ni a. Keimahni leh keimahni kan intimualpho ang leka sawi tur awm hi a zialo hle mai a, tih fo chi pawh a ni lo ang. Hnam tangrual lo leh lungrual lo kan nihna ti langtu tha tak a nih theih avang hian hnamdang hmuh atan phei chuan phochhuah loh tawp tur a ni bawk ang a, hetiang lama ziaktute ngei pawhin an ziak lo thei lo a nih pawhin a thehdarhna tur hmun chiang hmasa phawt sela a tha ang.

Chutih lai chuan CYMA emaw pawl hruaitu lamte pawhin thuchhuah an siam dawn pawhin mipui huapzo leh mipui tam berte ngaihdan ang tur zawnga thuchhuah an siam a pawimawh bawk ang a, thuchhuah mai pawh niloa a taka chetchhuah a ngaih hunah ngei pawh mipuite chetchhuah hmaa chechhuak tura an inrin reng a pawimawh bawk ang. Chetchhuahna awm loa thuchhuah hmang ringawta demna thuchhuah hian awmzia a awm tam vak loh thin avangin leh midang tan nuih tiza tu mai zawk alo nih theih avangin tun hi kan inzirna atan ni sela nakin hnu lamah chuan hetiang hi awm tawh lo sela a duhawm a ni. Mizo mipuite hi kaihhruai kan harsa hauh lo a, Lal Isua zirtir mi tlemte zingah ngei pawh amah man tirtu an la awm ang tho khan kawhmawhbawl mi tlemte chu an lo awm lo thei loah ngai ila. Thuawihna kawngah pawh kaihhhruai kan nuam viauin a hriat a, entirna atan Krismas leh Kumthar bawra zan lama halpuah hal loh tur tih thupek a awm pawh khan Aizawl khawpui chu zan lam boruak a reh duk mai a nih kha.

CYMA hruaitute ngei pawh hian Ramri lamah hian mipui hmaah kalin NGO dangte leh Political Party worker kalte aiin a hmun thleng hmasa zawk sela zoram mipuite hian kan fakin kan chawimawi em em ang. Lailapur mipuite’n Mizoram luhna tur kawngpui an lo dan chungchangah pawh rang takin hmalakna nei vat sela kan thalai tamtakte chuan an hnungzuiin in leh lo chhuahsan kan hreh hauh lo ang. Chutiang niloa Demna thuchhuah siam ringawt hi kan duhkhawp lo a ni ber mai. Kum hmasa lamah pawh tunge ni kha Silai leh lirthei zawnga Ramri lama kal tum anga social media hmanga inhrosa vak tawh bawk kha. Tute nge ni pawl hming meuha silai zawnga ramri lama kal tum bawk kha? Khatiang khan mipui thinlung a hneh lo a, khatiang khan nunau a thlamuan zo na hek lo. Chu ai chuan a taka chechhuakte bawk hi a ni kan ngaihsan zawk a, a hmun ngeia awmte hi a ni kan fak a, kan chawimawi zawk thin chu, entirna atan kan Pi, zo zial petkawh chunga silaimu kara awm angte kha.