PARTY POLITICS

Mahmuaka Chhakchhuak

Aug. 28, 2021

Kum 1946 aṭanga Political Party kan neih ṭan chhohah khan ram leh hnam hmangaihna tak tak thinlung nen kan Politician hmasate khan ram rawng an bawl niin a hriat a. Hming hmerh pawhin sawi ila Pu Ch. Chhunga, HK. Bawichhuaka leh C. Pahlirate kha tihtakzeta ram tan rawngbawla chhiar ngam an ni ngei ang a, midangte pawh sawi lan awm tak an awm nual tho nain anni pathum hi han dah langsar bik ta ila. Anni hi chuan mahni inhaivurna leh chhung leh khatte duhsak zawngin an kal lo khawp mai tih chu mitin hriat a ni ngei ang a, an fakawm thlawt a. Khawvel changkang tawh takah leh hmasawn chak takah hian kan tunlai Politiciante hian anni hnen atanga zir tur an neih pakhat chiang taka lang chu hei chiah hi a ni bawk ang.   

  

Kum 1972-a UT kan nih ṭan tirh aṭang khan Delhi tlang aṭangin hnathawhna tur leh inenkawlna tur sum leh pai ṭhahnemtham tak tak dawn ṭhin a ni a, chutihrualin sorkar hna kau pawh a ṭet bawk a. Khatianga sum leh pai kan dawng ṭhin kha thil chikmite chuan kan Politics kalsualna bul ang hialin an sawi a, dik pawh a dik mai thei e. Chu boruak chhia chuan thlah nei chho zelin vawiin hun thleng hian zoram Politics boruak ala tichhe zel pawh ti ila kan sawi sual kher lo ang. Kum 1978 aṭang Chief Minister Brig. T. Sailo ngei pawh Israel fate tana Mosia ang tluka ngai an awm laiin ṭhenkhatte erawh chuan an ngai thei lo viau a. Kum 1987-a State kan nih dawn hnaih boruak velah phei kha chuan thawmri mak tak tak hriattur a awm a, Mizo Union ngei pawh Congress khan a lem zo a nih ber kha maw.  

Party feeling kan tih, Party mi leh sate chauh duhsakna ang boruak hi kan zoram Politics ah hian a mikhual lo viau a hriat a ni a, vawiin hun thleng pawhin ala hluar viau nia hriat a ni nghe nghein rei tak min la chenchilh ngei tura rin a ni bawk. Chu chuan nasa takin mipuiah hlet a chhuah loh thei loh avangin mizo taka inṭhenawm khawvenna kawngah pawh kan inngainat loh phah hial thei a, a kal filawr zualte ngat phei chuan biak pawh an inbe duh lo hial ni tein an sawi bawk a, thil ṭha lo tak a ni. Kan la hriat chian theih tur pawhin thil tam takah hetianga Party Politics uchuak tak rawngkai hi sawi tur a awm a, hetiang hi ṭhenkhatte tan phei chuan thil ni ngei ngei tura ngaihna neih hialna tur khawp a ni zawk ang. 

Kum 2016-a Higher & Technical Education Department-in sorkar College-a thusawi tura pawn lam mi sawm khapna thupek a chhuah te kha han ngaihtuah chiang leh ila a mak ngawt a sin. Kha thil kha a chhan niawma an sawi chu Govt. Kolasib College-in Pu Zoramthanga chu ‘Mizo hnam Movement’ tih thupui hmanga an sawmna vang a ni awm a. A ni hi thusawi a thiam a, ngaithlatute thinlung a hneh mai ṭhin avangin sorkar lam aṭangin khapna a rawn awm nge ni thildang vang zawk tih chu keini hriat phak a ni tawh lo a. Hemi chungchanga Pu Lalduhoma’n ‘khap tawl lo deuhin sorkar hian kaihhruaina (guidelines) siam se’ a tih hi pawm nahawm tak a ni awm e. Amaherawhchu vawiin atan chuan hetianga khapna dan hi thil ṭha ber a ni tawh lo thei a, tupawh lo sawm sela zirlaiho hmaa side nei taka sawiin awmzia a awm vak loh mai theih avangin thusawitu tan pawh sawi tur chin an hriat thiam theih vek a rinawm. 

Hetianga kan thil lo tawn tawhte han ngaihtuah kir leh hian khawvel hmun danga la thleng ngai lo tur hi kan zoramah ngei hian kan thlen tir ni tein hriatna a awm hial zawk a. America ram dintu zinga mi, Declaration of Independence ziaktu leh US President pathumna ni bawk Thomas Jefferson khan ‘Eng sorkar pawh lo ding se kan tum ber (mihring nunna, zalenna leh nun hlimna) tichhe zawnga hmalakna an neih chuan mipuiin chu sorkar chu an thlak thei a, an hnawl thei a, sorkar thar an siam thei a, chu chu mipui dikna chanvo a ni’ tiin a sawi a. Mipui siam sorkarah khua leh tuite hi awm hmun aṭanga sorkar hmalakna thlir mai mai tur an ni lo ngawt a, a ṭul angin an fakin an sawisel tur a ni a, a ṭha lo a nih phei chuan an dodal thiang tihna a ni.  

Kum 2015 daih tawhah pawh khan Party Chanchinbu pakhatah chuan ‘Tunge Sorkar Policy Do?’ tih thupuia hmangin thuchhuah alo awm tawh a. Pastor-te vauna leh beihletna ang hiala ngaih tur an chhuah kha kohhran mite tan a lawmawm loh hle a ni. ‘MLPC Act hman a nih hnuah Congress sorkar thiltih a nih avangin nasa taka sawisel a, do a, mipui zirtir ṭhin Pastor hming, Bial hming, khawi khaw chhuak nge a nih ziak la. Eng hun leh hmunahte nge sorkar policy kalpui mek (MLPC Act) hi a sawisel ṭhin’ tiin zawhna chhanna tur hi an siam a ni. He chanchinbu hi copy 5000 chhut a ni a, mimal ta ni loin Party ta (official newsletter) a ni a. An party mite hnena sem mai duh tawk loin chanchinbu semte copy khatah Rs. 2/- zel hlawhtirin an semtir niin an sawi nghe nghe. He thuchhuah hi a hnu lawka mi ṭhahnemngai zual tlemtete thiltih ni awma sawi leh a niin hruaitu lam chuan thuchhuah an nei leh vat a ni awm a, nimahsela mipuiin kan hmuh hman tawh tlat avangin a pawi tur ang chu a pawi hman tho awm e. Chung mi ṭhahnemngai zualte chuan Sorkar policy sawisel erawh an haw hle tih a lang a, a sawiseltu langsar Pastor-te hriat an duh a, hrem thei lo mahse engtin emaw tih an tum a nih hmel.  

Hetiang hian Party Politics ruihchilhho chuan thil an lo ti tawh ṭhin a, vawiin thleng hian hetiang hi sawi tur ala awm lehnghal a. AAY leh BPL Card nei tur pawha Party hruaitute hriatpuina lehkha thiltel ngaia an sawite ngei pawh hi thil ṭha lo tak niin a lang a, Minister hnena thil dilna lehkha reng renga Party mi leh sa an ni tih hriatpuina thil tel ngai fo maite pawh hi thil chhuanawm loh tak a ni a. Kan Chief Minister zahawm tak Pu Zoramthanga’n ‘SEDP sum sem hunah chuan NLUP dawng tawh zawng zawngte pawhin in dawng vek ang’ a tih kha a rilru tak taka a sawiah ngai ila Party Politics hri chhia a tel miah lo tihna a ni dawn a, a sawi ang hian sem tak tak phei sela chuan Zoram Politics ah bung thar kan chuang dawn tihna emaw a ni ang a, a fakawm ngawt ang.