TUIRIAL BY ELECTION THLIRLAWKNA

Mahmuaka Chhakchhuak

Aug. 29, 2021

Tuirial Assembly Constituency MLA, Andrew H. Thangliana chuan Aug. 17, 2021 ah natna hrehawm tak avangin min lo boralsan thut mai a, a pawi hle a ni. Andrew boral hnu lawkah Election lam chuan Tuirial bial chu bial ruakah puangin Andrew hmun ruak hnawhkhahna atan By Election neih alo ngai dawn ta. Andrew hi tuna kan MLA thlanchhuahte zingah chuan naupang ber a ni hial awm mange tih tur a niin Politics lamah hian hnuhma ala nei tam lem lo hle nain Tuirial bial erawh a enkawl hneh viau a sawi a ni a. Hetia hunlo taka alo boral ta mai hi a bial chhung mipuite ngei pawhin an sun hlein a rinawm a, amah ngei pawhin hnathawh hmachhawp a nei teuh bawkin a rinawm. Nimahsela khawvel hi kan awmhlenna tur hmun a nih miau loh avangin mittui tla chunga kan inthlahliam a ngai fo thin si a, kan chatuan hmun thlen hma chu hetiang hian kan la in mangtha fo dawn bawk a nih hmel hi.  

ECI lamin Tuirial Assembly Constituency chu bial ruakah a han puang ta phawt mai a, nakin lawkah hian By Election neih hun tur pawh ala rawn puang leh mai turah ngai ila, chu lam thu leh hla kan hriat hma hauhin zalen takin ngaihdan lo sawiri hmasa ila a tha awm e. Election hnuhnung ber, kum2018 ah khan mi 7 te chuan MLA nih tumin an in contest a, vote tla zawng zawng 14,184 atanga 30.9% hmuin Andrew H. Thangliana hian hnehna a chang a. A mah hnaih bertu, MNF Official Candidate Sailothanga Sailo-in 29.5% a hmu thung a, Andrew hi vote 204 in a phak lo a ni. Anni bakah hian Joseph L. Ralte (INC) in vote 3,748 a hmu a, Hmingdailova Khiangte (NPP) in 1,209 a hmu ve lehin Jacob T. Vanlawma (BJP) chuan 487 a hmuin B. Vanlalhruaia (PRISM) chuan 104 a hmu leh a, V. Lalennawma (IND) chuan vote hmu tlem berin 66 a hmu bawk a ni. 

By Election lo awm leh turah hian tute nge Candidate ala hriat loh avangin a Party ang pawh hian rin dan neih thiam a har rih hle mai a, Candidate an neih dan a zirin mipuiah boruak a danglam theih bawk avangin Candidate set uluk pawh a ngai viau awm e. A bik takin ZPM tan hian Andrew hmunruak luah khat turin bialchhung mipuite duhthlanna an lak thiam a tha viauin a rinawm. Sorkarna fawng chelhtu MNF lam tan ngei pawh Candidate an thehchhuah fuh loh chuan chak tura inngaih ngawt a theih bik kher loh ang a, Serchhip biala By Election an zuam sual ang deuh khan Tuirial bial ngei pawh hi zuam sual awl tak tur a ni thei tlat. A boruak lah chu a in ang dawn lo tih tun atang hauhin a hriatsa bawk a, boruak thar danglam tak pawh hi a awm lo hial mai theih bawk avangin ngaihtuahna hman thiam a har viau thei. 

Congress Party tan ngei pawh hian huphurhawm tak a niin a hriat a, Election hnuhnung bera an Official Candidate ber lahin Congress alo chhuahsan hman tawh bawk si avangin mithar thehchhuah a ngai ngei dawn si a, inzawn deuh hlek an ngai ngei ang. Rinthuin kan sawi ta rau rau bawka anni tan ngat hi chuan beisei a sang lo mai thei a, an chan san berah pawh pathumna an thlen phak tawk a rinawm zawk. Mithar tha deuh an thehchhuah erawh chuan boruak a dang mai thei tho nain chuti chung pawh chuan pakhatna chu huphurhawm tak a ni thoin a rinawm. BJP tan hi chuan Candidate neih loh law law a fuh zawk mai thei a, mizo mipuite hian BJP hi kan la ngainat tak tak loh avang hian an tan hian khawilai hmun pawh hi a huphurhawm vek maiin a hriat a, Central BJP tan ngei pawhin Mizoram hi chu an rawn huphurh ve ngawtin a rinawm. Anni bakah hian Independence-a mi tha deuh tak an rawn ding a nih chuan an rawn lawr zuah thei bawk.  

Tun atanga alan danah hi chuan sorkarna changtu MNF Party leh ZPM Party te hi inbei ber tur niin a hriat a, ZPM tan hian campaign nawmna chhan tur awm chu Andrew khan boruak chhe lutuk a nei lo a, tha pangngai takin bial a enkawlin MLA Fund ngei pawh a hmang tha viaua an sawi avang hian bial chhung mipuite khawngaihna dawngin hnehna an chang hlauh thei. Chutih rualin Tuirial bial mipuite hian Opposition MLA neih ai chuan a fawng vuantu lam ngei tiin MNF Candidate hi an lo thlang tling thei bawk si a. Serchhip biala By Election neih atang khan mipui lam pawh kan fing lehzual tawh turah ngai ila, Party lam pawhin at an so tawh kher lo thei a, campaign au hla pawh a dang tawh ngeiin a rinawm. 

Engpawhnisela, Party lam sawi ri loin Tuirial bial tan hian hetiang hian zalen takin ngaihdan han sawi ve zel ila. Sawi rik nawn fo ngai Serchhip By Election neih atang khan zoram Politics kalphung hi a danglam kan ti lo thei lo ang a, Tuirial bialah ngei pawh hian kalphung hlui anga kal ngawt chu a fuhin a rinawm loh. Tuirial bial tana mi tha tur hi bial chhung mipuite hian an hai kher lo ang a, vote 15,000 vel awmah hian a tam zawk chuan Party pawh an ruihchilh kher lo thei bawk. Chumi avang chuan Tuirial bial hmangaihtu tur hi an chik hlawm viau thei a ni. Duhthusamah chuan Candidate chu tute pawh lo nisela, mi rinawm leh dikna duhmi mai bakah a taka hnathawk mi hi an bial tan chuan an tha ber ngei ang a, Politics tuinuin a bual at loh pawh dah chungnung ngei bawk sela, mahni tanghma pawh hai duh loa mipui rawngbawl tura inpe ngei thlang chhuak bawk ngei rawh se. Tuirial bial By Election hian 2023 Election ala hril chhoh zel dawn bawk avangin zoram pum Politics tana chhinchhiah tlak tura bial chhung mipuite ngei pawhin inthlanna hriatreng tlak an neih ngei hi ka duhsak bawk a ni.