CHAMPHAI CHUAN A NEI MAI ANG

Mahmuaka Chhakchhuak

Oct. 4, 2021

 

 

Champhai Disrict chhunga awm MLA pahnihte chuan Sept. 29, 2021 niah khan Champhai District Hospital-a hman tur Rt-PCR khawl chu Zoram Medical College (ZMC), Falkawn aṭangin an la chhuak a, a ranglama Champhai lama phurh chhoh nghal a, October thla chhunga Laboratory pawh bun fel hman an beisei thu an sawi. Heng MLA pahnihte hi tun sorkara nihna pawimawh tak tak chelhtute an niin, pakhat hi Minister of State niin, Law & Judicial, Parliamentary Affairs, Transport leh Enviroment, Forest & Climate Change enkawltu a ni. Champhai South atanga a vawikhatna atana thlantlin a niin, kum lamah pawh a naupang ber hial awm mange tih tur a ni nain tun Ministry-ah erawh hmun pawimawh taka thu a ni. MLA pakhat zawk pawh hi Champhai North atanga a vawikhatna atana MLA-a thlan tlin a ni a, tunah hian SEDP Board 14 zinga pawimawh ber tih theih Health & Family Welfare Committee-a Vice Chairman a ni a, hei bakah hian Chairman, Covid-19 Medical Operational Team (MOT) a ni bawk.  

Hetianga sorkara mi pawimawh ber ber an nih mai bakah anmahni ngei pawh mi chak tak nia hriat an nih bawk avang hian an hmalakna pawh hi a chak ngei tura ngaih a ni a, tuna Rt-PCR khawl bun tur chungchangah ngei pawh Champhai NGO-te chuan an hmalaknaah an lawmthu an sawiin sorkar nena an hmalakna avanga Rt-PCR khawl pawh hman theiha bun fel vat a nih an beisei bawk a ni. Vanglaini (Oct. 3&4) chhuaka kan hmuh angin Champhai District Hospitalah hian tunah Truenat khawl pahnih a awm mekin Quatro khawl chuan extractor pali a hman theih laiin, a tir atangin extractor pahnih chauh a chhawm tih tarlangin hei hian Truenat hmanga Sample endik a ti chak thei lo a ni tiin a ranglama extractor pahnih ngaihtuahsak tura thuneitute an ngen thu pawh kan hmu a. Tukin (Oct. 4)  report-a kan hmuh danin Champhai District-ah hian tun dinhmunah Active Case 1268 nei mekin mi 2413 an discharged tawh bawk a. CoviD vanga nunna chan hi 3 nei tawhin CoviD positive an neih tawh zawng zawng hi 3684 a ni bawk a.

Sept. 29, 2021 nia Secretariat Conference Hall-a Health Minister, Dr. R. Lalthangliana hoa sorkar hotute’n meeting pawimawh tak an neihna hmunah Health Minister chuan Mizoram sorkarin District tinah Rt-PCR Laboratory a din dawn a ni tih a sawi a, hetah pawh hian Champhai North bialtu MLA pawh telin hemi ni vek hian ZMC atangin Champhai District Hospital-a dah tur Rt-PCR khawl pawh an la chhuak a ni. Health Minister chuan District hrang hrangahte hian a tahtawla bun a nih tur thu sawiin a tul ang ang bawhzui nghal a nih thu a sawi bawk a, hei vang hian Champhai District lam hi bawhzui hmasak a nih a rinawm. Hetih lai hian Champhai NGO-te chuan October thla chhunga sorkarin a bun fel hman an beisei thu an lo sawi ri bawk a.

Kan Health Minister hian Rt-PCR Laboratory bun hi a awlsam dan a hria a ni ngei ang a, hetia Mizoram District zawng zawnga a tahtawla bun a nih tur thu a sawi danah hian kawng mam leh awlsam tak a awm a ni mai thei e. Sawi tawh angin Champhai lam chu an MLA te’n an hmalakna thawm kan hre tawhin ZMC atangin Rt-PCR khawl pawh an la chhuak tawh chu a ni der mai bawk a, a hmun tur pawh Champhai District Hospital Campus-a Building awmsa an neih thu an sawi bawkin sorkar lam atang pawha Laboratory bunna tura a rem lohna awm lo ni awm tak a ni. Hetianga Champhai District-a October thla chhunga bun fel a nih chuan District dangte hian enge an hmalakna emaw sorkarah an MLA leh NGO-te nen hmalakna an nei mek em nge kan hre chiah lo nain sorkar hian a tahtawla bun turin ruahmanna a siam zawk nge ni ang le.  

Mizo zinga mimal anga CoviD kaihhnawih lam ngaihtuah peih bera chhal ngam Pu Huna Kawlvawm sawi danin Mizoram chuan tunah hian NE State zingah ni 40 chhung a zawna hri kai tam ber dinhmuna kan din thu a sawi a. India ram pum huap anga sawi pawhin Mizoram chuan ni khata hri kai hmuhchhuah tam lamah a palina kan nih thu a sawi bawk. Hetiang a nih mek avang hian sample laknaa ICMR leh HMA lam pawhin sample lakna atan a tam thei ang ber Rt-PCR hmanga lak nise tih chu an duhthusam a nih ang ngeiin Mizoram chhunga District zawng zawnga bun tura sorkarin hma a lak mek thu kan Health Minister zahawm takin a han sawi hi beng a verh lo thei lo a ni. 

Zoram hmuntin atangin Falkawn hmuna Rt-PCR Laboratory pakhat kan pankhawm a, hei chauh mai Mizoram mipui zawng zawngin kan han ring hi chu thil buaithlak a tam hle mai a, a panna kawngte lah alo that lutuk chiah bawk si loh avangin duh ang hunah pawh kan thleng zung zung thei ngai bawk si lo a, kalkawnga kal laia nunna chan pawh sawi tur an awm zauh zauh reng a nih hi. Chutianga hmuntina mamawhna sang tak vek mai kan nih laia Champhai District Hospital-a October thla chhunga bun fel hman tura beisei leh Building leh thil danga harsatna sawi a awm miah lo mai te hi thil lawmawm tak a ni. Kan hriat theuh angin Champhai District hi 2011 Census-a kan hmuh danin Mizorama District lian zingah mihring cheng tamna ber pathumna an ni a, Lunglei District hi mihring chengah 35,483-in an la phak lo a ni.

Hetianga Champhai District Hospital-a Rt-PCR hman mai tura sorkar lamin a buaipui hi CoviD hripui len lai a ni bawk nen mipui lam pawhin an chhawr hle tura ngaih a ni a, tuna an hmanraw neihte lah chu a hmanrua alo tha chiah lo avangin sample endik a chak thei lo niin an sawi a, hei vang hian duh angin hna a thawh chak theih loh phain mipui lam pawhin a tawrh ngei a rinawm. Chutih mek laia October thla chhunga bun fel hman beisei tura Sorkarin Rt-PCR khawl a buaipui hi ava lawmawm tak em tih loh rual a ni lo a, thu mai a ni lo anga, Champhai District chuan awlsam taka an nei mai bik turah ngaiin beisei takin ilo thlir phawt mai ang u.