FAINA HAPTA KHAR TAWH MAH ILA

Mahmuaka Chhakchhuak

Oct. 8, 2021

 

Sorkar thuchhuak kan hmuh angin District hrang hrangah Faina Hapta 2021 kharna hun hman a niin Faina Hapta hman dan chi hrang hrangte kan hre bawk a, a lawmawm hle a ni. He hun kharna hun hmanah hian thusawitute chuan faina chungchang sawiin faina kawnga tan kan lak zel a pawimawhzia an sawi hlawm a, mipui lam pawhin zawm thei theuh ila chuan thil lawmawm tak pawh a ni ang. Faina lam kher hi chu mitin hian kan theih tawk leh kan phak ang tawkah hian tan kan lak theuh a pawimawh hle mai a, sorkar leh pawl lam thachakna tello pawha mahni chhia leh tha hriatna hmangin faina kawngah hi chuan midangte entawn tlak khawpa ti theuh tur hi chu kan ni ngei mai tak nain vawiin thlengin inzirtir kan la ngai tlat mai hi thil buaithlak tak a nihna a awm thei awm e.

Sorkar lam pawh faina kawngah hian a tang hle maiin Office fai berte pawh a khat tawk hian a han thlang thinin khaw fai inelnate pawh a han buatsaih thin a, a lawmawm rualin lawmman dawn tum vang emaw chauha thahnemngai hi kan ang zawk mah tein a chang hi chuan a hriat thin. Biate khua hi khaw fai ber lawmmante lo dawng tawhin khaw nuam tak pawh a ni a, khawtlang hruaitute leh mipuite thawhhona a thain an khua an hmangaihzia pawh a hriat a, khaw dangte tan pawha entawn tlak an nihna hi a tam mai. Kumin fur laia an tuihawk luang lai kha video-in ka lo thlir a, a fim kar mai a, an tuihawk zawng zawng erawh a fim ver kher chu ka ring lem lo nain khatiang taka khawlai tuihawk pawh a fim theih chuan a fai thawkhat hle chuan a rinawm. Kan khawpui dangahte hian khawlai tuihawk luangte hi han fim ve ang maw tiin ka ngaihtuah a, ka hre thei mai lo thung a.   

Chhiahtlang khua ngei pawh faina lamah hian an chhuanawm hle mai a, an khaw dung hi han fang pawh ni ila a fai riau zel mai a, khawtlang hruaitute leh mipuite an fakawm hle bawk. Khaw dangte hi faina kawnga fakawm takte pawh an lo awm mai thei nain ka mit ngeia ka hmuhte hi kan han sawi lang mai a ni a, a bik takin heng khaw pahnih lek kan han sawi atang pawh hian khawpui zawkte hian faina lamah entawn tur kan nei tih hriaa kan entawn a pawimawh hle awm e. Mihring cheng tamna hmun hi alo tawp duh nge nge a ni ngei ang a, Aizawl khawpui reng hi a tawp mai a, kan inthlahdah vang a ni lo thei lo ang. Tumkhat chu ruahsur buan buan lai hian kan chenna In bul lawka tuihawk luankawr chu a rimchhe riau mai a, kan han belhchian chuan a chhak lamah hian tute emaw chuan Septic tank (Ek In khur)an lo sah hi a lo ni a, an remchanna lak dan chu entawn tlak tak a ni lem loin chin fo chi pawh a ni kher lo ang.

Thil dangte pawh sawi tur a awm ang a, faina kawngah hian kan thangharh viau tawh emaw tih laiin inzirtir thar hi kan la ngai hle mai tih a hriat reng a. Chenna In leh lo vel tihfaina kawngah ngei pawh hian VC/ LC leh NGO te tha thawh ngai kher loa chhungkaw tinin kan mawhphurhnaa ngaia kan tihfai thin mai hi a tha a, kan theih bak a awm a nih leh midang pun ta chauh thin ila. Kumina Faina Hapta kharna hun hmannaa ka thinlung hneh deuhtu awm chu Lungleia an hman dan tlangpui tarlannaah ‘A hmun loa bawlhhlawh paihtute ngaihhnathiamloh Ni (No Tolerance Day for Waste Disposal)’ hman a nih thu an sawi hi a ni. A hmun loa bawlhhlawh paih kan chin avang hian kawng tam takah harsatna kan tawkin chutiang avanga buaina kaihhnawih tam tak kan nei bawk thin a. Aizawl khawpuiah phei chuan buaipui ngai khawpin tuihawkin bawlhhlawh a rawn len fo thin hi.

Bawlhhlawhte hi a paihna hmunah paih thlap thlap thin ila chuan heng kan buainate hi awm lo tur a ni mai a, nimahsela keimahni paih hnawk avangin buai lohna turah kan buai ta fo thin a nih hi. A hmun loa bawlhhlawh paih tute ngaihhnathiamloh Ni hi Lunglei lamah hian engtin chiah nge an hman ka hre lo nain nakin zelah pawh hian hman chhunzawm zel chi tak a ni awm e. Lirthei atang bawlhhlawh paih tute ngei pawh hi a remchang a nih chuan an lirthei tukverhah ngeite hian an bawlhhlawh paih chu paih lut ve leh thin ila, a nih loh pawhin au ta vak thin ila kan sim phah mai thei a sin. Tuna Faina Hapta kan hman chhunga Sanitation Task Force te endikna atan chauha fai kan tum a nih chuan a pawi ngawt ang a, a hnu lawkah hian a ngai te bawkin kan bawlhhlawh lehin faina inzirtir thar kan ngai leh mai ang. A bik takin plastic lam chite hi a tawihral mai theih loh avangin bawlhhlawh zingah pawh a huatthlalaawm ber awm e. Hetiang bawk hian kuhva eina chhak sen huamte pawh hi a tenawm em em mai bawk a, hei phei hi chu hnam changkang lo zia dik tak a ni.

Tun tuma Faina Hapta kharna hun hmannaa Pi Saizikpuii, Addl. DC, Hnahthial tawngkam ‘Hapta chu khar mah ila Faina erawh kan khar lo a ni’ a tih hi mitin hian vawng theuh thei ila a duhawm takzet a ni. Sorkar atanga mipuite nen veka tangruala hun hmanna hi Faina Hapta bak hi a tam lo mai thei a, tuna hapta kan hman ngei pawh kan tangrual tha em em nain a hun (hapta) kan han hmang zo a, kan fai chhunzawm leh si loh chuan a dik hauh lo ang. Kan taksa mai bakah kan In leh lo te leh kan chhehvelte reng reng hi fai taka kan enkawl chhunzawm zel a pawimawh. Mitin tih theih a ni angin mitin mawhphurhna a ni bawk a, kan fai chhunzawm zel hi a pawimawh viau a ni. Faina chungchang kher hi chu chhungkua pawha inzirtir fo chi a niin naupangte tan ngei pawha thil harsa lo tak a nih avang hian Faina Hapta hun  hman chu kan khar tawh pawh a ni thei a, faina erawh khar chhunzawm ve nghal kher loin leh fai chhunzawm zel turin mitinte hian ṭan ila zel ang u.