FAINA HAPTA Pualin – KAN FAI THEI

Mahmuaka Chhakchhuak

Sept. 29, 2021

 

Mizote hi hnam huaisen leh tlawmngaihna nunpui tlat thin kan nih piah lamah thuawih thei tak hnam kan ni tih hi kan pi leh pute chanchin tam tak atangin kan hre thei ang. Zawlbuka val upate rorelnaah ngei pawh tlangval leh naupangte thuawih theihzia chu kawng tam takin kan hre thei bawk a, thuawih lo naupang an enkawl dante pawh an sawi fo thin. Chutiang zel chuan vawiin thleng hian kan hnam nunphung tam tak chhawm kan la nei a, hmuh theih leh hriat theihin thuawihna pawh kan lantir fo thin bawk a ni.

AMC huamchhunga bawlhhlawh thliar dan leh paih dan pawh thuneitute lamin ruahmanna siamin bawlhhlawh pawh chi 4 a thliar tur an ti a, thuawih takin mipui lam pawhin kan thliar mai a, In tinin bawlhhlawh bawm pawh pali kan kawl fur hlawm a nih hi. CoviD hripui leng avangin hei April 20, 2021 atanga inkharkhip kan la kalpui pawh thuawih takin kan la zawm mai zel bawk te hi mipui lam chu zirtir leh kaihhruai nuam tak kan ni tih hriatna tha tak a ni awm e. Amaherawchu Isua zirtir mi tlemte zinga amah man tir duhtu an lo awm ve tho ang bawk khan tho thil ang thap chuan engkimah rual patin a kal thei lem chuang hauh loh a, chung mi khirh leh thuawih lo tlemte lo awmte avang erawh chuan kan zavaia hmingchhiatna a thlen phah fo thin thung si.

Faina chungchangah ngei pawh kan inzirtir fo tawh tak nain inzirtir kan la ngai fo ni tein a hriat a, Singapore-ah chuan Sahram kan tihte hi zirtirin an khawchhung bawlhhlawh thianfaitu atan an hmang thin a, chu chu tourist lama sum leh pai lakluhna tha tak alo ni bawk a, anni ang em hi chuan thilnung dangte chu zirtir lo mah ila mihringte erawh hi chu kalhmang kan inhrilh hriat nawn fo a tha ngei ang. Khawpui chhung enkawltute hi awm tho mahsela mipuite nena tangrualna tha tak a awm loh chuan awmzia a awm tak tak thei chuang lo a, a mawhphurtu bikte leh mipuite ngei pawhin tanrualna tha tak nena kan khawpui hi kan enkawl a pawimawh hle a ni. Khawpui chhunga Tuihawk luankawr kan neihte ngei hi han enchiang ila bawlhhlawh paihna hmun emaw tih mai tura bawlhhlawh tam ziate leh tui pawh luang tha hleithei loa kawngpuia rawn luangchhuakte pawh hmuh tur a awm fo a, hei hi awlsam deuha tihrehna tha tak pakhat awm chu bawlhhlawh chu a hmun taka kan paih hian a ni mai.

Khawpui chhung kawngpui kamahte thingphun kan phun a, chung thingphun hungnaahte chuan mi thenkhatte chuan bawlhhlawh an lo paih mai thin bawk a, kawngkama Zunin awmte lah chu bawlhhlawh paihna hmun emaw ti tlat mihring kan la awm bawk zelte hi inzirtirna kan la mamawh belh zia ti lang tu a niin kawng khat chuan hmasawnna tur kan la nei tihna a ni. Heng bawlhhlawh paih tute hi mi pangngai tak tak leh rualpawl pha tak takte an la ni zel bawk lehnghal te nen hian thil inhmeh lo tak a ni bawk. Hman deuh lawkah khan ‘Clean Mizoram’ te khan Aizawl khawpui chhunga Taxi service-ah te bawlhhlawh bawm tereuhte hi an dah a, faina kawngah an theih ang angin hma an lo la tawh thin. Nimahsela a bawhzuina lamah kan chak tawk loh avangin rei kan daih lo mai zawk pawha vawiinah hian inhrilhhriat thar leh kan lo ngai ta a ni. 

Sorkar lam atang ngei pawhin faina kawnga inzirtirna hi kan dawng kumtin thin tak nain a hranpa taka hmalatu an awm loh vang nge an awm thoa an hmalakna a chak tawk loh vang tih pawh hriatthiam har tak maiin kum tam tak liam tawha kan inzirtir ang bawk kha vawiinniah hian inzirtir thar leh kan lo ngai ta hi a lehlam kawng taka ngaihtuah chuan a thil ninawm lam pawh a ni zawk thei e. Nimahsela a tul tlat siin, kan mamawh a nih tlat bawk si avang hian mitinin kan tihtheih mai leh kan kuta awm theuh – Bawlhhlawh a hmun taka paih tih ringawtah pawh hian hmasawnna kawng kan zawh thar leh a tul tak meuh a ni. Khawlai chauh ni loin Office lamah ngei pawh faina chungchang hi inzirtir kan ngai tho mai a, mi pangngai tak tura ngaihte ngei pawh hian a hmun loa bawlhhlawh paih kan la ching fo maite hi faina lam kawnga kan inhrilhhriat tam tawk loh vangte pawh a ni thei e. Lungsen khuaa tlangval pakhatin thingpui dawra a thingpui in zo hi kawngsirah meizial zuin a zuk bung chu nawr hluma bawlhhlawh bawma a meizial bung paih lai ka hmuh kha vawiin thleng hian ka mitthlaah ala cham reng a, entawn tlak ka tiin zahawm ka ti ngawt mai. A ni kha chuan a hmun takah bawlhhlawh a paih a, a lo hmu rengtu tan chuan ngaihsan loh theih loh a ni.   

Meizial zu mi kan ni a, Kuhva ei mi kan lo ni bawk ang, a thente chuan sahdah kan lo hmuam bawk ang a, chutih karin engmah zuk leh hmuam ti lo kan awm bawk ang. Mi chi hrang hrang kan awmkhawmin thiltih khawmna hunahte kan kalkhawm fo thin ang a, hengahte hian mi tladah leh dawngdahte hi chuan a hmun leh hun pawh ngaihtuah chuang lem loa meizial pak khu luih luihte leh a rem rema kuhva eina nawi paih mai chi an awm thin a, chungte chuan ngawi renga lo hmu rengtu tan an hlutna an ti hniam phah thei a ni. Meizial zu duh tan pawha hmun hran deuh emaw pawn remchang laia va zuk mai thin kha a mawi mai bakah anmahni zahawmna ti hlu zualtu a ni zawk. Mi zahawm kan tihte chu chanvo sang leh nihna sang tak chelhte hi an ni ngawt lo a, hawihhawm taka nitin hun hmang thinte hi mi zahawm tehna hmanrua atan hnam fing zawkte chuan an hmang thin. Chuvangin nitin kan khawsakna hmunahte hian kan zahawmna hum hram hram zel thei turin inthlahdah taka kan awm a rem lo a ni. 

Hetianga thil awlsam taka lang kan palzam thin fona hian kan mihring nun kawng hrang hrangahte ngei pawh ngaihzamna min neih tir phah thei a, chaw eikham hlima thutthlengseia mut mai te, dawhkan chunga ke han hlan maite leh hmai phih lem loa pawn chhuah maite thlengin kan inthlahdah thin. Hengte hi ngawi renga mi zahawm loa min siam thei tu a nih avangin leh midang tana mit tikhamtu a nih theih thin avang hian kan chin fo loh tawp tur a ni. Thil dang pawh sawi tur ala awm tho nain heti chin atang ringawt pawh hian hmasawnna rahbi rah tur lai kan hriat theih a rinawm a, nang leh kei hian chanvo sang leh nihna chhuanawm tak nei kher lo mah ila zahawm takin kan awm thei tih hi kan nitin khawsakna hmun atangte hian kan lantir a pawimawh a, chanvo neia mipui hmaa ding thin mi kan nih lek phei chuan kan taksa mai bakah kan bawlhhlawh paih danahte ngei pawh hma kan sawn theiin kan fai thei a ni tih hi nitin kan lantir fo a pawimawh hle a ni.