FAVANG BORUAK

Mahmuaka Chhakchhuak

Oct. 2, 2021

 

Tukin chu dar 3 velah hian chiang em em maiin ka harh hlawl mai a, mumang lam thil avanga harh ka nih pawhin ka hre chiah lo a, a chhan awm reng ka hre thei lo. Nimahsela engemawti tak hian ka khua a har em em mai a, chuti taka han khawharna chhan em em tur lah chu sawi tur ka hre chuang bawk si lo a, mak ka inti hle a ni. Ka pang ngheng renga mu kan nu lah chu tui em em mai hian a mu a, khupruh pelhsawng phunga muin inthlahrunna nei hauh lo hian a mu kawisawi em em lehnghal a, ka rilru erawh a hnenah a awm reng bawk avang chuan a biangte chu ka han chul thuak thuak a, duat em em hian ka han kuah hle hle bawk tak nain a ruk tak hian khawharna ka nei tlat bawk si a, chu ka khawharna ber lah chu ka sawi thiam chiah bawk si lo. Ka rilruah lah chuan thil chi hrang hrang a rawn lut zut zut reng mai bawk si a, ka ngaih a tha lo dawn dawn hial a.

Darkar khat dawn lai chu khumah chuan ka let ka let a, ka pang lah chu a kham thuai thuai mai bawk si avang chuan ka tho ta ngawt mai a, thingpui ka han lum a, hmai te ka han phih takah chuan chiang tak hian ka khawharna tak chu Favang boruak vang a ni tih chu ka han hre chhuak ta hlawl mai a, mak ka ti hle mai. Mak ka ti viau nain tukverh atang chuan pawn lam thlira ka han hawi vauh vauh takah chuan mak ka han ti lutuk leh chiah lo deuh a, a chhan tak pawh khawchhak lam atanga kawl rawn eng tan tur mawi tak leh van boruak thiang takte chuan thu tam tak sawi hian ka hre tlat a ni. Sam 19;1 thua ‘Vante khian Pathian ropui zia chu a hriattir a, Boruak zau tak khian a kut chhuak chu a lantir thin a’ tih thute chu ka thinlungah chiang takin a rawn lang nghal bawk a. Tukverh bulah chuan ding rengin ka thlir a, Pathian themthiamzia hi Favang boruakah hian ava lo lang chiang em aw te ka ti hial a ni.

Khawharna chuan nasa takin ka thinlungah min rawn luhkhung tumin min rawn hel reng bawk a, a tir lamah chuan hneh takin ka lo dang a, nimahsela ngampa tak chuan min rawn pan lehin ka sihhnipna lai ber hre ang zia zang hian Favang boruak leh thawm reh tak karah chuan inthlahrunna nei hauh lo hian min rawn pan leh a, chutah zet chuan patling inti ve tan pawha hneh rual loh tur hian min keuh thal tawp mai a, ka tha neih zawng zawng pawh zawi vek khawp hian min buan hneh a. Ka thingpui lum lai pawh chu theihnghilh thakin tukverh kiangah chuan ka ding ta reng a. Ka thinlung zawng zawng chu ka ti ngam chiah lo ang a, ka thinlung zatve aia tam mah tur changtu ka nupui ngei pawh chu ka kiang hnai takah awm reng mahsela engmah dang reng ka thinlungah a awm mawlh lo a, boruak vawt tak rawn thaw heuh heuhte chuan ka hmaite chu hit vek khawpin an lo chhem hman hial a.

Kum tam tak liam taa Aizawl Thuampui atanga Shillong lam pana Caravan Bus sei tak chhunga thian pawh nei lo a, vaiho zinga keimah chauha ka chuang laite chu fiah leh chiang takin ka thinlungah chuan a rawn lang uai uai a. Bawngkawn atangin Durtlang lamah chhoin, Sihphir lam panin kan kal zel a. Lungdai kan thlen meuh chuan kan thawm pawh a reh ta hle a, kan ngaihtuahna chuan hnung lam leh hmalam a kartawn reng bawk a. Walkman leh ka beng chu earphone-a zawmin Daduhi’n ‘Khuangchawi thla’ a tih chu keimah hriat tawk lek hian ka ngaithla a, tukverh darthlalang chu tlemte hian hawng bawkin pawn lam atanga boruak vawt tak chuan min rawn chhem heuh heuh bawk a. Ka thutna nghenchhan chu tlem a kuai awnin ngawi reng chuan ka thu a. Kawnpui kan thlen meuh chuan vawi sawm tam ka rewind hman hial awm e.  

Daduhi zai zet chuan ka thinlung a hneh ngang mai a, a aw mawi taka sang taka hla a han sa te chu inhmeh bik hliah hliahin ka hria a. Chutia ngawi renga darkar engemawzat ka ngaihthlak hnuah chuan ka hriat loh karah mang lamah ka lo cheng hman der mai a. Ka han harh leh meuh chuan zing khua lo var tawhin Khliehriat kan lo thleng der a, kan chuanna motor pawh dingin thingpui in turin kan chhuak ta sang sang a. Chumi hnuah chuan tluang taka kal lehin Shillong pawh chu hriat loh karin kan lo thleng mai bawk a. Jiengking kan thlen chuan motor chu ti dingin ka thawmhnaw neih ang ang nen chuan kan Hostel awmna Springside lam panin ka in ak bawr chho a, Hostelah chuan midang an lo la thlen loh avangin keimah chauhin ka awm a, a khawharthlak duh ngang mai.     

Ka room turah chuan lut nghalin a remchan dan danin ka inremfel nghal bawk a, ka hahdam deuh hnuah chuan inbual fai turin bathroom-ah towel nen ka lut lehnghal a. Tlai dar 5 rik dawn hnaihah chuan Dining Hall lamah chho lehin kan ei min siamsak tu tur (Cook) chu Aizawl atanga ka hawn sak Hruizik ka han pek chuan a lawm kher mai a, kan pahnih chuan meilum ai pahin thingpui kan in dun karh karh a. Kan Hostel awmna hmun hi khawpui laili taka awm nimahsela a reh ngawih ngawih a, Hostel chung vela Vaivate erawh an chiar nak nak thung a. Zanriah ka eikhamah chuan reivaklo Cook bulah chuan thu khawmuang lehin room lamah ka chhuk san leh ta mai a, khuma mu chung chuan Aizawl atanga Shillong ka pan dawn zanah inthlahna hun kan hman dante chu ka ngaihtuah kir leh a, khua a har zual hle mai. Sana ka han en chuan dar 9;00 pm alo ri chiah a, ka mut ala chhuah bawk siloh avangin Hostel atang chuan chhuakin kawngpui kama PCO atang chuan ka number hriat chian em em sa -  0389 234…. chu ka han dial nghal a....

Ka sawi ber pawh chu ka hriat chhuah leh hma chiah chuan tukverh lehlam zawk ka lo lock loh chu thli chuan rawn chhemin ka chalah tak mai hian a rawn khawng chawrh mai a, ka phu chiang kher mai. Ka ngaihtuahna zawng zawng pawh chu rang takin an thlawk bo nghal vek bawk a, choka lam ka va hawi lah chuan ka thingpui lum chu alo so kang vek mai bakah a bel chu alo sen huam khawp hian alo inchhuang rei hman a. Favang boruak zet chuan min va tibuai tak em tiin ka phun nang nang a. Ka chala pawng lawl khawpa tukverhin min khawnna chu ka theih ang anga puana tuamin PCO atanga Aizawl lam ka biak dan chu hriatchhuah leh tuma ka han ngawih vang vang leh pawh chuan ka hrechhuak zo ta ngang lo a, chu tak chu ka lung ti lengtu leh min buan lettu ber chu a ni lawi bawk si a. Nilengin ka ngaihtuah ngat ngat phah a, thildang engmah ka ti hleihtheih loh phah hial a, hriatchhuah tik a awm chuang si lo. Ka tih ngaihna hre lo chuan Favang Boruak zet chuan min va han zuam bik kher em ve aw ti ta ngawt a.