LUNGLEIA Rt-PCR LABORATORY TUR

Mahmuaka Chhakchhuak

Oct. 14, 2021

 

Lunglei Zotlang hmuna Tourist Lodge Building pakhat chu Mizoram sorkarin Reverse transcription Polymerase Chain Reaction (Rt-PCR) Laboratory atana lo hman lailawk turin Sept. 21, 2021 ni atang khan a buatsaihin tunah hian a zualpui chu peih a ni tawh a, October thla chhung hian hman theih tura peih ngei an tum thu hnathawk tute chuan an sawi a ni. Kan hriat theuh angin Rt-PCR Laboratory tur hian Lunglei District Hospital Building kiang lawkah a hrana Building sak a niin, ruahmannaah chuan chhawng nga (5) tur niin a hnuai berah Laboratory dah tur nia sawi a ni a, June 17, 2021 ni atang khan a hmun hi laih tan niin tunah hian Building ban tur phun tan a ni tawh a, chumi Building chu peih a nih hmaa helai Zotlang hmuna Turist Lodge Building hi lo luah lailawk tur a ni.   

Tourist Lodge Building chei thaa hnathawk tute hian an thawk ngawrh hle mai a, nikhatah mi 45 thawh changte an neiin thawktu an tlem tum hian mi 25 vel an thawk tlangpui niin an sawi a, hnathawh a chawlh lohna turin hmanrua pawh theih ang anga buaipui ni bawkin Aizawl leh hmun danga chah buai loin Lunglei hmuna awm ang angte hman a niin chak taka thawh a ni. Amaherawhchu Building hi alo hlui ve deuh hlek tawh avangin chei a ngai nasa hle mai a, a chhuata Floor tiles phah sa pawh a sena lo phah chu a vara thlak vek a niin, pindante pawh siam chawp a ni nual bawk a, Laboratory room tur pawh uluk taka a thar hlaka siam a ni bawk. A chungah Doctor leh thawktute awmna turin room pali duan a ni bawk a, Laboratory room pawh hi a hnuaia dah tura ruahman a ni.

October thla chhunga hman theih tura peih hman a nih chuan sorkar lam pawhin rang taka a buaipui chhunzawm nghal turah ngai ila, Lunglei khawpui tan chauh niloa chhim bial lam mipuite tana mamawhna sang tawh tak hi a hman theih tur hun hi nghahhlelhawm tak a ni. Rt-PCR Laboratory hi kan hriat theuh angin Mizoramah pakhat chauh a awmin chu pawh chu Falkawn hmuna ZMC ah chauh a ni a, chu chu Mizoram hmun hrang hrang atang pan khawm thin a ni. ZMC hmuna Rt-PCR Laboratory-a test tur hian zing dar 9 leh dar 11 inkara ruahman chu chhim tawp atang leh hmar tawp atanga rawn kalte tan nghah a ngaih thin avangin damlote tan harsartna tam tak a awm thei bawk a, a thente chu ZMC thleng hman loa nunna hlu tak chante pawh an awm hial tawh a nih kha. Tuna Zotlang hmuna Rt-PCR Laboratory hman theiha peih a nih hunah chuan kan harsatna tawh tam takte hi sutkianin a awm tawh ang a, nasa takin hriselna kawngah pawh hma kan sawn ngei a beiseiawm.

He Rt-PCR Laboratory neih theihna atan hian tha leh zung sengtu mi tam tak an awm ang a, chung zingah chuan ‘Rt-PCR for Chhimbial’ te aia credit pek tur hi an awm kher awm lo e. Anni thawhrah liau liau a ni a, anni hi awm lo sela hetiang hian Tourist Lodge Building hi buatsaih pawh a ni lo mai thei a, an thahnemngaihna hi a lawmawm a, chawimawi an phu tak meuh a ni. Tun dinhmunah (Oct. 14, 2021 report) hian Lunglei District ah CoviD positive hi 8461 hmuhchhuah tawh an niin Active case hi 1284 an awm mek bawkin CoviD vanga nunna chan pawh 22 lai an awm tawh a ni a. Hei vang hian ICMR leh HMA lam pawhin sample lakna atana 70% aia tam hmang tura a tih Rt-PCR Laboratory hi mamawhna a sang takzet a, neih hlan a nghakhlelhawm hle.

Lunglei District-a Rt-PCR Laboratory nei tur hian kawng bumboh leh nal tak tak a tawng nasa hle mai a, a chang phei chuan bei ti dawng rum rum tur khawpin hotute thusawi hriat tur a awm bawk a. Tunah erawh chuan hei kawng mam a rawn zawh ve tan tain peih mai tura beisei a ni ta hi thil lawmawm tak a ni. Kum khata aia rei kawng a zawhna erawh a rei hlein a ngaihnawm bawk a, thenkhatte lah chuan hmingthat lak tumin thu hrang hrang an lo vawrhdarh mek bawk nitein a hriat a, amaherawhchu he Rt-PCR Laboratory hi hman theiha peih alo nih pawhin hmingthatna la tur ber chu mipuiin buk lung khai ngai miah loia kan chian vek a rinawm.   

Kum 2020 chhung khan hman theihin lo peih nita sela chuan mipuite pawhin kan chhawrin hriselna kawngah, a bik takin CoviD case-ah ngat phei chuan kan tangkaipui viauin a rinawm a. Amaherawhchu a zawh loh tur kawng a zawh kual tak teuh avangin tun hun hi kan thleng ta a ni a, a kawng zawhte han ngaihtuah kir leh phei chuan khawngaihthlakawm tak zawk a ni. Mipuiin duh taka Ram hruaitu atana an thlanchhuah, MLA te ngei pawhin ban huamin he Rt-PCR Laboratory neih theihna atan hian hmalakna an nei lo hi a mak a, kaihbu ang maia anmahni kaihtute kaih dan dana an vir vel mai mai hi chhim bial mipui tan hai der chi lah a ni hauh bawk si lo. An fel lo e, an tha lo e erawh kan ti hauh lo a, mipui tan hna tam tak pawh an thawk ngei a, he chhimbial mipuite mamawh em em Rt-PCR Laboratory tan erawh mipui beisei an pha lo e tihna mai chauh a ni.

Thenkhatte lahin Rt-PCR hi Politics lam hmanrua atan an lo hmang emaw tih mai tura sawi alo awm hi a pawi hle mai a, a tuartu ber chu mipui an nih tlat avangin hetianga politics lam nena lo sawi kawp tute hi chu ram hruaitu tlak an ni lo tawp tihna a ni a, a pawi hle a ni. Party Politics tan hamthat lakna tur pawh a ni lo a, nunna leh thihna thil a nih tlat avangin lohtheihloha mamawh a ni zawk. Chhim lam atanga beiseina sang tak nena hmanhmawh taka ZMC panna kawnga nunna chante chan mawlh hi a rapthlak a, tun hnuah hian thleng tawh lo hram sela a duhawm hle a. Chumi tur chuan tuna Zotlang Tourist Lodge Building pakhata Rt-PCR Laboratory atana lo buatsaih lailawk hi hman theiha peih hlan a nghahhlelhawm a, mipui mamawhna a san tawh avang hian Tlumtea thlir takin kan thlir kan thlir tawh a nih hi.