SUANGTUAHNA RAM

Mahmuaka Chhakchhuak

Sept. 26, 2021

 

Fur ruahtuiin hûl lam a pan ṭan a, Favâng boruak chu a ngaihnawm tawk chauhin a rawn thaw heuh heuh bawk a, chutih laiin Thlasik boruakin rawn luahlan tumin rim a rawn chhuah ṭan mek bawk a. Fur ruahtui lah chuan kal kian mai chu a hreh hle mai tih hriat ngawih ngawihin a thawm a rawn chhuah lehin khawpui a rawn ri dur dur a, a chang phei chuan a lungawih lo ta viau emaw tih tur hian khuate chu a rawn dur tâk khup khup bawk a. Chutiang boruak inthial leh inlum let karah chuan mi tamtakte chuan eizawnna lamah an ngaihtuahna zawng zawng an seng tih hriat tak tur hian zing ni chhuah hma atangin zan khaw thim thak thlengin an lo buai mek bawk a, a thente pawh chuan Thlasik rawn thlen tak tak hmaa peih hman tumin an In luahlai chu an lo thawm tha mawlh mawlh bawk a, ram lama thlawhhma neite ngei pawh chuan an thawhrahte seng mai theih turin an lo buaipui mek bawk a, a thente chuan In lamah Buh dahkhawmna turin buhzem an lo kual mek bawk. Hetih hunlai boruak hi keini, then leh rual aia suangtuahna kawm tam zawkte tan chuan ram hla taka Romei zam leh Ni thla tur ringawt pawhin zan min mut that tir loh phah fo mai bawk si a.

Kan tum reng vang a ni bik lo a, kan duh reng vang lah a ni hek lo. Duh ila, tum ila chuan midang ang bawka ngaihtuah bil lem pawh nei lo a thawveng leh hahdam taka nuih uar uarte hi kan chakin kan thlahlel ve fo thin a sin. Nimahsela thenawmte huana Lamkhuang kung atanga Rengchal hram ri ringawt pawh hi kan tan chuan ngaimawh thamin nunphung a tibuai si. Kum tam tak liam tawha tun ang huna kan hun hmanna hmun hrang hrangte min ngaihtuah chhuah tir a, mahnia khawhar taka ram kan kalnite leh romei zam kara suangtuahna rama kan chen tak dante min hriatchhuah tir leh bawk a, a tel telin an rawn thleng mup mup a, kan thian tha tak takte leh thurulpui thenkhatte erawh chuan chatuan ram min lo pan san tawh bawk nen chuan khawharna chuan min buan thlu fo thin mai.

A mak ngawt mai, Khawharna hian min hneh a ni nghal ngawt bik mai lo a, a tirah chuan thawm dim takin min rawn pan de de a, min rawn hnaih hret hretin a hnu lamah phei chuan buan hneh zawh loh khawpin kan tha chak lohna leh kan sihhnipna lai ber maiah min man bet tlat tawh thin a, patling, kei inti ve tan pawh hian a beilet turin tha reng kan nei tawh ngai mawlh lo. Tlanbosan tumin naupang chiar nak nak kiangahte chuan han awm ve thin mah ila, mipui zik nuaih nuaihna hmun leh lirthei bengchheng karahte pawh chuan han awm ren rawn thin mah ila min zuam laklawh bik nge ni pawh hriatthiam tawh loh hian a tlanbosan theih tak tak chuang ngai loh. Tunlai boruak, thlasik leh Favang boruakin chak zawk leh thuneitu zawk nih tuma an inbuanna karah ngat phei hi chuan zan boruak hi nipui lai huna zan boruak nen chuan in ang lo tak niin danglam tak a ni a, tlai ni tur ringawt pawh hian mittui a ko chhuak fo thin. Zan reh tawh taka hla tak atanga Ar khuang ri pawh bengah a fiah em em mai a, thawm nei ngam chi a nih tawh si loh avangin a dim thei ang berin choka lamah bati kan han chhi eng teng teng a, pen leh lehkhapuan nen bati eng hnuaiah chuan vawi tam hi kan inbuanruak fo thin.

Hla phuahmi tan ngat pawh hetiang hunah hian awm mai mai a har ngawtin a rinawm a, zan lama tui taka mut pawh a har ngawt ta ve ang. Kumtluana a sur asa hnuaia lo lam hnathawhna pawh chawlh lai alo ni bawkin nakin lawkah a rah seng mai tawh tur a nih avangin hahchawlhna hun a ni a, a thenin thingtuah tur an fawmkhawm lai a ni a, a thenin In lamah Buh In tur an lo buaipui bawk a. Mahni duhna lam hawi zawng zawnga nun kan hman hunlai a ni ber mai. Nu thenkhat, thinlung no deuh tan phei chuan hetih hunlai hi an tah tam hunlai tak te pawh a ni bawk a, mahnia an awmte pawh hian khawhar hla sain an zai rat rat thin. Chutianga Favang boruak thengthaw nuam tak avanga Leilung mawina tinreng fiah taka a lan theih hunlai leh zan lamah pawh boruak vawt lutuk lo leh boruak nuam tawk chauh a nih hunlai hian lei mihringte hian favang malsawmna leh thlasik malsawmna kan dawng kawp a ni ber a, naupang te ber atanga kum upa berte thleng hian kan zing tho hi a zang vah vek mai a ni. Naupang zing tho pawhin tah mai chak hmel an pu bik tawh lo a, mumang tha tak nei ang mai hian an hmel hmuh a nuam thin.

Nimahsela chutiang boruak nuam leh hahdamthlak tak chu keini mi laklawh, naupan chhia pel tawh a, chhia leh tha hre vek tawh si, kum la upa tak tak mang bawk chuang si lote tan hian a hrehawm bik em ni aw tih tur a ni tlat thung a. Suangtuahnain Babel In sang kan sa a, naupang hun lai leh chhia leh tha kan hriat tak tak hmaa kan nunte kan suangtuahnaah lo awm bawkin suangtuahnain ram hla tak takah kan kal bawk a, suangtuahna bawkin mahni kan inti hrehawm thin a nih hi. Mi ram, a bikin ram changkang zawktea ram leh hnam rawngbawltute chanchinte thleng thlengin kan suangtuahnaah hmun an chang a, duhin duh lo hle mah ila, kan ram hruaitute nen kan khaikhin lo thei lo bawk si. Kan khaikhina kan hah phah a, kan thinur phah fo thin bawk si a, rual-awh tina tu mai mai lah a ni bawk reng a. Tuna kan ram hruaitu ṭhenkhatte hi chu mual an liam phawt a ngai nitein kan han hre bawk a. Suangtuahna vak velin kil tin kil tang a hrut a ni ber mai. Ngaihtuah loh tur tur kan ngaihtuah zawk em ni tiin thil dang ngaihtuah tum thin mah ila a ngaihtuah loh theih tak tak bawk si loh. Ṭhalaite hian ram leh hnam rawngbawlna lam hi tun aia nasa zawka kan ngaihven a, kan luhchilh a ngai tawh a, ram hruaitu zingah ṭhangthar engemawzat an awm a ngai tawh a ni tiin ngaihdan kan lo nei ve ngawt thin a. Chutih hunah chuan kan kalphung hi chu a danglam phah ngei ang a, kan suangtuahna ram pawh a takin a thleng thei tawh ngei ang tiin mahni leh mahni kan inhnem leh ngawt mai ṭhin a ni hi.