TUIRIAL BIAL MIPUITE TAN

Mahmuaka Chhakchhuak

Sept. 30, 2021

 

Election lam chuan Tuirial Bial By Election neih hun tur a puang ta a, Pathian zarah tluang takin Inthlanna kan neiin Bialtu MLA thar kan nei ngei turah ngai ila, chutih rualin Zoram Politics-ah hmel thar kan hmuh ngei pawh beisei bawk ila a tha ang e. 

Aug. 17, 2021 nia Tuirial Bialtu MLA boral hi mihring lamah chuan a vanduai thlakin a pawi hle mai a, Chunglam hian kan tana tha tur zawkin ruahmanna a neih ring ila, a bik takin Zoram mipuite hian malsawmna thar kan dawnna tur a nih ring ila mitinin tawngtainaah Tuirial bial hi Pathian kuta kan hlan fo pawh a pawimawh hle a ni. Politics field hi a zauin ramri kham chin a nei lo a ni ber a, chu mai bakah mitin a huap bawk avang hian a ngaihven lotute tan ngei pawh hriat loh theih loh turin a thawm hi a ring hma bawk a. Chutiang zelin thil engkim a leng vek emaw tih mai turin Inthlang ramah hi chuan khawilai hmunah pawh sawi a rem vek tho a ni. Sakhuanna nen ngei pawh hian a kal rual hauh lo nain a kal hrang tak tak thei chuang lo a, a bik takin keini kristian ramah phei hi chuan rem leh rem loah pawh kan kal rual tir hram hram zel chu a nih hi.

Tuirial By Election neih tur hi phurawmna tak a awm rualin huphurhawmna tam tak a awm bawk thei ang a, hmanni lawk (April 17, 2021)-a Serchhip By Election kan neih zawh tak nen khan kawng tam takah chuan in anna a awm thei ang a, khatiang ang bawk khan tunah pawh hian By Election kan hmachhawn mek hi a pawimawh bawk a ni. Thenkhatte chuan 2023 Election hril turah ngaiin tuna chakte chu Inthlanpui neih huna chak tur ang maia ngai an lo awm a, a ni lo e a tih ngawt theih loh nain a karah kum khat aia tam ala tlak avangin boruak inlumlet tam tak ala awm theih avang hian a chak te tan ngei pawh ngaihthat ngawt chu a rem hauh chuang lo ang. Amaherawhchu mipui lam (voter-te) erawh kan fing zel zawkin leh social media lama engkim kan tarchhuah thin bawk avang hian Political Party Campaigner-te tan ngei pawh vote zawnna hmuna tawngkam hman fimkhur a ngai telh telh ang a. Sairep khaw pa pakhatin ‘kan khuaah hian khawi Party mahin engmah min rawn tiam tawh suh u’ a tih ang maiin Tuirial bialah ngei pawh hian thil tiam hmanga vote zawn chu a fuh ber lo mai thei a ni.   

Tupawh mai hian hmangaihtu der leh hmangaihtu tak tak hi kan hai bik kher loh ang hian Tuirial bial mipuite ngei pawh hian hmangaihtu der leh tak chu an hai hauhin a rinawm loh a, Party atchilh pawl mi tlemte chu lo awm mahsela atchilh lo tam zawkte ngaihdan chu a pawimawh zawk ngei ang. Chung Party atchilh ve lote chuan an bial hmangaihtu chu vawiin atang ngei pawh hian sawi lo mahsela an thinlung chuan a zawng hmu tawh hial mai thei a, ngaihdan siam har tite pawh thahnemtham tak chu an la awm tho bawkin a rinawm. Chutiang karah chuan Party lamte pawhin vote khat lek avanga chaka chak loh theih a nih tlat avangin an thiam leh theihna zawng zawngin nen vote an zawng dawn a ni a, tawngkam thiam leh thiam lo kar pawh a hla viau turah ngai ila. Pahnihna nihin awmzia a awm loh dan pawh hre sa vek an nih dawn avangin Pakhatna nih ngei tumin chhun leh zan pawh sawi loin tan an khawh nasa hlawm viau ngei ang a.

Hei tunah Party lian pathumte chuan Official Candidate an han puang chhuak ta bawk a, an vawrhchhuahte hi la thalai tak tak vek an ni lehnghalin MLA atan pawha itawm tak vek an ni. Congress Party Candidate Chalrosanga Ralte (Mavala) hi Kum 2013 – 18 khan Lunglei West bialtu MLA alo ni tawhin MLA anga a hnathawh leh a thiltih tawhte pawh hriat harsa lo tak tur a ni. Kum 47 mi chauh ala ni bawk a, mi tho thang tha tak a niin Tuirial bialah pawh hian tling ta sela bial a vil hneh viau a rinawm. ZPM Party Official Candidate Laltlanmawia pawh hi thalai tak, kum 45 mi chauh a niin First Class Contractor a ni a, midangte tanpui mi niin khawtlanga mi inhmang tak a ni bawk.  Sorkarna fawng chelhtu MNF Party Official Candidate K. Laldawngliana pawh hi kum 49 mi chauh ala ni bawk a mi tho thang tha tak a niin vawiin thlengin chanvo chelh lai pawh a nei nualin khawtlanga mi inhmang tak a ni. Anni pathum bakah hian BJP chuan Candidate neih ngei an tum thu an sawi ri tawh nain puanchhuah an la nei chiah lo a, amaherawhchu kan sawi tak Party pathumteah hian mit a fu deuh hlawm niin a hriat.

Candidate-te hi mi tha tak leh bial chhung mipuite hmangaih tur takte pawh an ni ngei mai a, anmahniah ringawt hi chuan duhthlan thiam pawh har tak tur an ni. An awmna Party erawh thlir tel loh theih loh a nih avang hian Tuirial bial mipuite pawhin anmahni chauh niloin an awmna Party theuhte hi an thlir tel a rinawm a, a pawimawh reng bawk a ni. Kum tam tak kal tawh atanga Zoram mipuiin Politics kan chhiatpuina ber pakhat chu Party Politics inthliarna hi a ni a, hei vang hian tuna MLA kan thlanchhuah turah pawh hian mitin huapzo tur leh mitin tana rawngbawl tur mi kan thlanchhhuah ngei a pawimawh viau ang. AAY leh BPL ah ringawt pawha Party induhsakna kan neih thinte hi Tuirial bial mipuite hian nuaibo thei tura rualkhai taka mipuite tana rawngbawl tur an thlanchhuah theih ngei a tha a ni.  Sawi tawh angin Serchhip bial atangin thil thar kan hmu tawh a, bial mipuite kan fakna ri pawh a ring viau a nih hi. Hetiang bawk hian Tuirial bial mipuite ngei pawhin Zoram Politics ah bung thar min kaipui ngei ula kan duhin kan beisei che u a, hriatreng tlak rahbi thar min chuankaipui ula, Politics tuinu leh bawlhlawh tak karah pawh fim kara awm reng turin kan han ngen nghal duh bawk a che u.