KAN MIZO BIBLE TAK HI CHU AW - II

Mahmuaka Chhakchhuak

Aug. 23, 2021 

 

 

Kan Mizo Bible hi chi hrang engzatnge awm ka hre thei mai lo a, ka theih ang angin ka dap ve ṭhin nain tunah hian chi hrang Paruk chu ka hmu thei hram a, a dang ala awm em ka hre tawh lem lo a ni. Hengte hi ka hmuh theihte chu a ni a; -

PATHIAN LEHKHABU THIANGHLIM;  1965 Edition

PATHIAN LEHKHABU THIANGHLIM;  C. L, 1994 – 1995 Edition. 

PATHIAN LEHKHABU THIANGHLIM;  O.V. Reference, 2005.

PATHIAN LEHKHABU THIANGHLIM;  2005 C.L. Re – edited.

KAN LALPA LEH CHHANDAMTU ISUA KRISTA THUTHLUNG THAR;  By Bible International.

PARALLEL BIBLE (NKJV – MIZO);  By Bible for the World

 

Hengte hi a in ang lo vek a, a ṭhen hi a fiah bikin a ṭhen hi a fiah lo deuh bik chang a awm bawk a ni. Kan hriat ṭheuh angin Mizo Bible hi Sap ṭawng atanga lehlin a ni a, nimahsela, NIV ang maiin kan Mizo Bible hian a duh dan dan angin a ziak mai niin a hriat a. A ṭhen a fiah viau laiin a ṭhen a letling sual bawk a, a ṭhen lah a thu danglam daih turin a letling bawk a, hming te lah hi a nih ang anga lehlin mai tur a nih laiin hmun danga hman rem miah lo tur angin mak tak takin a let ling bawk a.  

Tin, Mizo ṭawng chungchangah pawh hian dik ber pawh hriat theih loh turin an hman dan a in ang lo thluah mai bawk a, khawi ber hi nge dik ka hre thiam ta lo e. Grammar lah a mumal bawk si lo a, (ka ziak ngeiah pawh hian grammar dik lo in lo hmuh tawh ngei ka ring tho bawk a..hahaha). Mizo ṭawng hi a har hrim hrim bawk a ni. 

Hetiang hian han en ta hlawm ila:

Atir – A tir

Amaherawhchu – Amaherawh chu

Chutichuan – Chuti chuan

Ngaiteh – Ngai teh

Dan zirtirtu - Danzirtirtu

Che a – Chia

Fingi – Pathian fin zia – Finna

Thilmak – Thil ropui 

Mi te ber – Mi te deuh

Lungkham – Engto – Ngaihtuah buai

Ziaawm -  Zia awm

Lo vang – Lovang

Achinah chuan – Atang chuan

Van ram – Van lalram

Tupawh – Tu pawh

Engtinnge – Engtin nge

Dawhtheih – Dawh theih

Thlaemat – Thla em at

Thlitih – Thil tih

Engzatnge – Engzat nge

Pumkhat – Pum khat

Engatinge – Engati nge

Mitilreh – Mi tilreh

Engnge – Enge – Eng nge

Thusawi – Thu sawi

Tunge – Tu nge

Inring – In ring

Engemaw – Eng emaw

Chumi lai chuan – Chumilai chuan

Jentail – Gentail

Buatsaih sakate - Buatsaihsakate

Lungni ta lo – Lungni lo ta

Engtizia nge – Eng tizia nge

Tehkhinthu – Tehkhin thu

Engahnge – Engah nge

Chumi ni – Chu mi ni

Mi tu emaw – Mi tuemaw

Thupek – Thu pek

Phurrit – Phur rit

Tuman – Tu man – Tuma’n

Silfai – Sil fai

Mitthi – Mithi

Cheimawi – Chei mawi, adt

 

Hengte hi a tlangpui chauh nisela, heng lo pawh hi a dang ala tam a ni. Matthaia 11;19 thu ami hi 1963 Edition chuan ‘Fingi’ a tih laiin 1994 – 95 Edition chuan ‘Pathian fin zia’ a ti a, a dangte chuan ‘Finna’ an ti mai bawk a, a eng hi nge dik ta ber ang? English lamah chuan ‘wisdom’ tih a ni mai bawk si a. Hetiang hian hriatthiam loh tam tak ka nei ta mai a, Mizo ṭawng dik leh dik lo tehna ber atana Bible kan hman dawn phei chuan ngaihtuahna a tibuai ta riau mai. 

Mizo ṭawng hi kan pianpui ṭawng mah nisela, a har zia hi ka hre dawn chauh zawk nge ni? Tun hmaa ka la hriat ngai lem loh tam tak ka hriat phah a, tunhma kha chuan (tunah pawh a la ni reng tho maithei a) Kan Mizo ṭawng Bible hi ṭawng dik tehna atan kan hmang ṭhin niin ka hria a, nimahsela, kan Bible meuh pawh hi duhthu a sam ta lo nge ni ang leh ngaihtuahna buai map map chang a tam tho mai. Kan Mizo ṭawng Bible chi hrang paruk atang hian Mizo ṭawng dik nia ka lo pawm tawh pawm ngam loh tam tak ka neih phah ta tlat mai a, Heng atang lo hian khawi atangin nge a dik chu tehna ka hre bawk chuang si lo! 

Heng Bible te hi chik taka bih chuan a danglamna a tam mai a, ‘Chang tinah danglamna a awm’ tih theih hial tur a ni awm e. Mizo ṭawng dik thei ang ber tura buatsaih niin ka hre naa heti chuan tawng dik tehna atan chuan a hman tlak hauh loh mai! 

Hetiang hian Matthaia ziak hi han khaikhin ila; - 

Matthaia 5;22

PATHIAN LEHKHABU THIANGHLIM (1963 Edition) - kei erawh chuan, Tupawh a unau chunga thinur apiang chu rorelnaa din hlauhthawnawm takin an awm ang a; tin, tupawh a unau hnena, ‘Raka’ ti apiang chu, roreltuho rel saka awm hlauhthawnawm takin an awm anga; tin, tupawh, ‘More’ ti apiang chu, Gehenna meia paih hlauhthawnawm takin an awm ang tih ka hrilh a che u.

 

PATHIAN LEHKHABU THIANGHLIM (1994- 95 Edition) -  Kei erawh chuan ka hrilh a che u, mahni unau chunga thinur chu a chung thu rel a ni; a unau ‘mi chhawih pa’ ti chu Sanhedrin-a rel tur a ni ang; a unau ‘mi a pa‘ ti phei chu hremhmun meia kal tlak a ni tih ka hrilh che u hi.

 

PATHIAN LEHKHABU THIANGHLIM 2005 (C.L. Re-Edited) - Kei erawh chuan ka hrilh a che u, tupawh unau chunga thinur apiang chu, a chungthu rel a ni ang a; tupawh a unau, ‘mi chhawih pa‘ ti apiang chu, rorelna sanga a chung thu rel a ni ang; tin, tupawh ‘mi a pa‘ ti apiang chu, hremhmun meia kal tlak a ni tih ka hrilh a che u.

 

KAN LALPA LEH CHHANDAMTU ISUA KRISTA THUTHLUNG THAR  (Bible International) -  Kei erawh chuan ka hrilh a che u, tupawh a chhan awm lova a unau chunga thinur apiang chu rorelna hmaah a ding ang. Tin, tupawh a unau, ‘mi chhawih pa,’ ti apiang chu Sanhedrin hmaah a ding ang, tupawh ‘mi a pa,’ ti apiang chuan Gehena mei a hmachhawn ang.

 

PARALLEL BIBLE (Bible for the World) - Kei erawh chuan ka hrilh a che u, chhan awm lo va mahni unau chunga thinur apiang, a chungthu rel a ni ang a; tupawh a unau ‘mi mawl pa‘ ti phei chu, rorelna sangah a chungthu rel tur a ni; tin, tupawh ‘mi a pa’ ti apiang chu, hremhmun meia kal tlak a ni tih ka hrilh a che u.

 

Hetiang hian a danglamna kan hmu thei mai ang a, ‘Raka’ tih leh ‘More’ tia 1963 Edition in a sawi hi enge a awmzia ni ang? ‘Raka’ tih hi Bible dang pathum (1994 -95 Edition, 2005 C.L. Re-Edited, Bible International) te chuan ‘Mi chhawih pa‘ tiin an dah a, chutih laiin PARALLEL BIBLE  chuan ‘mi mawl pa’ tiin a dah thung a, a eng hi nge dik ta ang le?

 

Matthaia 6;20 thuah pawh hian han en leh ila; -

 

PATHIAN LEHKHABU THIANGHLIM (1963 Edition) - vanah, sulrul leh tuiekin a ei chhiat lohnaah, rukruten an rehpawha an ruk hek lohnaah chuan, in tan rote khawl khawm zawk rawh u;

 

PATHIAN LEHKHABU THIANGHLIM (1994 - 95 Edition) - Vanah, thim leh tuiekin a ei chhiat lohnaah, rukruten an reh pawha an ruk hek lohnaah chuan in tan ro khawl khawm zawk rawh u

 

PATHIAN LEHKHABU THIANGHLIM (2005 C.L. Re-Edited) - vanah, sulrul leh tuiekin a ei chhiat lohnaah, rukruten an rehpawha an ruk hek lohnaah chuan, in tan rote khawl khawm zawk rawh u;

 

KAN LALPA LEH CHHANDAMTU ISUA KRISTA THUTHLUNG THAR (Bible International) - Vanah sulrul leh tuiekin a ei chhiat lohnaah leh rukrute’n an rehpawha an ruk hek lohnaah chuan in tan rote khawl khawm zawk rawh u.

 

PARALLEL BIBLE (Bible for the World) - vanah, thim leh tuiekin a ei chhiat lohnaah, rukruten an reh pawha an ruk hek lohnaah chuan in tan ro khawl khawm zawk rawh u;

 

Hetah pawh hian ‘sulrul leh tuiek‘ tia Bible pathumin a sawi laiin Bible dang pahnihte chuan  ‘thim leh tuiek’ an ti thung. English lamah chuan (KJV, NIV, etc) chuan MOTH leh RUST a ti a, thim leh tuiek tih hi a dik zawk a ni lawng maw?