MIPUI BEISEI SORKAR

Mahmuaka Chhakchhuak

Nov. 24, 2021

 

Zoram mipuite hian sorkar hrang hrang hrawn tawh mah ila, kan beisei an pha lo zel ni ber hian a hriatin kan phunnawi zel em ni tih tur hi a ni a. Hei hi mipui lam thiam loh ngawr ngawr niin phunchiar vang pawh a ni chiahin a hriat loh a, sorkar hruaitute lam pawhin thiam lohna chen an nei ve thoin a hriat. UT kan nih chhung kha chu tlemin hun alo kal deuh tawha mi tam tak tan chuan thawnthu ang ruai chauha hriat theih tur a nih tawh avangin rual u zawk leh lehkhabu hmang lo chuan keini ngei pawhin kan hre thei meuh lo. State kan nih tan tirh atanga vawiin hun thlenga kan sorkar kalphung tam tak erawh chiang deuh taka ala hriat theih mai avangin UT hunlai chu sawi loin State kan nih hnu lam chauh sawi pawh hian zoram mipuite hian kan sorkar hrawn tawhteah hian kan lung a awih chiah lem lo niin a hriat a. A khat tawk hian pawl eng eng emaw te hi alo pian phah fo thin bawk reng a nih hi. Nimahsela chung pawl thar rawn piangte chuan rei an daih thei tak tak meuh loin pawl lian zawk lem zawha awmin a then chu an zuzi ral leh mai bawk a.

Vawiin hunah ngei pawh hian Political Party sawi tham kan ngah lem lo nain Sorkarna chang tawh bik sawi pawhin MPC Party phei chu an vanglai hun an pel tawh nia hriat a niin tun dinhmunah chuan ral lam an pan emaw tih hial tur a ni a. MNF Party leh Congress Party te hian Term hnih aia tam ve ve sorkarna chang tawhin vawiin hun hi min hruai thlen chin ala ni rih a, MNF Party zawk phei chu vawiin hunah kan sorkarna fawng chelhtu an ni mek bawk a. Hei kum hnih aia rei rorelna fawng an chelh chhung ngawt pawh hian mipui beisei an phak leh phak loh chu kan hre thei ngeiin a rinawm a, engemaw chenah hripui lengin min tibuai ngei mahsela hmun hrang hrangah lungawi lohna thawm hriat tur a awm a, kum hnih vel hun an la neih chhung hian mipui lungawihna phuhru zo thei ngei tura hna an thawh loh phei chuan Opposition lam hawi hian zoram mipui te hian rilru an pe daih mai ang tih pawh awl tak tur a ni. 

Chutih mek laiin Opposition lam thlir pawhin beisei a sang lem lo viau thei bawka hriatna a awm a, Sorkarna fawng lo chelh tawha an mize thup leh thup loh pawh chiang taka kan hriat theih tawh ngei tur Congress Party chuan thawm chi hrang hrang neiin an insiam tha mek ni bawkin a hriat a. Party President berin chawlh a tum thu a sawi chuan Party chhungah boruak a siam nia hriat a niin chawl tura duh leh chawl rih lo tura duhtute inkarah boruak a awm ni awm tak a ni. Kum thar mai hi hruaitu ni mekte hun tawp hun a nih bawk si avangin hei hian chhungkaw boruak a that phahin a chhiat phah thei ngei dawnin alang a, a that phah hlauh a nih chuan structure lian sa leh Party nghelhnghet tawh an nihna hian sang takah a vawrh kan phah ngeiin a rinawm. A nih loha an chhiat phah thung erawh chuan General Election hi an tan chuan a huphurhawm ngawt ngei ang le.

Congress Party ang bawka Opposition-a awm ZPM Party ngei pawh hi kum 2017 a pawl paruk (6) infinkhawm atanga lo piang an niin reiloteah Election an hmachhawn nghalin tun dinhmunah hian MLA 6 an nei mek a. MP (LS) thlanah erawh an Party chakna leh chak lohna hriatthiam harsa tak turin Congress Party an thawhpui a, Local/ Village Council leh AMC Election erawh an Party nihna lang turin thawhpui nei loin an hmachhawn thung. Heng inthlannaahte hian an dinhmun chu kan hre hlawm ngei ang a, hmun thenkhatahte chuan an chak viau laiin hmun thenkhatah thung chuan beisei an pha lo viau niin a hriat. Chutih mek laiin Sorkar kan lo hrawn tawhte – MNF leh Congress Party kham tawhna leh sorkar thar duhna a len tawh em avang thung chuan mipui thlawpna an hlawh tha viauin a hriat a, hetia ngaih mai chuan an hmabak hi a eng viauin a hriat. Thawhhona tha tak nena an kal zel chuan General Election hi an tan chuan huphurhawm loh viau theih tur a nih hmel.

Chutih lai erawh chuan Mipui beisei Sorkar hi Party lam pawh hi ni berin a lang lo a, sorkar kan lo hrawn tawhte a Party feeling lian lutuk thin leh Unit President lal lutuk ang chi duh lohna lam hi a ni zawk mahin a hriat. Thalaite ngei pawh ram veina kawngah an thanharh nasa tawhin social media lamah phei chuan inthlahrunna nei hauh loin an sawi fo thin a. Keini ang bawka ram hnufual leh rethei ve bawka kan ngaihte lahin hmasawnna kawnga chak taka an kal tih an hriat phei hi chuan kan sorkar kalphung hi selna tam tak an nei thin a nih hi. Khawi Party nge ni a, tute hi nge sorkarna fawng chelh ang tiin kan Party liante hi an buk mek ni bawkin a hriat. Party atchilhte erawh mi tlemte an niin anni ngaihdan chu thlak rual a awm lo nain Party tan lam nei lem lo, neutral kan tihte erawh a tam ber niin hmuntinah chhiar tham hi an awmin anni hi tunhma lam pawha Political Party lamin an lo chak phah fo thinna an ni.  

Hei vang hian Party atchilhte ngaihdan ngawt hi a pawimawh hauh loin neutral-te ngaihdan hi thil pawimawh tak a ni a, vawiinah ngei pawh neutral tam takte chuan kum 2023 thlirin tawngkam an lo nei fo tawh reng a ni. A fawng chelhtu lam MNF Party hian mipui lung an ti awih zo ang em ala hriat loh a. Congress Party leh ZPM Party te hi buk mekin an awm bawk a, Mene mene tekel upharsi tih ang maiin tling lo tur hi a hriat mai rih bawk si loh avangin Opposition lam pawhin an theih tawp an chhuah mek a nih hi. Hetih mek lai hian thenkhatte chuan Pathian rawnin tawngtaina urhsun tak an hmang mek bawk a, tun dinhmunah hi chuan mipui kan lungawih thei lo a kan dam thei lo a ni ber mai. Opposition lam hi tanrualna tha tak nena an kal loh chuan mipui beisei sorkar hi a piang lo mai ang a, kan hriat hnu leh kan hrawn tawh hnu bawk sorkar hi kan hrawn leh ala ngai mai thei a ni.