NUPA NUN

Mahmuaka Chhakchhuak

Oct. 31, 2021

 

Nupa nun meuh sawi tur chuan ka tling lo tih ka inhre reng a, hrechiang pawh ka ni hawt lo a, hre ve tan dek dek chauh ka ni nain ka hriat chhun hi sawi chhuah ve ngei ka han duh tlat mai bawk si. Nupa nun hi alo hautak ngang mai a, chutih laiin thenkhatte chuan an lo la thutak lo em em thung bawk si a, keiniin kan tawn chhun kan han nei mai tak nain thenkhatte lah chuan thla reiloteah an thlak leh mai thin bawk a, kum khata pasal pathum nei pawh an awm hial a ni awm e.  

Nupa nunah hian thil pawimawh tak taka lo tam hle mai a, zir zawh sen theih pawh a ni kher lo ang. Keiniin nupui kan han nei ve ngawt mai hi chu thil zir tur hi a tam bikin a hriat a, nimahsela vawiin thlenga hlim takin kan la awm thei hi chu thil lawmawm tak a ni. Nupa nunah hian thil pawimawh deuh pakhat awm chu – Hmangaihna lantir fo hi niin ka hria a, mipa tan ngat phei chuan kan taksa peng pawimawh ber an nihna kan lantir fo hi hmeichhe tan alo hlu ngawtin a rinawm. Zing thawh hlim atanga zan mut leh thlenga hmangaihna lantir miah lo mipa tan hi chuan nupui fel tak neih hi beisei loh law law chi ni hialin a hriat a, kan nupuite hian kan dah pawimawh a ni tih hi anmahni ngei pawhin an hriat hian an lawm a, min hmangaihin min ngainat phah lo thei lo a ni.

Hmangaihna hi sawi chi a nih rualin sawi loa lantir chi a ni bawk a. Mi tam tak chuan hmangaihna hi sawi nuam an tiin awlsam tak ang hian an sawi leh mai thin nain nupa nunah kher chuan nitin lantir theih hi alo hlu zawk hmel daih a, hmeichhe tan pawh hmangaihtu hmangaih let chu alo hrehawm bik hauh si loh. Chumi atana pawimawh hmasa ber nia lang chu inkoh danah hian a ni thei awm e. Kan nu hi My dear tihte, Lungrunpui tihte hian ka ko thin a, pawi a sawi lo viauin ka ring a. Tunhma lamah kha chuan mi tam takte hi hmingpumin an inko lawl lawl thin a, anmahni chuan engtin pawhin lo ngai pawh nise midang tan chuan alo mawi lo duh viauin a hriat. Chuvangin an kohna hmingin emaw kohna huatthlala lo lama kan koh thin hi alo tha zawk ngeiin a hriat.

Nupaa midang zinga awm hian kan nupa inkar hi tawng lo hian kan lantir duh viau mai bawk a, entirna atan; mitthi In emaw inneih lawmna hmunah emaw han kal hian nupa chu kal dun alo mawi mai bakah a rem phei chuan thut dunte hi alo mawi duh viau mai a. Tin, midang zinga inmawl biak maite hi alo tha lo viau mai thin bawk. Uchuak siloa kan inhmangaihna leh kan in ngaihsakna lantir fo thin hi hmuh a nuamin alo nuam bawk a, midang tan pawh kan zahawmna zawk zel alo ni. Nupa karah kher chuan thuruk hi awm lo hram bawk sela, a chhe berah pawh intanpui tawn tur kan nih avangin thil engkim sawi tlan thin hi alo hlu bawk viau a ni.  

Inrinngamna hi thil pawimawh tak mai bawk a ni a, nupaa inrinngamna kan neih tawh loh chuan nupa inthen hi kan hnaih tawh hle tihna a ni ang. A nih loh vek pawhin nupa nun chu ngaihtuahawm tak kan ni tihna a ni ang a, keimahni chauh pawh niloin kan fate tan ngei pawh a hrehawm duh viau ang. Hei vang hian nupaa thil sawidun fote hi chin tur a ni a, ngaihdan in ang lo alo awm pawhin tha taka sawi tlan a, kan ngaidan anga kaltlangpui kher tumte hi nupa kara se se awm tanna a ni duh viau thin. Sum leh pai chungchangte hi nupa tam tak inhauhna bul a ni thin. Cell Phone te hi kan uar a, kan hmang tangkai bawk a, hengte hi nupa thenkhatte chuan inthen phahna atan an hmang thin a, a pawi em em a ni. Nupaa en duna pawi tur thil chu mahni pawha tih loh mai tur a ni a, kan hmuh loh laia an lo ena pawi tur ang chiah chuan inrawlh loh mai pawh hi nupa inremna atan a pawimawh viau bawk.

Ka thiam a, ka hria chu ka ti hauh lo nain ka nupui hi kumkhua atana Pathian hminga ka neih a nih tawh avangin lo inthen pawh ni ila keimah min demna tur zawk leh keima thiam lohna zawk a nihna tur chuan engmah tih loh ka tum fan a, hmeichhe dang ngaihzawng neih emaw nupuite thlim zawnga thiltihte hi alo tluang lo duh viau thin. Mipa zawk nih vanga inchhunga lal emaw intih mai te, nupuite tirh reng maite hi nupa inhauhna bul a ni duh fo thin bawk a, kan nupuite chu zah thiam taka kan biak thin hi hmangaihna lantirna atan thil pawimawh tak a ni. Inchhunga kan theihna leh thiam zawng a nih chuan thil tul awm ang angte lo tih ve bawrh bawrh hi hmeichhe lawmna thlentu pawimawh tak a nih mai bakah hmangaihna tipungtu alo ni zel a, mipa chuan kan theihnghilh loh a tha bawk a ni.

Nupa inhmangaihna hi a thuk a, a ropui bawk a, a zahawm bawk. Kan in ngaihzawn lai chuan la inthen leh mai thei te kan nihna lai a awm a, nupa nih tawh chuan inthen leh mai alo rem tawh lo a, lo inthen ta tehreng pawh ni ila mipa pawh ‘Pathlawi’ kan lo ni tawh anga, anni pawh ‘Nuthlawi’ an lo ni tawh bawk ang a, midang zawng leh pawh ni ila kan hlutna a lo tlahniam emaw a nih si chuan kan phu tawk hi a sang lua lo mai thei. Chuvangin mipa leh hmeichhe inkara Pathianin hmangaihna a dah hi a thukzia sawifiah thiam chi rual a ni lo a, sawifiah zawh sen chi pawh a ni lo. Pathianthuin ‘Hmangaihnain a dawh thei a, ngil a nei bawk thin…..’ a tih zawng zawng kha nupa nuna pawimawh vek a ni a, nitina kan vawn reng tur pawh a ni.  Chuvangin mipa tan hmeichhiate hi kan mawina a ni a, hmeichhe tan pawh mipate hi an ropui leh zahawm alo ni.

Nupa Nun hi mipa leh hmeichhe inkara hmangaihna avanga piang mai a ni lo a, chhungte inbiak remna avanga lo awm ta mai pawh a ni hek lo. Pathianin amah ṭih taka chibaibuktu a neih theihna atana leilung pian hma aṭanga alo ruahman tawh a nih vang zawka mipa leh hmeichhe inkara hmangaihna daha ti ṭhanglian a, alo puitlin theihna atana Nupa Nun hi a buatsaih zawk a ni.