PU HAWLA

Mahmuaka Chhakchhuak

Nov. 15, 2021

 

 

Pu Lal Thanhawla tih hming ringawt pawh hian keini naupang deuhte thinlungah chuan tu dang mah hawi loin Mizoram Chief Minister hlui leh Congress hruaitu kumhlun tih hi a chiang nghal em em mai a, Mizoramin CM kan neih tawh zawng zawngah pawh hian a hming hi kan hriat lar ber a ni tlat a ni. Tun hnaiah MPCC President atanga chawlh a tum thu sawi a han awm a, 2023 ah pawh in candidate a tum tawh loh thu sawi rik a han awmah hian keini kum lama la naute na na na tan chuan engemawti takin khua ati har thei mai dawn a, reh vung vung tura han ngaih phei chuan amah hnaih lem lo mah ila a ngaihawm thei hial dawn mai.

Politics zinkawng hi va hre thuk lem lo mah ila Pu Ch. Saprawnga’n ‘Politics atanga chawlh hun hi hriat har tak mai a ni a, kan thawhpui thenkhatte’n Politics ah chawl tawh mai se min tih hun lai hian sorkar hnathawk pension te’n Politics an rawn zawm ve tan chauh a ni si a’ a ti e an ti a. Hei hi a dikna chen a awm thei awm e. A leh lamah chuan hruaitu ber nih tlat bawk si chuan chawlhsan mai hi chu a har duh viauin a rinawm a, taksa lamin a tlin chhung chu bansan mai har tak tur a ni. Tunah ngei pawh hian Pu Hawla ngei pawhin chawlh a han tum chhan hi a taksain a tlin tawh loh vang nge ni a, midangte tan hmun a ken duh vang zawk ni ang tih hi ngaihtuah tham tak a ni awm e. Kum 80 pelh tawh hnu chuan mihring tupawh mai hi kan lo chak tawk tawh lo ngei ngei a, Pu Hawla chawlh tum pawh hi a duh reng vang a ni angem tih hi zawhna awm thei a ni a, thenkhatte chuan tunhma kum 10 velah te khan lo chawl tawh zawk nisela a hmingtha viau ang an lo ti bawk reng a.

Amah hrim hrim hi chu mi chhuanawm tak a niin mi ngainatawm tak pawh nia hriat a ni. Kum 2018 kum tirah khan Thenzawl hmunah thlalakpui tum hian programme hmanna Hall kawtah alo chhuak tur hi ka lo chang a, a PSO chu ka Tablet ken tirin min lo hmehsak turin ka ngen bawk a. Thla kan han la chu amah ber chuan ‘khawi maw, a fiah tha em, ka lo en’ tiin min rawn en sakin fiamthu a han thawh hlut mai bawk a. Keiniin Mizoram Chief Minister meuh tiin kan pathian biak lo chauh a nih laia tlangnel taka min rawn be ta mai chu a lawmawm duh viau a ni. Chumi tlaiah vek chuan Zanriah kan eiho bawk a, chaw eina dawhkan bula a thut laite pawh chuan fiamthu a thawh peih ber a, intih hotu leh intih zahawm lam hi a tum lo hrim hrim. Hemi tuma awlsam tea Arsa siam tui dan a sawite pawh chu vawiin thlengin ka la hre reng a.

Politiciante hian hna tam tak an thawh rualin palbuak leh palthluk tam tak an nei ang tih hi chu sawi lawk theih hial tur a ni a, Pu Hawla ngei pawh hian felloh tam tak a nei ang tih hi chu sawi ngai lo a ni. Chutih laiin a lehlamah Pu Hawla hian amah beitute leh amah tihchhiat tumte hi thiam tak leh ropui takin a kuangkuah leh thei thung tlat si hi a danglamna tak a ni awm e. Kum 2005 vela a khawnbawl upa min Pu J. Lalsangzuala, CL. Ruala, Saikapthianga, Liansuama leh mi dang dangte khan Pu Hawla Umbrella atanga chhuakin Mizoram Congress Party dinin Office hran nei meuhin an awm hman a. Mi tam takin kan lo thlir danah chuan Congress Party chuan tuar hle dawnin kan lo ngai a, nimahsela kum 2008 alo thlen leh meuh chuan Pu Hawla hnuaiah bawk an kun leh tho a nih kha.   

Politics Platform ah hi chuan a ruh no no chhuakah tih ang maiin dinhmun tha leh chanvo sang hi ruhno deuh tan chuan chan har tak tur a niin, ruhno deuhte chuan lo chang ta tehreng pawh nisela awlsam taka nek chhuah leh mai te hi ni thina hriat a nih tlat avangin heti chen Pu Hawla’n President nihna a chelh thei hi a tuang a chhah tawk hle niin a rin theih. Kum 1984 – 86, 1989 – 98, 2008 – 2018 chhungtea Chief Minister a ni thei hi Politician tam takte tan pawha thil harsa tak leh theih loh hial tur a ni a. A ni hi chuan amah ertu leh a dinhmun chuhpui thei tur angte hi lawm tak chung siin a dah sawn thiam tlatin a lamtangah a siam thei tlat zelte hi Politician zingah rau rau pawh thil har tak a nih laiin a ni chuan a thei tlat si a. Tunah ngei pawh Party President nihna hi a duh chuan a la chelh reng theiin a rinawm a, Party tana tha tur leh ram tana tha tur nia a hriat vanga chawlh tum a nih a rinawm.

Amaherawhchu heti chung hian Politics hi har a tih ve ngei a rinawm a, thiam tak tak a intih a rinawm loh. Vawiinah pawh hian zawt ila a duh ang taka hun a hman a rinawm bik hauh loh a, beidawnna tak tak tham thil a tawn a rinawm a ni. Kum 2008 inthlanpuia MNF sorkar an paihthlak a, Seat 40 a seat 32 ngawt mai an han la thei te kha thenkhatte chuan vawiin thlengin engemaw an la puh tlat a nih hi. Amah Pu Hawla ngei pawhin ram siamthat a tum viauin a hriat a, Minister hnathawk tha lo chu kan indim lo ang te pawh a tih hial kha. Zoram Politics ah sulhnu tha tak neih pawh a tumin a hriat a, a zung nena phoro tih pawh sawi lar a nih viau reng a. Sorkar khalh ngil turin ETHICS a din hial tak nain hna erawh an thawk meuh hman tak tak lo a. Anni khan hnathawk tak tak hman nisela chuan sorkar hmelhmang pawh a danglam ngeiin a rinawm.

Pu Hawla hian hruaitu nihna a nei tha em em a, a changin tawngkam phawhraw tak tak a hmang a, a changin fiamthu duh hmel takin a tawng leh mai thin bawkin ama mimal kawng chu a sial thiam viau nia hriat a ni. Politics ah chuan hmelma hlun leh thian hlun a awm tak tak thei ngai lo tih angin Pu Hawla hian ama hmelma anga ngaihte ngei pawh hi a be chhe reng chuang hauh lo. Khati taka Rev. Zairema leh Pu Bualhranga te’n PIL thehluta Delhi tlanga an buaipui lai ngei pawh khan ‘Chhuana pa, in dam tha maw? tiin Pu Bualhranga pawh ala be hmasa zawk thei tlat hi a ropui bikna kan ti lo thei lo ang. Keini tan chuan thil theih rual loh tur a niin khawi hmunah pawh hmuh loh der hram hram kan tum zawk ngei tur a nih laiin a ni chuan ala be hmasa zawk tlat si a. Tin, thiante hmangaihna ngah mi tak a niin thiante tana last coins pawh phawrh phal a ni tlat bawk.

Tunah hian MPCC term an hman mek hi kum 2022 ah a tawp dawn nia hriat a niin Pu Hawla hian President atanga a chawlh chuan tuna Vice President Pu Lalsawta hian President nihna a chelh chho tura ngaih a ni. Pu Sawta hian President nihna hi lo chelh mahsela Pu Hawla blessing a dawn chuan loh chuan Congress Party tan hian awmzia a awm kherin a rinawm loh a, Pu Hawla hian lawm taka a hlan a, thinlung taka MPCC President nihna hi a ken ngei a ngai awm e. Congress Party hi Regional Party an ni loin National Party niin India ram chhunga State dangahte ngei pawh an thahnem viau a, Mizoram leh hmun thenkhatte erawh an tlakchhiat lai a ni thung. Nimahsela Party ruhrel lian sa an nih tlat avang hian an insanmar that leh theih chuan khitah an awm thei tlat. 

Pu Hawla hian sulhnu tam tak a nei a, thenkhatte chu chhuanawm tak tak a ni bawk. Mizorama thlawhna tumhmun puitling kan neih hmasak ber Lengpui Airport kan neih theihna atana kum 1995 December thla atanga kum 1998 February thla thlenga hnathawh pawh Pu Hawla CM hunlai a niin Bairabi khuaa Rel rawn lut pawh Pu Hawla CM hunlai bawk a niin Mizorama Medical College kan neih chhun ZMC pawh hi a CM laia kan neih a ni. Mizoram tan suangtuahna tam tak a neih ngei thin pawh a rinawm nain Politics platform atangin leh Party Politics atangte hi chuan puitlinpui har tih tam tak a neih ngei a rinawm thin a ni. Chuti chung erawh chuan amah hi zofate zinga Politics hlawhtling berte zinga chhiar ngam tur a ni tlat si a, vawin thlenga a dinhmun hi tuna kan Politician tam takte hian an phak ngai loh tur mai niloin mi tam takte phei hi chuan kumkhua pawha an nih ngai loh tur te pawh a ni hial awm e.

Politics lo chawlhsanin lo taptawm deuh ta pawh nisela kan la sawi bang kherin a rinawm loh a, a chanchin sawi hi nuam kan la ti chho zel ngeiin a rinawm.