THAMRAL LO JIMMY

Mahmuaka Chhakchhuak

Nov. 14, 2021

 

Zankhat chu mut tuma ka inbuatsaih vek tawh hnuin khum kiang lawka kan lehkhabu remkhawm zinga L. Keivom ziak ZORAM KHAWVEL – 8 chu phawrhin ka han bih thuak thuak a, chhiar tum lai bik pawh nei chuang lo a ka keu zawr zawr lai chuan Jimmy L. Chhangte chanchin a ziak ka hmuh chuan ka tang ta chat maiin ngaihnawm ti takin ka chhiar ta a. 

L. Keivom hi mihrang tih takah a thuziak hi a ngaihnawmin chhiar a nuam thei em em zel mai a, amah ngeiin thil tawn alo ngah tawh mai bakah thu leh hlaa a tui hrim hrim bawk avang hian a ziak hi chuan hrawk chang a fah lo a, pumpui thleng pawhin a fah bik ngei mai. Tuna Jimmy chanchin a han ziak pawh hi tlem tlem lo hre ve tawh mah ila kan ngaihtuahna min hruai thiamin chhiar zawh ngei ngei ngai turin kan thinlung a hruai kawi thiam bik tlat hi hriatthiam har ka ti a. Mualliam tawh hnu Jimmy L. Chhangte ngaih a ti zual tak zet a ni. Ama sawi ang ngeiin kan thlarauin reilote chhung tawih ral mai thei tisa vaivut a rawn sin hi mihring kan vanneihna ber pakhat chu a ni awm e a tih hi dik riaua hriatna ka neiin hemi bakah hi chuan mi nung tupawh mai hian hlutna kan nei tawh loin thlarau khawvelah kan cheng tawh dawn si a. Chuti ni loa khawvelah hian kumkhuaa mi hreng bet tlat tur tisa pu ta zawk ni ila chuan mihringa pian hi thil vanduaithlak ber a ni ngei ang a ti hial a ni.

Jimmy L. Chhangte ngei pawhin hring a chan lai chhung reiloteah khan vawiin thlenga kan la sawi ban theih loh tur thawnthu ngaihnawm tak a din a, amah ber lah chuan harsatna tinreng a tuarin vawi tam tak khawharin a awm a, baihvai takin a awm thul. A chang leh mal ngawih ngawihin a awm a, thinlung puakkeh ang hiala awm chang pawh a nei a sin. Chung zawng zawng chu nang leh kei chuan thawnthu ngaihnawm tak tiin mittui tla lek lek hialin kan lo chhiar thung a, hriat belh kan chak a, amah ngei hmuh kan chak phah a nih hi. Nimahsela keimah ang bawka a hmel hmu hman lo hi in lo awm ve ngei ka ring a, a THAMRAL LO MITTHLA ah bawk amah kawm leh mai hi kan tih theih tawk a ni si. Thawnthu phuahchawp a nih loh avang hian ka lehkhabu ngainat tak a niin tu dan takah emaw vawi ruk lai ka chhiar chhuak tawh nghe nghe a, chuti chung chuan vawiin thlengin ngaihnawm ka ti bang thei chuang lo.

L. Keivom hian kan hriat loh tam tak min hrilh a, THAMRAL LO MITTHLA-a Lalthaa kha Laltanpuia hi niin min hrilh a, chu chauh niloin Jimmy L. Chhangte leh a nupui inkara harsatna lo awm chhan leh an nupa inthen chhante min hrilh bawk hi a bengvarthlak rualin thin a rim nghal bawk. Jimmy zawng lungleng mi leh khawharmi tih takah a tak ngei pawhin chanchin lungchhiatthlak tak a tawng hi a vanduaiin a lainatawm tak zet a ni. Jimmy L. Chhangte ngeiin a THAMRAL LO MITTHLA-a Tek mei, van rang tek mai! a tih kha alo namai lo hlein tuna L. Keivom in min hrilh tak Tek mei ngei pawh hi alo namai lo lehzualin a tuartu tana a nat tur zia hi suangtuah phak rual a ni lo. Mahse, Jimmy L. Chhangte chu Jimmy L. Chhangte a nih tlat avangin kum 1992 ah chuan Zoramah lo awm leh tawhin kum 1997 alo thlen leh meuh chuan mi tinrengin ngaihnawm ti taka kan chhiar turin leh amah ngei pawhin ngaihnawm a tih bawk tur leh thamral maia a phalloh a mitthla tam takte chu THAMRAL LO MITTHLA tih hming chawiin a bu hialin alo khawr pum ta a.

Mizo chhulchhuak zingah hian amah anga Thailand, Laos, Cambodia, South Vietnam leh Philipines, Okinawa leh South Korea-ah te leh Bangkok thleng thlenga sulhnu nei hi a awm kherin a rinawm loh a. A ni chuan ama hming ngei pawh theihnghilh hman hial turin a piantirha a hming bakah hming dang dang paruk zet: Carl Van Jeffrey, Jeffrey Aaron Collins, Amnuay Sophavej, Seree Narksawan, James Narkbun, Jim Srivisaen tih hming hmang tein sulhnu ngaihnawm tak tak a nei a ni. Sawi tur tam tak a awm nain Monica nena an chanchin hi suangtuahna mitthlaah reh thei tawh ngai lo turin a cham reng a, thui tak sawi tur a awm nain ngaihnawm ka tih lai ber mai chu ‘Jeff, hei hi kan thlen thui tawp la ni phawt rih rawh se aw…..mi fing leh fel zawk i ni a, i hrethiam em em ang. Hei aia thui kan thlen palh hlauh chuanin, mi rinawm kan nihzia entirtu kan ‘hlutna’ hi kan hloh ve ve nghal ringawt dawn a ni! Amaherawhchu, hei hi tunah kan pumpelh theih chuan kan rinawmna ve ve kan infinfiahsak tawn theihna kawng pawimawh ber pakhat a ni. ‘Hlutna’ kan neih chhun hi inkheksak ve ve ila, a hun takah kan la chen dun zawk dawn nia aw….’ Tia a hmeichhia zawkin zan reh taka pindan rila ring si lo leh fiah tak chung sia a sawi hi a mawi sathliah lo a, a zahawm bawk a ni. Chunglam atanga piantharna a chan thu hre chiah lo mah ila Jimmy zawng chunglam pawhin a kawng a hruai tihlohtheihloh a ni si a.

Amah hi kan zingah la awmin, a chanchin hi min hrilh malh malh ta nisela chuan mittui hruk zauh zauh pahin ngawi renga ka lo ngaihthlak ka inring a, nimahsela chutiang chanchin ngaihnawm leh lungchhiatthlak chu sawi tur nei mahsela amah chu fiamthu duh mi leh zai ngaina mi tak a ni lawi si. Aizawla a awm leh hnuah ngei pawh eizawnna kawng hrang hrang zawhin a tir lamah chuan amah leng tawk lekah hian Pheikhawk siamin nitin a thu thin ni awm tak a ni a, a hnuah Spoken English zirna a hawng tihte kan han hre leh bawk a. THAMRAL LO MITTHLA bua min hrilh bak hi chanchin a ngah hlein a rinawm. Chuti chung chuan a lehkhabu atang ringawt pawhin amah kan hriat phahin amah kan ngainat phah a. He lehkhabu atang vek hian mi bik a nihna pawh kan hriain zofate zingah hian amah ang hi an la awm lo hial awm e tih tur khawpin a chanchin min hrilh hria a, chuvang tak chuan vawiin thlengin THAMRAL LO JIMMY hi kan thinlungah a cham ta reng a nih hi.

Theih nisela, rem ni bawk sela chuan Jimmy L. Chhangte pianchampha – June 2 ni apiang hian ama puala thu leh hla ruai killo hi thil chakawm tak ava ni em.